Ha Mikadwaʼn Suɏat
John
1
1 Sakon si John un pallakayonyuʼn mamati, allaya suɏatku kan sikaʼn ila un pililiyan Apudyus ya cha aalaklu. Tuttuwan ay-ayatok chikayu, ya chakampun un abusak si mangay-ayat kan chikayu ti ulay bo cha losan un langagammu si katuttuwaan.
2 Ti hachiʼn katuttuwaan un awed kan chitaku, ked ichagasla iinggew kan cha chitaku ing-inggala.
3 Sapay otyan ta kacheguwan, kaasiyan ya palin-awaon chikayu kan Ama takuʼn Apudyus ya si Jesu Kristu un Alakla ta ammuwon taku katuttuwaan ya man-asiay-ayat taku.
4 Amod chi galasku si laammuwak un tiluttuwan cha uchum un aalaklu katuttuwaan un imbilin Ama takuʼn Apudyus kan chitaku.
5 Ked ha chawatok kan sika, potpotgok un ila, masapuɏʼn man-asiayat taku. Ha allayaʼn ibyegak, chakampun si baruʼn bilin, ngim sigud un bilin Apudyus kan chitaku malipud si chamchamu.
6 Ha ustu-ustuʼn man-aayat taku, siya maluttuwaan taku kan cha bilinla. Ked ha bilinla un chingchingngeɏ taku malipud si chamchamu, kalala un masapuɏʼn man-asiayat taku.
7 Achu cha taguʼn lummoswa si sala un pin-a man-allilaw kan cha tagu. Cha taguʼn achipun mamigbig un ummali si Jesu Kristu un lambyalin tagu. Cha kamatchiʼn tagu, mangallilaw ya kabusuɏn Kristu.
8 Ked allechenyu ta achipun mataɏak cha kilawachiyu, ngim maaɏayu cha gunggulayu.
9 Ulay siluʼn tagu, lu achipunla suɏuton chi intudtuchun Kristu, ngim chog-ala, achipunla ammu si Apudyus, Ngim ha mangituytuɏuy un sumuɏut si intudtuchun Kristu, si Apudyus un Ama ya si Jesu Kristu un Alakla iinggew kan siya.
10 Ked lu awed umali kan chikayu un sabyali itudtuchula, achiyu mangiliyon si byeɏoyyu kan achiyu pakumustaon.
11 Ti cha mammangili kan cha katchiʼn tagu, isun chi makakopyacha kan cha lawwing un koola.
12 Achu cha piok un ibyega kan chikayu, ngim achipunku pion un igili si allayaʼn suɏatku ti lamlamaok un geggakayon chikayu ked hachi asik mangug-ugguchen taplu ustu-ustuʼn maganggalasan taku.
13 Pakumustaon chikayu kan cha allaʼn aalak cha susulud utla un pililiyan bo Apudyus.
Hachi abus un ibyegak.