8
Ha Lamakalan Jesus Kan Cha Opat Libuʼn Tagu
(Mat. 15:32-39)
1 Si hachiʼn timpu, lachagup kasin cha amod un tagu. Ked lappun kaloncha, ilayagen Jesus cha disipulusla ot kalala kan chicha,
2 “Macheguwak gey kan cha taguʼn alla, ti latiɏun eɏgew chi illiinggewancha kan sakon ked lappun kaloncha.
3 Lu paoyolok chicha un mabibittin, matalimuchewcha si chaɏan ti adchayuwan chi leɏpuwan cha uchum.”
4 Summongbyat cha disipulusla, “Ngim udma intaku mangean si umalay un ipakan taku kan cha allaʼn tagu ti alla taku si talin un ili?”
5 Ilimus Jesus, “Piga awed un tilapayyu?”
Kalancha, “Pitu.”
6 Ot pilaamuy Jesus cha amod un tagu si pita. Illaɏala pituʼn tilapay, lanyaman kan Apudyus, ot pilispis-igla ot illidchola kan cha disipulusla ta iwaɏascha kan cha tagu. Ot kingwacha.
7 Awed bo akit un mangkapaat un ikan. Lanyaman si Jesus kan Apudyus ot ibyegala kan cha disipulusla un iwaɏascha kan cha tagu.
8-9 Langkakakancha losan ot laslassugcha. Umoy un opat libu cha taguʼn langan. Ot chilagup pun cha disipulusla cha lasaweɏ, laplaplu pituʼn langaya.
10 Pilaoyon pun Jesus cha tagu, lallugencha kan cha disipulusla si byangka ot ummoycha si iliʼn sakupon chi Dalmanutha.
Ha Lampakwaan Cha Pariseo Kan Jesus Si Lakaskaschaaw
(Mat. 12:38-39; 16:1-4; Luk. 11:29-32)
11 Ummoy cha uchum un Pariseo kan Jesus ot lilugiyanchaʼn lakasongsongbyat kan siya ti pionchaʼn mangin-in-an siya. Ilimuscha un mangipaila si lakaskaschaaw un mangagammuwan un si Apudyus chi langibuun kan siya.
12 Summaw-ot si Jesus ot kalala, “Puggey chi salaʼn lolap man-imus si lakaskaschaaw un mangagammuwan? Ibyegak chi katuttuwaan kan chikayu, lappun ipailak un lakaskaschaaw kan cha allaʼn lolap.”
13 Tilelala chicha, lallugen si byangka, ot chummemang.
Ha Mangiyaligen Jesus Mipanggop Si Tudtuchun Cha Pariseo Ya Si Herod
(Mat. 16:5-11)
14 Cha disipulus Jesus, laliwatancha byaɏuncha. Ossaan abus chi tilapay un awed kan chicha si byangka.
15 Bilegbyegaan Jesus chicha, “Man-alled kayu ya tanchaalanyu cha yeast cha Pariseo ya si Herod.”
16 Ot lan-uuguchencha un kalancha, “Imbyegala hachi ti lappun siyad tilapay taku.”
17 Ammun Jesus chi ug-ugguchoncha, ot kalala kan chicha, “Payuggey man-is-isikan un lappun ilawityù byaɏunyuʼn tilapay? Achipunyu pay laing mitullong willu maawatan? Ha latangkin chi somsomokyu?
18 “ ‘Allat cha atayu, ngim lappun itullongyu. Allat cha ingayu, ngim lappun chongɏonyu.’ Ha achipunyu masmasmok?
19 “Ha limaʼn tilapay un pilispis-igku kan cha limallibuʼn tagu? Pigan langaya cha lasaweɏ un chilagupyu?”
Kalancha kan siya, “Lasawaɏan si chuwa.”
20 “Ot pilispis-igku pun chi pituʼn tilapay un impakanku kan cha opat libuʼn tagu, pigan langaya chilagupyuʼn lasaweɏ?”
