2
Ummoy Cha Mangkalaing Un Langad-acheɏ Si Bituwon Intullong Si Jesus
1 Liyalak si Jesus si ili ud Bethlehem un sakupon Judea si timpun chi lanturayan Ari Herod. Inggew cha mangkalaing un langad-acheɏ si bituwon un lampeɏpu si ili un kapon chi sumileɏan ilit, gummatongcha ud Jerusalem un lakaim-imus,
2 “Chimma awechen chi alak un liyalak un Arin cha Judio? Intullongmi bituwon si kapon chi sumileɏan ilit ked siya ummaliyanmì utla ta chayawonmi siya.”
3 Chingngeɏn pun Ari Herod chi hachi, amod chi chalegla. Siya bo kan cha achuʼn taguʼd Jerusalem.
4 Impaayegla cha ap-apun cha papachi ya cha mimistulun chi lintog ot ilimusla kan chicha lu udma miyalakan chi Kristu.
5 Ot summongbyatcha un kalancha, “Ud Bethlehem, un osaʼn ili un sakupon chi Judea ti siya inggilin cha propeta un kalala,
6 ‘Ked sika, Bethlehem un iliʼn sakupon chi Judea, sika kapopotgen un ili
ud Judea ti sika meɏpuwan chi pangat un asi mangayyuwan
kan cha taguk un galak Israel.’ ”
7 Oli pun inyaggakaw Ari Herod impaayeg cha hachiʼn mangkalaing un langad-acheɏ si bituwon ot laammuwala kan chicha chi ustuʼn timpun lampain-an chi bituwon.
8 Ot imbuunla chicha ud Bethlehem un kalala, “Ingkayu amman sington chi alak. Ked lu maochesanyu, ipakaammuyu kan sakon ta inyak bo chayawon siya.”
9-10 Lagamput ked chi im-imus chi Ari, lallubbyatcha ot amod chi teɏokcha ti kasin lampaila hachiʼn bituwon un intullongcha. Ummun-ula lu chicha ot ummillong si byetug chi inggewan chi alak.
11 Lilumlokcha si hachiʼn byeɏoy ot intullongcha pu hachiʼn alak ya si ilalaʼn Mary, lampalintumingcha un lanchayaw kan siya. Ot lan-itokweɏcha kan cha lakakassun un ichatunchaʼn buɏawan, byangbyanglu un insenso ya apɏus un mirra ot illidchonchaʼn kan siya.
12 Ot bilegbyegaan Apudyus chicha si in-ilop, ta achicha mangulin kan Herod. Ot lalligligchaʼn langulin ud ilicha.
Ha Ummawichencha Ud Egypt
13 Ummoyon pun cha hachiʼn mangkalaing un tagu, lampaila anghel Apudyus kan Joseph si in-ilop ot kalala, “Bumangonka, itodchaklu cha man-ila ud Egypt ked inggew kayu udchi inggala ibyegak un mangulin kayu, ti impasngit Ari Herod chi alak ta ipaotoyla.”
14 Ot bummangon si Joseph ot intallayla cha man-ila ot ummoycha ud Egypt si hachiʼn labi.
15 Ot illinggewcha udchi inggalà latoy si Herod. Lakwa alla ta matungpeɏ imbyegan Apudyus kan cha propeta un kalala, “Ilayagek chi alakku ta telalaʼd Egypt.”
Impapatoy Herod Cha Aalak Un Leɏaki
16 Laammuwan pun Herod un silikapan cha hachiʼn mangkalaing un tagu siya, amod chi sangala. Ot imbilinla kan cha susuɏchachulaʼn otoyoncha cha losan un aalak un leɏaki un mantawon si chuwa ya cha chaampun machuwan tawon ud Bethlehem ya cha adchaliyan un ili. Ti umoy si chuwaʼn tawon chi lummaus malipud si lampain-an chi bituwon un imbyegan cha mangkalaing un langad-acheɏ si bituwon.
17 Ot latungpeɏ imbyegan propeta Jeremiah un kalala,
18 “Mamadngeɏ cha singongoya ud Ramah, amod cha sin-aagaeg ya sin-iibin.
Ilibilan Rachel cha aalakla ked issalaʼn liwliwaoncha siya ti laamincha latoy.”
Ha Langulilan Cha Joseph Ud Nazareth
19 Latoy pun si Herod, kasin lampaila anghel Apudyus kan Joseph si in-ilop ud Egypt ot imbyegala kan siya,
20 “Bumangonka, ta itallaylu cha man-ila ked mangulin kayuʼd Israel, ti latoy cha lamanggop un mangtoy si allaʼn alak.”
21 Ot bummangon si Joseph ot intallayla cha man-ila ot langulincha ud Israel.
22 Ngim chingngeɏla pun un si Archelaus un alak Herod chi lanturay ud Judea, ummogyat un umoy udchi. Gapu ta lipain-ilop kan siya, ummoycha ud probinsiyan chi Galilee.
23 Ot billumɏoycha si iliʼd Nazareth. Ot latungpeɏ imbyegan cha propeta un kalancha, “Ngadloncha siya iNazareth.”