15
Chakampun Un Abus Cha Long-eg Taku Somsomkon Taku
(Gal. 6:1-5)
1 Chitakuʼn lapigsa pammatila, masapuɏʼn tuɏungan taku cha lakapsut un isun chi makabukud taku si bubukkuchoncha. Chakampun un abus chi bumaɏuwan chi long-eg taku somsomkon taku.
2 Somsomkon taku otyan bo bumaɏuwan cha bubuɏun taku ta kumoscheɏ pammaticha.
3 Ti si Jesu Kristu, chakampun un abus chi long-egla simsimmokla, ti kalan chi liigiliʼn ugud Apudyus, “Losan un lawwik un ilugud cha tagu kan sika, sakon chi maiggaala.”
4 Losan un liigili un ugud Apudyus, liigilicha ta maludtuchu kan chitaku ta iyalus taku cha ligat ya masegeg chi somsomok taku ta ipapati taku lamlama taku kan siya.
5 Ked ha iluwaluk kan Apudyus un mampeɏpuwan chi alus ya malegeg si somsomok, ta idchola mantitimpuyugenyu ta tuɏachonyu ugalin Jesu Kristu,
6 taplu man-os-ossaan taku un malaychayaw kan Apudyus un Aman Apu takuʼn Jesu Kristu.
Ha Mipatiyan Cha Gentil
7 Ked gapu ta ilawat chikayu kan Kristu, awatonyu bo kacha osa kan chikayu taplu michaychayaw si Apudyus.
8 Ti ibyegak kan chikayu un lambyalin Kristu bubùulon kan cha Judio ta ipailala kilatuttuwan Apudyus, taplu tungpaɏola cha ingkarila kan cha aappucha si awi.
9 Ya taplu cha Gentil manchaychayawcha kan Apudyus gapu si kachegula. Ti siya ibyegan chi liigili un ugud Apudyus un kalala,
“Ked chayawok sika Apudyus, kan ulay cha Gentil makachaychayawcha bo.
Ked ikankantami chayawmi kan sika.”
10 Ya kalala bo,
“Chikayuʼn Gentil, makaganggalas kayu kan cha chilutukan Apudyus un tagula.”
11 Ya kalala bo kasin,
“Chikayu losan un Gentil, chaychayawonyu si Apudyus. Ya chikayuʼn
losan un tagu chaychayawonyu siya.”
12 Ya awed bo inggilin Isaiah un kalala,
“Gumatong chi osaʼn galak Jesse, un umali mangituray kan cha Gentil.
Ked siya lamlamaoncha.”
13 Iluwaluk kan Apudyus un lampeɏpuwan chi lamlama taku, ta pagalasola chikayu ya palin-awaola somsomokyu gapu si pammatiyu ta pakoskoscheɏola lamlamayu kan siya gapu si kilabyelin chi Ispiritun Apudyus.
Ha Puntus Paul Un Mantudtuchu Si Kamatchi
(2Co. 10:15-16)
14 Susulud, tuttuwaʼn maplokak mipanggop kan chikayu, ti ammuk un bibiɏu cha pin-ayu koon ya laawatanyuʼn ustu cha tudtuchun Apudyus ya makwaʼn man-asitudtuchu kayu.
15 Ngim intalu ti lateɏochak un mangisuɏat mipanggop kan cha uchum un itudtuchuk kan chikayu ta ikasinku ipasomsomok, gapu si kachegun Apudyus un illidchola kan sakon
16 un bubùulon Jesu Kristu un tumuɏung kan cha Gentil. Mansimbiyak un isun chi pachi un mangibyegbyega si Bibiɏuʼn Chameg un lampeɏpu kan Apudyus, taplu mambyalin cha Gentil chatun un makaay-ayu kan Apudyus ya pilapeɏkas chi Ispiritula.
17 Ked gapu si litimpuyugek kan Jesu Kristu, makwaʼn ichayawku lansimbiyak kan Apudyus.
18 Ngim lappun uchum un ibyegak lu achi abus chi killingwan Kristu si languseɏala kan sakon. Ti ha lamatiyan cha Gentil kan Apudyus, ked ha langitudtuchuwak ya ha killingkingwak.
19 Ked gapu si kilabyelin chi Ispiritun Apudyus un laluɏung kan sakon un langwa si lakaskaschaaw ya cha mampataeg kan cha tagu. Ked lalipud ud Jerusalem ya inggalaʼd Illyricum, illiggak chi kabyeeɏak un langibyegbyega si bibiɏuʼn chameg mipanggop kan Kristu.
20 Panggopku un umoy ibyegbyega bibiɏuʼn chameg kan cha ili un achipun lipadngeɏ mipanggop kan Kristu, taplu achipulak mampaud si lap-at chi lisaachen cha uchum un tagu.
21 Ti ha liigili un ugud Apudyus, kalala,
“Mailan cha achipun labyegbyegaan mipanggop kan siya,
ya maawatan cha achipun lakadngey.”
Ha Somsomok Paul Un Umoy Ud Rome
22 Ked susulud, liya cha gapula un langam pigaʼn lataktaktakak un umali kan chikayu utlat.
23 Ngim si sala, lagamputku kawachik kan cha allaʼn ili. Ya gapu ta achuʼn tawon cha lummaus un piok un umali manggeggakay kan chikayu utlat,
24 ked sala ayak ud Spain, simsimmokku un manchegas utlat Rome ta makabibiɏulak yan akit kan chikayu ta mat-opak, ked cha losan un idchonyu kan sakon matuɏungalak un umoy ud Spain.
25 Ngim si sala, inyak ud Jerusalem idchon cha allayaʼn tuɏung un maatod kan cha tagun Apudyus udchi.
26 Ti laayat cha allaʼn mamati ud Macedonia ya Achaia un mangatod si tuɏung kan cha kakapus un tagun Apudyus ud Jerusalem.
27 Uwachaʼn somsomok un tumuɏung. Ngim ha katuttuwaala kalobbongancha un maluɏung kan cha kakapus ud Jerusalem, taplu milak-am cha Gentil si laispirituan un binchisyun cha Judio. Lobbong bo cha Gentil un mansimbiʼn tumuɏung si kasapuɏan cha mamatiʼn Judio.
28 Ked lu magamputku ipuɏang kan chicha allayaʼn pilak un luumung un chilagupku ud Macedonia ya Achaia, manchegasak utlat si ayak ud Spain.
29 Ammuk un lu umaliyak utlat, gumalas taku mipagapu si binchisyun Kristu.
30 Ked susulud, awed chi chawatok kan chikayu, gapu kan Apu takuʼn Jesu Kristu ya gapu si ayat un idchon chi Ispiritun Apudyus, losan taku otyan iluwalu sakon kan Apudyus.
31 Iluwaluyu ta seɏaklibyelak kan Apudyus kan cha achipun mamati ud Judea. Ya iluwaluyu bo ta awaton cha tagun Apudyus ud Jerusalem cha allayaʼn tuɏung un lampeɏpu kan cha Gentil.
32 Ya iluwaluyu ta ipalubus Apudyus ti patungechak magalasan un umali utlat, ta maillongan chi somsomokku.
33 Sapay otyan ta iinggew kan chitaku losan si Apudyus un mangatod si lumin-awaan. Amen.