15
Si Jesus Chi Ustuʼn Puun Chi Grapes
1 Ot lan-alig si Jesus, un kalala, “Sakon chi ustuʼn puun chi grapes, ked si Amak chi man-aayyuwan.
2 Itetepangla pangapangon cha panga un achipun mamunga ya chuɏsala cha panga un mamunga-bunga ta umad-achu mambubungala.
3 Pummeɏkas kayu gapu si intudtuchuk kan chikayu.
4 Ituɏuyyu iinggew kan sakon ked ituɏuyku bo iinggew kan chikayu. Lu achipun kayu iinggew kan sakon, achipun kayu mamunga un isun chi panga un achipun iinggew si puunla.
5 “Sakon chi puun chi grapes, ked chikayu cha pangala. Lu silu iinggew kan sakon, iinggewak bo kan siya, ked achu mambubungala. Ti lu lappulak kan chikayu, lappun makwayu.
6 Lu achipun chi tagu iinggew kan sakon, mibyellu siya un isun chi pangan lasopɏak. Lu meɏangu panga, uppuloncha ya soggoncha.
7 Lu iinggew kayu kan sakon ya iinggew bo ugudku kan chikayu, manchawat kayu si pionyu, ked maatod kan chikayu.
8 Lu mamunga kayu si achu, michaychayaw si Amak, ked mambyalin kayu disipulusku.
9 “Ay-ayatok chikayu un isun chi man-aayat Ama kan sakon. Ked iinggew kayu si ayatku.
10 Isun chi mantututtuwak kan cha bilbilin Amak, ya inggewak si ayatla, iinggew kayu si ayatku lu tumuttuwa kayu si cha bilbilinku.
11 Imbyegak cha alla kan chikayu ta iinggew otyan chi galasku kan chikayu, ya lappun otyan mangkuɏangan chi galasyu.
12 “Allaya bilinku kan chikayu: man-asiayat kayu un isun chi man-aayatku kan chikayu.
13 Ha kachakɏan un ayat un ipailan chi tagu ked ichuyala biyegla para kan cha bubuɏunla.
14 Ked chikayu cha bubuɏunku lu tuttuwaonyu cha bilinku.
15 Achipunku ibilang chikayu un bubùulon, ti achipun chi bubùulon ammu chi pin-an chi ap-apula koon. Ngim ibilangku chikayu bubuɏunku, ti impakaammuk kan chikayu losan un chingngeɏk kan Amak.
16 Chakampun un chikayu lamili kan sakon, ngim sakon chi lamili kan chikayu. Imbuunku chikayu ta ingkayu ya mamunga-bunga kayu si achu. Ked mantuɏuy otyan chi bungayu. Ta ulay lu silu chawatonyu kan Ama mipagapu si ngachenku, idchola kan chikayu.
17 Allaya bilinku kan chikayu, man-iillayat kayu.”
Cha Achipun Mamati Sangaoncha Cha Disipulus
18 Kalan Jesus kasin, “Lu sangaon chikayu kan cha achipun mamati, somsomkonyu un sakon chi ilun-ulacha silanga.
19 Lu mikama kayu kan cha achipun mamati utla lubung, ayatoncha chikayu. Ngim gapu ta pililiyak chikayu, achi kayu mikama kan chicha, ked hachi mansasangaancha kan chikayu.
20 Somsomkonyu imbyegak kan chikayu, un lappun bubùulon un langatngatu lu ap-apula. Lu pilaligatancha sakon, paligatancha bo chikayu. Lu tiluttuwacha intudtuchuk, tuttuwaoncha bo chikayu.
21 Ngim kooncha cha alla kan chikayu gapu kan sakon, ti achipuncha ammu si Ama un langibuun kan sakon.
22 Lappun otyan makabyasuɏancha lu achipulak ummali ya lakaug-uggud kan chicha. Ngim si sala, lappun manlasuncha kan cha byasbyasuɏcha.
23 Lu silu mansasanga kan sakon, mansasanga bo kan Amak.
24 Lappun otyan makabyasuɏancha lu achipunku killingwa chi lakaskaschaaw si sangwalancha un lappun makakopyà tagu. Ngim si sala, intullongcha killingwak ked sissiyan mansasangacha kan chikamiʼn chuwa kan Amak.
25 Makwa cha laoy ta matungpeɏ hachiʼn liigili si lintogcha un kalala, ‘Mansasangacha kan sakon un lappun gapula.’ ”
Ha Koon Chi Ispiritun Apudyus
26 Ot kalala bo, “Ibuunku kan chikayu chi Ispiritu un mampeɏpu kan Ama ta tumuɏung kan chikayu. Siya mampaloklok si katuttuwaan mipanggop kan sakon.
27 Ulay chikayu, itakcheɏyu bo mipanggop kan sakon, ti kiladkadwaanyu sakon malipud si chamu.”