19
Ha Langam-amsiwan Cha Suɏchachu Kan Jesus
(Mat. 27:27-31; Mrk. 15:16-20)
1 Oli pun impasaplit Pilate si Jesus kan cha susuɏchachula.
2 Ot bummalikugcha si lasi ot ingkoronacha kan Jesus. Ot sililupancha siya si mancheɏaeg.
3 Ot ilam-amsiwcha siya un kalancha, “Matatagu Arin cha Judio!” Ot tilimpakancha siya.
Ha Laikodchongan Jesus Un Mailansa Si Krus
(Mat. 27:15-31; Mrk. 15:6-15; Luk. 23:13-25)
4 Kasin bo lummawà Pilate ot kalala kan cha Judio, “Allaya, ipailawak siya ta mangagammuwanyu un lappun ammuk si byasuɏla.”
5 Ot illawacha si Jesus un sissiyaʼn lakokoronaan si lasi ya lasisillupan si mancheɏaeg. Ot kalan Pilate kan chicha, “Itullongyu taguʼn alla!”
6 Intullong pun cha papangat cha papachi ya cha guwecha siya, illipkawcha kalan un, “Ilansam siya si krus! Ilansam siya si krus!”
Ot kalan Pilate kan chicha, “Chikayu mangilansa kan siya si krus, ti lappun lachuktaɏak si byasuɏla.”
7 Ot kalan cha Judio, “Awed si lintogmi un masapuɏn matoy siya ti imbilangla long-egla un Alak Apudyus.”
8 Chingngeɏn ked Pilate alla, laam-amod ummogyat.
9 Lilumlok kasin si Pilate si byeɏoyla ot ilimusla kan Jesus, “Simma lampeɏpuwam?” Ngim achipun summongbyat si Jesus.
10 Ot kalan Pilate kan siya, “Puggey sakon achi songbyatan? Ha achipunlu ammu un alla kalobbongak un mangibukat kan sika willu mangipailansa kan sika si krus?”
11 Summongbyat si Jesus ot kalala, “Lappun kalobbongam kan sakon lu achipun Apudyus illidchon kan sika. Ked cha langipuɏang kan sakon kan sika, ked chakchakeɏ byasuɏcha lu ha byasuɏm.”
12 Chingngeɏn pun Pilate hachi, illisngitla in-ilolan mangibukat kan Jesus. Ngim simpapakuy cha Judio un kalancha, “Lu ibukatlu siya, chakampun un gayyom chika kan Emperador. Ti kabusuɏn Emperador chi mangibilang si long-egla un Ari.”
13 Chingngeɏn pun Pilate hachiʼn impakuycha, kasinla impalawà Jesus ot ummoy si Pilate ummamuy si aammuyan chi kuis, un kalancha si Hebrew un ugud “Gabbatha.”
14 Si hachiʼn uras, chanchali mamatuk si hachiʼn eɏgew un mansagalaan cha Judio si Piyastan Lallausan. Ot imbyegan Pilate kan cha Judio, “Allaya Ariyu!”
15 Impakuycha kalan un, “Ipaotoylu siya! Ipaotoylu siya! Pailansam siya si krus!”
Ot kalan Pilate, “Ha pionyuʼn pailansak chi Ariyu si krus?”
Ot kalan cha papangat cha papachi, “Lappun uchum si Arimi lu achi abus si Emperador!”
16 Oli pun impuɏang Pilate si Jesus kan chicha ta milansa si krus.
Ha Langilansaancha Kan Jesus Si Krus
(Mat. 27:32-44; Mrk. 15:21-32; Luk. 23:26-43)
17 Ot illaɏan cha susuɏchachu si Jesus, ot impabukudcha kan siya krusla ot ummoycha si lugeɏʼn ngadloncha “Lugeɏn chi Bettukeg,” un ngadloncha Golgotha si ugud un Hebrew.
18 Ot udchi langilansaancha kan Jesus si krus ot illansacha bo cha chuwaʼn akkawan si kruscha. Ot langgawaoncha si Jesus.
19 Inggew bo impagilin Pilate un kalatula ot impaipakotla si krus Jesus un kalala, “Jesus un iNasareth, un Arin cha Judio.”
20 Achu cha Judio un lamasa si hachiʼn kalatula ti liigili si Hebrew, Latin ya Greek ya adchaliyan si siudad chi lilansaala.
