4
Mantitimpuyug Cha Losan Un Mamati
(Rom. 12:6-8; 1Co. 12:12-26)
1 Ked sakon un libyaɏud gapu si mansimsimbiyak kan Apu Jesu Kristu, ha ibyegak kan chikayu, koonyuʼn makaay-ayu mambibiyegyu kan Apudyus un lamili kan chikayu.
2 Ha koonyu, masapuɏʼn ipakumbyabyayu long-egyu, ked achi kayu malaysayaw ya masapuɏʼn man-asiillalus kayu ti siya mangipain-anyu si man-asiay-ayatanyu.
3 Ya ipapatiyu un mangwa si man-ossaalanyu un pion chi Ispiritun Apudyus ya eɏ-eɏtonyu timpuyugyu un lampeɏpu kan siya.
4 Ossaan taku un long-eg Jesus, ya ossaan bo Ispiritun Apudyus un inggew kan chitaku. Ossaan bo lamlama un awaton taku si umaliʼn eɏgew gapu si lamiliyan Apudyus kan chitaku.
5 Ked ulay achu taku, ossaan chi Apu taku, ossaan bo pammati taku, ya ossaan bo labunyagen taku.
6 Ti ossaan si Apudyus un Apun cha losan ya siya bo Aman cha losan. Siya bo iinggew kan chitaku losan ya mangkawachi kan chitaku.
Mansabsabyali Kabyeeɏan Un Illidchon Apudyus Ta Matuɏungan Taku
(1Co. 12:4-11)
7 Ngim ha kachegun Apudyus, mansabsabyali illidchon Kristu si kacha osa kan chitaku un kabyeeɏan, insigun si simsimmoklaʼn idchon.
8 Libyega si liigiliʼn ugud Apudyus un kalala:
“Ha langulilalaʼd langit, achu ilawitlaʼn byaɏud ya awed bo
illidchola un kabyeeɏan kan cha tagu.”
9 Ked, himma piolaʼn uguchon chi allaʼn langulilalaʼd langit? Ha piolaʼn uguchon, ked ummula chummeɏa si kabyabyaan un lugeɏ utla lubung.
10 Ked hachiʼn chummeɏa un lampeɏpuʼd langit, siya bo ustu-ustuʼn langulin ud langit taplu siya inggew si losan un lugeɏ ta iturayala cha losan un inggew.
11 Ya illidchola bo cha mansabsabyaliʼn kabyeeɏan kan cha tagu ta matuɏungan cha lamati kan siya. Chilutukala cha uchum si man-apostolesla ya cha uchum si mampropetala. Ya chilutukala cha uchum un mangibyegbyega si bibiɏuʼn chameg ya cha uchum un mampastor ta ayyuwalancha cha mamati ya cha uchum mantudtuchu kan chicha.
12 Killingwala cha alla taplu isagalala kacha osaʼn mamati un koola pion Apudyus ya mansimbi kan cha susuludla ta kumoscheɏ pammaticha ta man-ossaan un long-eg Kristu.
13 Taplu man-ossaan chi pammati taku ya ammuwon takuʼn ustu-ustu Alak Apudyus ta chumakeɏ pammati taku un isun chi miyisu taku kan Kristu.
14 Lu katchi makwa kan chitaku, chakampun un sissiyaʼn isu taku cha aalak un mallasu maawisan taku si cha losan un baruʼn tudtuchu, ya achipun taku maallilaw kan cha masikap un mansabsabyali itudtuchucha taplu achipun machegas chi pammati taku.
15 Ngim ha koon taku, ibyega taku katuttuwaan, achi taku otyan sumanga un mangibyega, ya ipaila taku ayat taku, ti masapuɏʼn miyisu taku kan Kristu si losan un koon taku ti siya uɏu taku.
16 Siya mangichaɏan kan chitaku un pallakalong-egla, ked uɏatla mamangchon si mansisimpuwan cha losan un long-eg. Ked lu koon chi osaʼn partin chi long-eg chi biyangla, kumoscheɏ ya chumakeɏ long-eg. Ked kamatchi otyan chi koon takuʼn long-eg Jesu Kristu ta kumoscheɏ timpuyug taku ya pammati taku mipagapu si man-aayat taku.
Ha Bumaɏuwan Chi Mataguwan Si Lamatiyan Kan Jesu Kristu
(Rom. 6:1-14; Col. 3:5-17)
17 Ked itudtuchuk cha alla kan chikayu un imbyegan Apu Jesu Kristu kan sakon, un masapuɏʼn achiyu sissiyaon un pin-a tuɏachon cha kokòon cha achipun mamati, ti siyad suɏutoncha abus cha awed si somsomokcha un lappun simbila
18 ti achipun lasilawan cha somsomokcha. Ya lappun bingaycha si biyeg un idchon Apudyus, ti lappun ammucha si mipanggop kan siya ya latangkin cha somsomokcha.
19 Ked lakaan chi bibìilancha ya tuttuwan achipuncha maattoman cha lawwing un pion chi long-egcha ya achipuncha iyagey un pin-a mangwa kan cha losan un lawwing.
20 Ngim chikayu, chakampun un hachi ilacheɏyu mipanggop kan Kristu.
21 Ti chingngeɏyu mipanggop kan siya ya latudtuchuwan kayu kan siya si katuttuwaan un awed kan Jesus.
22 Ked masapuɏʼn man-awichenyu cha losan un lawwing un ugaliyu un pin-ayu killingwa si chaampunyu mamatiyan, ti cha hachiʼn ugali siya maallilawanyu ya mayam-alanyu.
23 Masapuɏʼn mapabiɏu somsomokyu
24 ked iggayu bibiɏuʼn biyegyu ti killingwa chikayu kan Apudyus un isula. Ti kamatchi isun Apudyus un mampeɏkas ya lappun kaamsiwala.
25 Ked masapuɏʼn achi kayu man-asituli, ngim abus chi katuttuwaan si ibyegayu, ti mantitimpuyug taku losan un ossaan un long-eg Kristu.
26 Ked lu awed sumangaanyu, allechenyu ta achi kayu mangwa si byasuɏ. Ya achiyu iluchen chi sangayu, sin-akitan otyan ked lakaan.
27 Ya achiyu ipalubus un subsubon Satalas chikayu.
28 Lu awed ka-aakaw, masapuɏʼn iyageyla ked lumabbu, ti hachi ustu ta awed mangeala si masapuɏla ya ituɏungla kan cha makasapuɏ si tuɏung.
29 Achi kayu man-ugud si lawwing, ngim siyad uguchonyu cha makatuɏung ya mampakoscheɏ si somsomok cha manchongeɏ mipanggop si bibiɏu.
30 Ya achiyu koon chi mampachauy si Ispiritun Apudyus un iinggew kan chikayu, siya mangammuwan taku un uwa chitaku kan Apudyus. Ked cha tagu un awed chi Ispiritun Apudyus kan chicha, sigulachuʼn mawayawayaancha si umaliʼn eɏgew.
31 Masapuɏʼn achiyu sosomkon cha sigeb chi lomlomyu si sasangngaonyu ya summangaanyu. Iyageyyu boʼn sumangasanga ya makasubosubog. Achi kayu otyan mangkiyakiyap ya achiyu mangig-iggaan si ugud cha uchum,
32 ngim ha koonyu otyan, man-asiillalus kayu ya man-asikachegu kayu. Ya masapuɏ boʼn man-asipillakawan kayu un isun chi lamakawalan Apudyus kan chikayu mipagapu kan Kristu.