13
Ha Lamebyeɏan Jesus Cha Ikin Cha Disipulusla
1 Si eɏgew sakbyey un Piyastan chi Lallausan, ammun Jesus un chilumtong chi timpuʼn malelala si lubung ked mangulin kan Amala. Lalipud si chamchamu, ilay-ayatla cha tagula utla lubung. Ked si sala impappailala ayatla kan chicha inggala si alungus chi eɏgew.
2 Si hachiʼn labi un mangamangalan Jesus ya cha disipulusla, impaspasmok Satalas kan Judas un alak Simon Iscariote un iyibitla si Jesus.
3 Ammun Jesus un illidchon Amala kan siya cha losan un kilabyelin. Ammula bo un Apudyus chi leɏpuwala ya siya bo mangulilala.
4 Ot summiked si Jesus ot kilaanla takpin chi silupla ot takchola si tuweɏya awakla.
5 Ot kiloala peɏatu si chelum ot byebyeɏala ikin cha disipulusla asila ot pilulasan si tuweɏyan imbobodla si awakla.
6 Ot lichuum pun kan Simon Peter, kalan Peter kan siya, “Apu, ha byebyeɏam cha ikik?”
7 Summongbyat si Jesus, “Achipunlu maawatan si sala chi pin-ak koon, ngim asim maawatan.”
8 Ot kalan Peter kan siya, “Achipunku iteun un byebyeɏam cha ikik.”
Ot kalan Jesus, “Lu achipunku byebyeɏan cha ikim, achipunka mibilang un disipulusku.”
9 Insongbyat Peter, “Apu lu katlat, chakampun si abus chi ikik si byebyeɏam, ulay cha imak ya uɏuk!”
10 Ot kalan Jesus kan siya, “Ha lagamput lan-omos, achipun masapuɏʼn man-omos kasin ti lagamput pummeɏkas. Abus chi ikila masapuɏʼn mabyebyeɏan. Pummeɏkas kayu losan, ngim awed kan chikayu osaʼn achipun.”
11 Ti ammun Jesus chi mangiyibit kan siya, ked hachi kalalan, “Pummeɏkas kayu losan, ngim ossaan chi achipun.”
12 Gilamput pun Jesus bilebyeɏan cha ikicha, kasinla illigga takpin chi silupla ot ummamuy. Ot ilimusla kan chicha, “Ha maawatanyu killingwak kan chikayu?
13 Ngadlonyu sakon un ‘Mistulu’ ya ‘Apu,’ ked ustu mit chi imbyegayu ti tuttuwa.
14 Ked lu sakon un Apuyu ya Mistuluyu, lamebyeɏ kan cha ikiyu, masapuɏʼn man-asibyeɏbyeɏ kayu bo si cha ikiyu.
15 Killingwak laoy ta awed mantuɏachenyu, ta koonyu bo isun chi killingwak kan chikayu.
16 Tuttuwa allaʼn ibyegak kan chikayu: lappun musassu un langatngatu lu ha ap-apula, ya lappun bo bubùulon un langatngatu lu ha langibuun kan siya.
17 Allat pun un laawatanyu cha laoy, pian kayu lu koonyu.
18 “Chakampun un chikayu losan chi mangibyeg-ak, ti ammuk cha chilutukak. Ngim masapuɏʼn matungpeɏ liigiliʼn ugud Apudyus un kalala, ‘Ha taguʼn lakaubung kan sakon, siya mangiyibit kan sakon.’
19 Ibyegak alla kan chikayu si sala sakbyey un makwa, ta lu makwa, mamati kayu un sakon chi Kristu.
20 Tuttuwa allaʼn ibyegak kan chikayu: lu silu mangawat si taguʼn ibuunku, ilawatla sakon. Ked lu silu mangawat kan sakon, ilawatla bo langibuun kan sakon.”
Impadtun Jesus Chi Mangiyibit Kan Siya
(Mat. 26:20-25; Mrk. 14:17-21; Luk. 22:21-23)
21 Imbyegan pun Jesus chi hachi, amod chi chachauyla ot imbutaktakla, “Tuttuwa allaʼn ibyegak kan chikayu: osa kan chikayu chi mangiyibit kan sakon.”
22 Ot lan-asitullong cha disipulusla, ti lappun ammucha lu silu kan chicha chi ibyegbyegala.
23 Ot ummamuy si cheeg Jesus chi ay-ayatolaʼn disipulusla.
24 Ot silinyasan Simon Peter siya ta imusola kan Jesus lu silu kan chicha ibyegbyegala.
25 Ot ummachali kan Jesus ot lisacheg kan siya ot ilimusla, “Apu, silu hachiʼn taguʼn ibyegbyegam?”
26 Ot kalan Jesus, “Ha taguʼn mangidchek si ilusongkuʼn tilapay, siya!” Ot illusongla pun, illidchola kan Judas un alak Simon Iscariote.
27 Illaɏan ked Judas chi tilapay, lilumlok si Satalas kan siya.
Ot kalan Jesus kan siya, “Man-ikopyam lu silu piom un koon.”
28 Ngim cha disipulus Jesus un lakakan kan siya, achipuncha laawatan lu silu piolaʼn ibyega kan Judas.
29 Gapu ta si Judas chi mamangchon si pilakcha, kalan pun cha uchum un disipulus lu imbyegan Jesus kan siya un umoy mangngila kan cha kasapuɏancha si piyasta. Awed bo cha uchum un kalancha lu umoy mangatod si Judas si pilak kan cha kakapus.
30 Ot illaɏan pun Judas chi tilapay, kakma lummawa. Labi hachiʼn timpu.
31 Ummoyon pun si Judas, kalan Jesus, “Si sala, michayawak un Alak chi Tagu ya michaychayaw bo si Apudyus mipagapu kan sakon.
32 Ked lu mapachayawan si Apudyus kan sakon, si Apudyus bo mangipachayaw kan sakon un Alak chi Tagu ked kakmala koon.
33 “Aalakku, achipun mabyeyeg chi inggewak kan chikayu. Oli ot singtonyu sakon, ked isun chi imbyegak kan cha papangat cha Judio, siya bo ibyegak kan chikayu, un achipun kayu makaoy si ayak.
34 Awed chi baru un bilin un idchok kan chikayu: masapuɏʼn man-asiayat kayu. Isun chi man-aayatku kan chikayu, kamatlat bo un man-asiayat kayu.
35 Ti lu man-asiayat kayu, siya mangagammuwan cha losan un tagu un disipulusku chikayu.”
Impadtun Jesus Chi Lamuklitan Peter Kan Siya
(Mat. 26:31-35; Mrk. 14:27-31; Luk. 22:31-34)
36 Kalan Simon Peter kan Jesus, “Apu, chimma ayam lù?”
Ot summongbyat si Jesus, “Achipun makwa un mitun-udka kan sakon si sala, ngim mitun-udka si umaliʼn eɏgew.”
37 Kalan Peter, “Apu, paak gey achi mitun-ud kan sika si sala? Ti lakasagalaak un matoy gapu kan sika!”
38 Summongbyat si Jesus, “Hilu! Ha tuttuwaʼn lakasagalaka un matoy gapu kan sakon? Tuttuwa allaʼn ibyegak kan sika, sakbyey un malullakuk chi kawitan, lamitluwom sakon piluklitan.”