2
Ha Mataguwan Cha Tagu
1 Gapu ta kamatchi kilangatun chi Alak Apudyus, masapuɏʼn ipapati takuʼn popotpotan chi katuttuwaan un chingngeɏ taku ta achi taku umachayu.
2 Isun chi lintog Apudyus un impakaammun cha angheles kan cha aappu taku un langipaloklok un tuttuwa, ked lu silu sumupling ya achipun tumuttuwa, ustu-ustuʼn lak-amola machusaala.
3 Ked lu kamatchi mipanggop si imbyegan cha anghel, sin-umamod un achipun taku malisiyan chi machusaan taku lu ipampaliwa taku chi kapotogen un mataguwan. Ti si Apu Jesu Kristu, siya chamuʼn langipatigammu si mataguwan taku, ked cha hachiʼn lanchochongngeɏ kan siya chicha bo langipatigammu kan chitaku si katuttuwaan.
4 Ked ulay si Apudyus, impaloklokla katuttuwaan si langwaala kan cha lansabsabyalin sinyeɏ ya langkalakalasi un lakaskaschaaw. Ked illidchela bo cha mamati si kabyeeɏan un lampeɏpu si Ispiritun Apudyus un miyulud si piola.
Ha Malagu Kan Chitaku
5 Chakampun un cha angheles chi pililiyan Apudyus un mangituray si baru un lubung un ibyegbyegami ngim ha tagu.
6 Ti hachi kalan chi osaʼn liigili si ugud Apudyus un kalala,
“Apudyus, himman kuma tagu un sosomkom gey chicha?
Puggey un potpotgom chicha?
7 Si sin-akitan killingwam chicha un labyebbyebya lu cha angheles.
Ngim pilotpotoglu ya pilachayawam.
8 Ya chicha lanturayom kan cha losan un killingwam si allaʼn pita.”
Hachi kalala un impaituray Apudyus si tagu cha losan un awed ked piolaʼn uguchon un chumtong chi eɏgew un iturayan chi tagu cha losa-losan. Ngim ha katuttuwaala, achipun taku pay laing maila un iturayan chi tagu cha losan un killingwan Apudyus.
9 Ngim ammu taku un latungpeɏ alla gapu kan Jesus.
Ti laipabyabya siya si sin-akitan lu cha angheles, taplu gapu si kachegun Apudyus makwa un mapachasala matoy para kan cha losan un tagu.
Ked si sala, gapu si langichuyaala si long-egla un mapampaligatan ya matoy,
lipangatu siya ya lapachayawan.
10 Ti miyustu-ustu chi killingwan Apudyus un langwa si losan ya siya lakwaan cha losan un awed para si michayawala, piola un achu cha mambyalin un alakla ta mipaticha bo si kilachayawla. Ustu-ustu langipalubusala si mapaligatan Jesus. Ti si Jesus chi mangichaɏan kan chitaku ya siya puun chi mataguwan taku.
11 Si Jesus chi lameɏkas kan chitaku si byasuɏ ya chitakuʼn pilapeɏkasla ked ossaan chi Ama taku. Ked hachi gapu un achipun Jesus ibiin un mangibilang kan chitaku un susuludla.
12 Imbyegan Jesus,
“Ipakaammuk chi mipanggop kan sika Apudyus kan cha susuludku,
ya ikankantak bo chayawku kan sika si michogaak kan chicha.”
13 Ked kalala bo, “Si Apudyus abus chi mantegochek.” Ya kalala bo, “Allaak kan cha allaʼn aalak Apudyus un impuɏangla kan sakon.”
14 Gapu ta tagu cha allaʼn aalak un makwaʼn matoy, lambyalin bo si Jesus tagu un isucha. Killingwala alla taplu gapu si matoyala, abyakola si Satalas un alla kilabyelinla si otoy,
15 ya wayawayaala cha tagu un miyaligchaʼn labyaɏud si ogyatchaʼn matoy.
16 Ti lalaweg un chakampun kan cha angheles chi tuɏungala ngim chitaku un taguʼn libilang un galak Abraham.
17 Ked masapuɏʼn mambyalin si Jesus isu taku si losan un kilatatagu taku un maibilang un susuludla. Ked si sala, siya malagchegu ya mantegochen un kangatuwan un pachi un mansimsimbi kan Apudyus, ti siya lamayed si byasuɏ taku ta mapakawan taku.
18 Gapu ta pilachaslaʼn mismu ligat ya silubsub Satalas, ked makwalaʼn tumuɏung kan cha silubsub Satalas.