3
Chilawat Paul Un Iluwaluwancha Chicha
1 Susulud, ha alungus chi allaʼn suɏatmi kan chikayu, chawatonmi un iluwaluwanyu chikami taplu mampogos un mipachameg chi ugud Apu Jesus ya ipotog kan tuttuwaon cha tagu un isun chi killingwayu.
2 Iluwaluyu bo ta ilisi chikami kan Apudyus kan cha taguʼn amod chi uyungcha, ti chakampun un losan cha tagu mamati.
3 Ngim mantegochen chi Apu taku, ked pakoskoscheɏola pammatiyu ya seɏaklibyela chikayu kan Satalas.
4 Ked gapu si tegodmi kan Apu takuʼn Jesus, lamlamaonmi un koonyu ya ituɏuyyu koon cha losan un imbilinmi kan chikayu.
5 Sapay otyan ta ichaɏan chi Apu taku somsomokyu ta maawatanyu mipanggop si man-aayat Apudyus ya kilaalus Kristu.
Masapuɏʼn Mallagpot Takuʼn Mangkawachi
(1Th. 2:9)
6 Susulud, si ngachen Apu takuʼn Jesu Kristu, allaya ibilinmi kan chikayu. Masapuɏʼn achi kayu makabibiɏun kan cha mamati un masachut un mangkawachi ya achipuncha tungpaɏon cha imbilinmi kan chikayu.
7 Ti ilammuyun mismu un masapuɏʼn tuɏachonyu ugalimi si illinggewanmi kan chikayu. Ti patunged kami mallagpot un mangkawachi.
8 Pasigmi byeyachen cha illaɏami kan chikayu un kasapuɏanmi, ti ingkaligatanmi un mangkawachi si ileɏgew ya lilabi taplu achi kayu maligatan mipanggop kan cha kasapuɏanmi.
9 Kamatchi killingwami ta siya tuɏachonyu, ulay alla kalobbonganmi un patuɏung kan chikayu si kasapuɏanmi.
10 Ti ha illinggewanmi kan chikayu utlat, imbilinmi alla: Achiyu pakalan cha masachut un mangkawachi.
11 Ti chingngeɏmi un awed kalu cha uchum kan chikayu un mantungatungangaw ya siyad mallagpotancha cha bumibiyang si kawachin cha uchum.
12 Ked awed chi ibilinmi kan cha katlat un tagu, ti siya imbilin Apu Jesu Kristu. Ibilinmi ya segagonmi chichaʼn mangkawachicha ta lumin-awa mambibiyegcha ya awed mangeancha si kasapuɏancha.
13 Ngim chikayuʼn susulud, achi kayu otyan masngay un mangwa si bibiɏu.
14 Ked lu sissiyaʼn awed cha achipun maluttuwa si allaʼn insuɏatmi, tatanchaalanyu halat un tagu ya achi kayu mitimbuɏuy kan siya taplu bumiin.
15 Achiyu ibilang siya un kabusuɏyu ngim byegbyegaanyu siya un isun chi suludyu.
Ha Luwalun Paul
16 Iluwaluk kan Apu takuʼn Jesus un puun chi lumin-awaan taku, ta pasigla mallin-awaon cha somsomokyu ulay silu makwa. Ya pasig iinggew kan chikayu losan.
17 Ha allaʼn alungus chi suɏatmi, sakon si Paul chi mismuʼn langigili. Kamatla mangkokopyak kan cha losan un suɏatku taplu milasin un tuttuwaʼn sakon chi lampeɏpuwala.
18 Iluwaluk ta kacheguwan chikayu losan kan Jesu Kristu un Apu taku.