21 Ot ummoy cha papangat cha papachi kan Pilate ot kalancha, “Sukatam chi inggilim un, ‘Arin cha Judio.’ Katla igilim: ‘Kalan chi taguʼn alla un siya chi Arin cha Judio.’ ”
22 Summongbyat si Pilate, “Lu silu inggilik, siya, achipun masukatan.”
23 Gilamput ked cha susuɏchachu illansà Jesus si krus, illaɏacha silupla ot lambisbissakancha langkapaton. Illaɏacha bo anchuʼn silupla un lilagaʼn lappun saipla.
24 Kalan cha susuɏchachu, “Achi taku bisbissakon. Mambubulut taku ta ilan taku lu silu mangaɏa.” Lakwa laoy taplu matungpeɏ liigili un ugud Apudyus un kalala, “Lanbisbissakancha silupku ya lambibillulutancha anchuʼn silupku.” Katchi killingwan cha susuɏchachu.
25 Cha summisiked un liyaadchali si krus Jesus ked cha ilala ya sulud ilala, si Mary un asawan Cleopas ya si Mary Magdalene.
26 Intullong pun Jesus si ilala un lakasiked si disipuluslaʼn ay-ayatola, kalala kan ilala, “Ila, ibilanglu siya un alaklu.”
27 Ot kalala bo si disipuluslaʼn ay-ayatola, “Ibilanglu siya un ilam.” Ot inggan chi hachiʼn timpu intallayla siya ud uwacha.
Ha Latoyan Jesus
(Mat. 27:45-56; Mrk. 15:31-41; Luk. 23:44-49)
28 Tilataggammun Jesus un gilamgamputla cha losan un lipiyeɏ kan siya, ot kalala, “Lauwawak.” Imbyegala hachi taplu matungpeɏ liigili un ugud Apudyus.
29 Inggew chi osaʼn angang un laplu si kummilom un byeyas. Ot illusongchad chi impakatchaʼn isun chi kapas ot ichotchotcha si tupokla ta supsupala.
30 Gilamput ked Jesus silupsupan chi kilom, kalala, “Lagamput.” Ot lanyung-ut ot latoy.
Ha Lallusikcha Si Butik Jesus
31 Gapu ta eɏgew un mansagalaan cha Judio si Piyastan Lallausan lu mabigat, ummoycha papangat cha Judio chilawat kan Pilate ta mamputodcha si ikin cha hachiʼn lilansa, ta pumgos chi matoyancha ta man-opascha kan cha lechegcha si kruscha. Ti cha Judio issanchan sissiya chi lechegcha si krus lu Sabyechun man-illongan.
32 Ot ummoy cha susuɏchachu lilambok cha ikin cha chuwaʼn likrus si cheeg Jesus.
33 Ngim ipasalicha pun si Jesus, intullongcha un lalattoy, ot achipuncha pintod cha ikila.
34 Ngim ha osaʼn suɏchachu illusikla tubyeyla si butik Jesus, ot kakma lummoswa chaɏa ya chelum.
35 Ha disipulus un langigili kan cha intullonglaʼn laklakwa. Siya mampaloklok un tuttuwa cha hachi taplu mamati kayu bo.
36 Lakwa cha laoy ta matungpeɏ liigiliʼn ugud Apudyus un kalala, “Lappun ossaan si maptod un tung-eɏla.”
37 Ya inggew bo osaʼn liigiliʼn ugud Apudyus un kalala, “Bubuyyaoncha siya un lilusikcha.”
Ha Lallobolancha Kan Jesus
(Mat. 27:57-61; Mrk. 15:42-47; Luk. 23:50-56)
38 Lagamput ked, inggew chi osaʼn iyArimatea un mangngachen Joseph. Lamati kan Jesus, ngim achipunla impakaammu ti umogyat kan cha papangat cha Judio. Ot ummoyla chilawat kan Pilate chi lecheg Jesus. Ot inteun Pilate, ot ummoyla illaɏa lecheg Jesus ot intallayla.
39 Si Nicodemus un ummoy kan Jesus si osaʼn labi, kiladwaala si Joseph. Langiyoy si tiɏumpuɏuʼn kilo un byangbyanglu un lakwa si mirra ya aloe un iggacha lu milobon.
40 Bilussungcha lecheg Jesus si luput pati cha byangbyanglu ti siya ugalin cha Judio lu iloboncha latoy.
41 Si hachiʼn lugeɏ un likrusan Jesus, inggew chi gechin un awed chi baruʼn lobon un lappun lilobon.
42 Gapu ta chancheli chi eɏgew un man-illongan cha Judio ya adchaliyan chi hachiʼn lobon, siya langimbolancha kan Jesus.