14
Ha Latoyan John Un Mambubunyeg
(Mrk. 6:14-29; Luk. 9:7-9)
1 Si hachiʼn timpu, chingngeɏn Gubillachuɏ Herod ud Galilee chi mipanggop kan Jesus.
2 Ot kalala kan cha tagula, “Siya si John un Mambubunyeg un ummuli latagu. Hachi gapulaʼn alla kilabyelinla un mangwa kan cha lakaskaschaaw.”
3 Impachokman Herod si John ot impabyaɏudla siya gapu kan Herodias, un asawan Philip un suludla.
4 Ti imbyegbyegan John kan Herod, “Lappun kalobbongam un mangasawa kan Herodias!”
5 Pion Herod un ipaotoy si John, ngim umogyat kan cha tagu ti imbilangcha un propeta siya.
6 Chillumtong pu eɏgew un liyalakan Herod, lansala byebyeɏasang un alak Herodias si sangwalan cha losan ot laganggalasan si Herod.
7 Ot ingkarila kan siya, un kalala, “Isapatak un idchok kan sika lu silu chawatom.”
8 Gapu ta intudtuchun ilala, kalala kan Herod, “Idchom kan sakon si sala chi mapepeɏatuʼn uɏun John un Mambubunyeg.”
9 Bilabyawin Herod chi imbyegala, ngim gapu ta siya insapatala si sangwalan cha mangilila, immanchela un maatod chi chawatla.
10 Ot imbuunla cha susuɏchachu ot impasiwatla uɏun John si byabyayɏuchen.
11 Illiggacha uɏu si peɏatu ot illidchoncha si byebyeɏasang ot illiyoyla kan ilala.
12 Ot ummoy cha disipulusla illaɏa lechegla ot illimboncha. Ot ummoycha imbyega kan Jesus chi lakwa.
Ha Lamakalan Jesus Kan Cha Limallibuʼn Tagu
(Mrk. 6:30-44; Luk. 9:10-17; Jhn. 6:1-14)
13 Chingngeɏn pun cha Jesus chi lakwa kan John, ummoyoncha lambyangka ta umoycha tumalin si lugeɏʼn lappun tagu. Ngim laammuwan pun cha amod un tagu un ummoyoncha, tilelancha ilicha ot lalidtidchaɏancha un lituntun-ud kan siya.
14 Lummogsed pun cha Jesus si byangka ot intullongla cha amod un tagu un lituntun-ud, kummachegu kan chicha ot kilaanla cha saksakitcha.
15 Lummaschom pun, ummoy cha disipulusla kan siya ot kalancha, “Lummaschom ked talin utla, siya un ibyegam kan cha amod un tagu ta umoycha kan cha adchaliyan un ili ya mangngilacha si kaloncha.”
16 Ngim kalan Jesus kan chicha, “Achipun masapuɏʼn umoyoncha, mangatod kayu si kaloncha.”
17 Ot kalancha, “Ngim abus chi lima un tilapay ya chuwa un ikan si awed.”
18 Ngim kalan Jesus, “Igetongyu utla.”
19 Ot imbilinla un umamuy cha tagu si komkompay. Ot illaɏala cha limaʼn tilapay ya chuwaʼn ikan ot lantanged ud langit ta manyaman kan Apudyus. Lagamput pun, pilispis-igla tilapay ot illidchola kan cha disipulusla ot inwaɏascha kan cha tagu.
20 Langan cha tagu losan ot lassugcha. Ot laplaplu lasawaɏan si chuwaʼn langaya chi lasaweɏ un chilagup cha disipulus.
21 Limallibu bilang cha langan un lelleɏaki, achipun libilang cha byebbyebyai ya cha aalak.
Ha Lalidchaɏalan Jesus Si Lap-at Chi Chelum
(Mrk. 6:45-52; Jhn. 6:16-21)
22 Lagamput ked chi lamakalan Jesus kan cha tagu, lallugalola cha disipulusla si byangka ta umun-ulacha chumemang si byeybyey. Ot pilaoyonla cha amod un tagu.
23 Ot lalagecha si Jesus si bilig un ummoy tummalin malluwalu. Ot lummabi pun, illinggew si Jesus abus udchi.
24 Si hachiʼn timpu, inggew chi byangka un lallugelan cha disipulusla si gawan chi byeybyey ked mampaligatchaʼn makaitulung si byangka ti silaksakyabyen chi amod un challuyun ya liyabot chi amod un bidbid.
25 Sakbyey un wiswisngit, ummoy si Jesus kan chicha, un lalidtidchaɏan si lap-at chi chelum.
26 Intullongcha pun siya un malidtidchaɏan si lap-at chi chelum, sintutukingcha si ogyatcha ti kalancha pun lu kamɏog.
27 Ot kakman Jesus gilingaan chicha un kalala, “Achi kayu manchaleg! Sakon laoy. Achi kayu umogyat!”
28 Ot kalan Peter, “Apu, lu tuttuwaʼn sika, malidchaɏalom sakon si lap-at chi chelum ta umaliyak kan sika.”
29 Kalan Jesus, “Umalika.”
Ot lummogsed si Peter si byangka ot illugilan malidchaɏan si lap-at chi chelum un umoy kan Jesus.
30 Ngim lagiklala pu amod un bidbid, ummogyat ot allaʼn milutob ot illipkawla kalan un, “Apu, taguwolak!”
31 Ot kakman Jesus silikpaw chi imala ot kalala, “Chimma pammatim? Puggey manchuwachuwaka?”
32 Oli pun lallugencha si byangka kasin ot gummilok chi bidbid.
33 Cha disipuluslaʼn inggew si bangka chilaychayawcha siya un kalancha, “Tuttuwaʼn sika Alak Apudyus.”
Ha Lamalin-awaan Jesus Si Lasakit Ud Gennesaret
(Mrk. 6:53-55)
34 Chummemangcha pun si byeybyey, gummatongcha si sakup chi Gennesaret.
35 Immatulan cha tagu si Jesus si hachiʼn ili. Ot lambuuncha si umoy mangiwanwan si losan un mampalikwos un ili ot lan-igetongcha kan cha losan un lasakit kan siya.
36 Langkadkachegucha kan siya ta samela gey appachen cha lasakit chi sanggayachen chi anchuʼn silupla. Ot cha losan un langapped lummin-awacha.