3
Cha Jesus Kan Nicodemus
1 Inggew chi osaʼn Pariseo un mangngachen Nicodemus, osaʼn pangat cha Judio.
2 Si osaʼn labi, ummoy kan Jesus ot kalala, “Mistulu, ammumi un osaka un mistulu un imbuun Apudyus. Lappun makakopya si cha laoy un lakaskaschaaw un pin-am killingwa lu lappun si Apudyus kan siya.”
3 Ot kalan Jesus, “Tuttuwa allaʼn ibyegak kan sika. Lu achipun kasin miyalak chi tagu, achipun makwaʼn mipati si Mampangatan Apudyus.”
4 Kalan Nicodemus kan Jesus, “Simma in-ilon chi taguʼn leɏakay un miyalak kasin? Ha makwa kamman un lumlok kasin si buwang ilala ta miyalak kasin?”
5 Ot kalan Jesus, “Tuttuwa allaʼn ibyegak kan sika. Achipun makwaʼn mipati chi tagu si Mampangatan Apudyus lu achipun miyalak si chelum ya si Ispiritun Apudyus.
6 Ha tagu, makwaʼn iyalakla tagu abus, ngim ha iyalak chi Ispiritu ked laispirituan.
7 Achika maschaaw lu ibyegak kan sika, ‘Masapuɏʼn miyalak kayu kasin.’
8 Isun chi bidbid, achipunyu maila ngim mangoy si piolaʼn ayon. Madngeɏyu unguɏla ngim lappun ammuyu si meɏpuwala ya ayala, ngim liklaonyu mit. Siya isun chi makwa si kacha osa un miyalak si Ispiritu.”
9 Ot kalan Nicodemus, “Simma in-ilon chi makwaala?”
10 Ot kalan Jesus kan siya, “Osaka un lanchilongeɏ un mistulu ud Israel, ngim achipunlu maawatan?
11 Tuttuwa allaʼn ibyegak kan sika, siyad uguchonmi tagammumi ya ibyegami intullongmi. Ngim achipunyu patiyon chi ibyegbyegami.
12 Lu achipunyu patiyon chi ibyegak kan chikayu mipanggop si makmakwa utla pita, giluɏa bo lu ibyegak kan chikayu mipanggop ud langit?
13 Lappun tagù ummoy ud langit lu achi abus chi Alak chi Tagu ti udchi leɏpuwala.
14 Ked isun chi langipangatuwan Moses si bulinsiʼn uɏog si pusti si lugeɏʼn lappun ummili, katchi bo makwa si Alak chi Tagu un masapuɏʼn mipangatu si krus.
15 Ta lu silu mamati kan siya, maidchen si biyeg un mallalayun.”
16 Gapu si amod un man-aayat Apudyus kan cha tagu, illidchola ossaan un alakla ta lu silu mamati kan siya, achipun misila kan Apudyus ta machusa ngim maidchen si biyeg un mallalayun.
17 Ti chakampun si imbuun Apudyus chi Alakla utla lubung ta kodchongala cha tagu, ngim imbuunla taplu taguwola cha tagu.
18 Ked lu silu mamati kan siya, achipuncha machusa. Ngim cha achipun mamati, lasisitan lakodchonganchaʼn machusa, ti achipuncha mamati si ossaan un Alak Apudyus.
19 Ked allaya lasun un lakodchongancha. Ummali Alak Apudyus utla lubung ta silawala somsomok cha tagu, ngim cha tagu pipioncha gikbot lu ha padcha, ti lawwik chi angwatcha.
20 Ti lu silu mangwa si lawwing, sangaola padcha ya achipun umoy si padcha ti issalaʼn mipaila cha byasuɏla.
21 Ngim lu silu mangwa si tuttuwa, umachali si silaw ta mipaila un tumimbuɏuy kan Apudyus cha killingwala.
Cha Jesus Kan John
22 Lagamput pun, ummoy si Jesus ya cha disipulusla si probinsiyan Judea. Udchi illinggewanchaʼn lambunyeg.
23 Pin-a bo lambunyeg si John ud Aenon, un adchaliyan ud Salim, ti achu chelum udchi. Ummoy cha tagu kan siya ot lambunyeg kan chicha.
24 Si hachiʼn timpu chaampun mibyaɏud si John.
25 Si lamingsan, lakasongsongbyat cha disipulus John si osaʼn Judio mipanggop si in-ilon un machuɏsan.
26 Ot ummoycha kan John ot kalancha, “Mistulu, masmasmoklu hachiʼn ummali kan sika si chomang chi Jordan, hachiʼn imbyegam kan chikami? Pin-a mambunyeg si sala ked achu cha pin-a umoy kan siya!”
27 Kalan John, “Lappun tagù makakopya si koola lu achipun Apudyus idchon kan siya.
28 Chikayu ustuʼn mansistigu un imbyegak, ‘Chakampun un sakon chi Kristu, ngim imbuulak un umoy umun-ula lu siya.’
29 Ha isula, isun chi leɏakiʼn mangikaseɏ si byebyai, ked ha kadwan chi leɏaki manchongeɏ ked magalasan lu chongɏola gingan chi leɏaki. Ked lagalas lu man-asawacha. Katchi bo un isun chi sakon chi mangiyala si gumatngan chi Messias ked amod chi galasku si sala.
30 Masapuɏʼn mipangatngatu siya ked michedchedcheɏaak.”
Ha Umali Un Mampeɏpuʼd Langit
31 Ot intuɏuy John un kalala, “Ha umali un lampeɏpuʼd ngatu, siya kangatuwan si losan. Ha lampeɏpu utla pita, siya tagu ud pita, ked ha uguchola cha mipanggop cha byaleg ud pita. Ngim ha umali un mampeɏpuʼd langit, siya kangatuwan kan cha losan.
32 Ked ibyegbyegala cha intullongla ya cha chingngeɏla, ngim akit cha mamati si ibyegbyegala.
33 Ngim cha mamati kan siya, tiloopcha un tuttuwa cha ilugud Apudyus.
34 Ti ha imbuun Apudyus, siya uguchola ugud Apudyus ti illidchon Apudyus kan siya chi Ispiritula.
35 Amod chi ayat Apudyus un Ama kan Jesus un Alakla ot impuɏangla cha losan kan siya.
36 Lu silu mamati si Alak Apudyus maidchen si biyeg un mallalayun. Ngim lu silu mangissan si Alakla, achipun maidchen si biyeg un mallalayun ngim chusaon Apudyus siya ing-inggala.”