Ot kalancha kan siya, “Pitu.”
21 Oli pun kalala kan chicha, “Ked chaampunyu gey maawatan?”
Pilalin-awan Jesus Chi Kuɏap
22 Gummatongcha pun ud Bethsaida, inggetong cha uchum un tagu osaʼn lakuɏap un leɏaki ot langkadkachegucha kan Jesus ta appachela siya.
23 Kiliwidla lakuɏap un leɏaki ot illiyoyla si igid chi ili. Ot tiluppaala atala ya ilappachela ot ilimusla kan siya, “Awed kamman mitullonglu?”
24 Lantanged chi leɏaki ot kalala, “O, mitullongku cha tagu, ngim isucha kayuʼn malidtidchaɏan.”
25 Ingkasin Jesus ilappachen chi atan chi leɏaki. Ot lanchiyat un ustu ya pummillong chi tullongla.
26 Ot pilaoyon Jesus siya ta umoy ud uwacha. Bililinla siya un kalala, “Achika mangoy si halat un ili.”
Ha Langibyeg-an Peter Mipanggop Kan Jesus
(Mat. 16:13-20; Luk. 9:18-21)
27 Ot ummoy cha Jesus ya cha disipulusla si cha iliʼn sakupon Caesarea Philippi. Si chaɏan, ilimus Jesus kan chicha, “Silu ibyegbyegan cha tagu kan sakon?”
28 “Kalan cha uchum, sika si John un Mambubunyeg. Kalan bo cha uchum un, sika si Elijah, ked cha uchum kalancha un, osa kan propeta.”
29 Ilimus Jesus kan chicha, “Chikayu ngay? Himma maibyegayu kan sakon?”
Summongbyat si Peter, “Sika Kristu un ingkarin Apudyus un umali.”
30 Bililin Jesus chicha, “Achiyu ibyegbyega mipanggop kan sakon.”
Ha Langibyeg-an Jesus Mipanggop Si Matoyala
(Mat. 16:21-23; Luk. 9:22-27)
31 Ot lilugiyalan itudtuchu kan chicha un kalala, “Sakon un Alak chi Tagu ked masapuɏʼn achu mipachaskuʼn ligat. Lawwingoncha sakon cha pallakayon cha Judio, cha ap-apun cha papachi ya cha mimistulun chi lintog. Ked mapatoyak, ngim lu lumaus chi tiɏun eɏgew, umuliyak matagu.”
32 Mammot-eg chi lambyebyegan Jesus kan chicha. Ot intalin Peter siya ot tilubngeɏla.
33 Ngim lansagung pun si Jesus kan cha disipulusla, ilomɏala si Peter un kalala, “Wissedka, Satalas! Ti ha somsomoklu chakampun un lampeɏpu kan Apudyus, ngim lampeɏpu si tagu.”
34 Ot ilayagen Jesus cha amod un tagu ya cha disipulusla, ot kalala, “Lu silu simpion un mitun-ud kan sakon, masapuɏʼn ichuyala long-egla, ked alusala ligat ulay siya matoyala ked tun-uchola sakon.
35 Ti ha taguʼn piolaʼn taguwon chi biyegla ked mataɏakla mit laing. Ngim ha taguʼn mangkasutala biyegla gapu kan sakon ya gapu si Bibiɏuʼn Chameg, matatagu ing-inggala.
36 Ti simma magaleb chi tagu lu mangkuwala losan un awed si lubung, ngim mataɏakla biyegla si ing-inggala?
37 Ti lappun makwaʼn mansakan chi tagu si biyegla.
38 Ti si salaʼn timpu un lappun pammatin chi kaachuwan ya amod chi kilalawwing cha tagu. Ked lu silu mabiin un mangisiked kan sakon ya ugudku, Sakon un Alak chi Tagu, mabiilak bo un mangisiked kan siya lu mangulilak un mangipaila si kilachayaw Amak un kadwaalak kan cha angheles.”