18
Ha Kangatuwan Si Mampangatan Apudyus
(Mrk. 9:33-37; Luk. 9:46-48)
1 Si hachi mit laing un timpu, ummoy cha disipulus kan Jesus ot kalancha, “Silu kangatuwan si Mampangatan Apudyus?”
2 Ot ilayagen Jesus chi osaʼn alak ot pilasikedla si sangwalancha.
3 Ot kalala, “Tuttuwa ibyegak kan chikayu, lu achipunyu byaliwan chi somsomokyu ya mambyalin un isun cha aalak, achipun kayu mipati si mampangatan Apudyus.
4 Ked lu silu mangipakumbyabya si long-egla un isun chi alak alla, siya kangatuwan si Mampangatan Apudyus.
5 Ked lu silu mangipotog si labyabyan tagu un isun chi allaʼn alak gapu si pammatila kan sakon, sakon bo ipotogla.”
Mipanggop Si Sulisug
(Mrk. 9:42-48; Luk. 17:1-2)
6 “Lu silu mangmangwa si makabyasuɏan cha alla un kabyabyaan un taguʼn mamati kan sakon, un-ulloy chi mitakod chi chakeɏ un biletuʼn gilingan si byegangla ked lan-alud si kalusgongan chi byeybyey.
7 Kadchegu cha tagu si lubung alla ti achu cha sulisug un mapachasancha. Gagangay un gumatong cha sulisug kan cha mamati, ngim kadchegu chi taguʼn mansulisug si makabyasuɏan.
8 Lu ha imam willu ikim chi gapun chi makabyasuɏam, lampogem ked imbyellum. Ti un-ulloy chi gungsuɏka willu pilayka un makatagu kan Apudyus ud langit lu ha wechewed chi imam ya ikim un mibyellu si mallalayun un apuy.
9 Ked lu ha atam chi gapun chi makabyasuɏam, ukaom ked imbyellum. Ti un-ulloy chi bussokka un makatagu kan Apudyus lu ha wechewed chi atam ya mibyelluka si apuy ud impiyeɏlu.”
10 “Ammanyu ilan ta achiyu am-amsiwon cha allaʼn aalak si pammaticha ti cha anghelescha kalayun awed si awechen Amak ud langit.
11 Ti Sakon un Alak chi Tagu, ummaliyak utla pita ta inyak sington ya taguwon cha lataɏak un tagu.”
Cha Pangngalig Jesus Si Cha Lataɏak
(Luk. 15:3-7)
12 Oli pun lan-alig si Jesus, kalala, “Simma koon chi osaʼn tagu un singgasut chi keɏlilula ked lataɏak chi osa? Kapilitan un telala cha siyampuɏu ya siyam si bilig un lamɏegela ked ummoyla singngit chi ossaan un lataɏak.
13 Ked lu maochesala, gettoka amod chi galasla lu ha galas cha siyampuɏu ya siyam un achipun lataɏak.
14 Siya bo kan Amayuʼd langit un achipunla pion un awed mataɏak ulay ossaan kan cha allaʼn aalak.”
Ha Koon Taku Lu Makabyasuɏ Kadwa Taku
15 Ot intuɏuy Jesus un kalala, “Lu awed suludlu si pammati un makabyasuɏ kan sika, ingka kan siya ked ibyegam chi kabyasuɏala. Ngim masapuɏʼn abus kayu un chuwa. Ked lu chongɏola sika, bibiɏu ta langulilom chi suludlu.
16 Ngim lu achipunla chongɏon chi ibyegam, man-ayegka si ossaan willu chuwaʼn kadwam. Ked kasin kayu umoy ta awed chuwa willu tiɏuʼn mampaloklok si losan un maibyega.
17 Ngim lu achipunla chongɏon chicha, ibyegayu kan cha losan un mamati si simbyaan ta man-uuguchencha. Ked lu sassachi gey, ibilangyu siya un achipun mamati willu osaʼn manchachagup si bugis.”
18 Ibyegak kan chikayu tuttuwa, lu silu ipalityu utla pita, mipalit bo ud langit. Ked lu silu ipalubusyu utla pita, mipalubus bo ud langit.
19 “Awed bo ibyegak kan chikayu: Lu awed man-asiteulan cha chuwa kan chikayu utla pita un chawatonyu, idchon Amak ud langit kan chikayu.
20 Ti lu chilu awed cha chuwa willu tiɏu un man-um-ummung gapu si ngachenku, awechak kan chicha.”
Ha Makwa Si Taguʼn Achipun Mamakawan Si Suludla
21 Oli pun ummoy si Peter kan Jesus ot kalala, “Apu, mangam pigaok pakawalon chi suludku un makabkabyasuɏ kan sakon? Mangampitu?”
22 Ot kalan Jesus kan siya, “Chakampun si mangampitu abus ngim mangampitumpuɏu ya pitu.
23 Ti katchi Mampangatan Apudyus ud langit, un miyalig si osaʼn Ari un simsimmoklaʼn makasingin si utang cha bubùulola.
24 Si pin-ala makasingilan, inggetongcha kan siya osaʼn bubùulon un lakautang si kalibulibu un pilak.
25 Gapu ta achipun makabyayed si utangla, immanchen chi Ari un masapuɏʼn mingila siya, pati si asawala, cha aalakla ya cha losan un kukkuwala ta mambyayedla si utangla.
26 Ngim lampalintuming chi bubùulon si sangwalan chi Ari ot langkadkachegu un kalala, ‘Apu, alusalak yan akit, pawayaalak taplu mabyayachek cha losan un utangku.’
27 Ot kilacheguwan chi Ari siya ya liwayawayaala siya ot pilakawanla cha losan un utangla.
28 “Ngim ummoyon pun chi bubùulon, ilabotla chogalan bubùulon un ummutang kan siya si singgasut abus. Ot chilokmaala byegangla ot kalala kan siya, ‘Byayachem chi utanglu!’
29 “Lampalintuming chi lakautang un bubùulon si sangwalanla ot langkadkachegu kan siya, ‘Kaasim alusalak yan akit, ked byayachek chi utangku.’
30 Ngim achipunla kilacheguwan siya ya impaibyaɏudla siya inggala mabyayachela losan un utangla.
31 Intullong pun cha chogachaʼn bubùulon chi killingwala, patunged lummawik chi somsomokcha. Ot ummoycha impilit kan Ari cha losan un killingwala.
32 “Ot impaayeg chi Ari hachiʼn bubùulon ot kalala kan siya, ‘Aɏaaɏan kan bubùulon! Pilakawanku cha losan un utanglu ti langkadkacheguka.
33 Ot puggey achi kilacheguwan chi chogam un bubùulon un isun chi langkakacheguk kan sika?’
34 Ot summanga Ari ot impaibyaɏudla siya ta mapaligatan inggala mabyayachela losan un utangla.”
35 Ot lagamput pun, kalan Jesus, “Katchi bo koon Amak ud langit si kacha osa kan chikayu, lu achipunyu pakawalon un sipupusu cha susuludyu.”