4
1 Chikayu boʼn awed musassula, masapuɏʼn ustu ya bibiɏu koonyu kan cha musassuyu, ti ammuyuʼn awed chi Apuyu ud langit.
Ha Uchum Un Tudtuchun Paul
(1Th. 5:15-25)
2 Alla bo uchum un ibyegak kan chikayu. Ipapatiyu un malluwalu ya achi kayu masngay. Allechenyu ta achi maalliw chi somsomokyu ya manyaman kayu kan Apudyus.
3 Iluwaluwanyu chikami ta idchon Apudyus chi wayami un mangibyegbyega si ugudla ya mipanggop kan Kristu un chaampun maammuwan inggala si sala. Ti siya gapun chi labyaɏuchek si sala.
4 Ked iluwaluwanyu sakon taplu ipakaawatku un ustu-ustu, ti hachi ustuʼn kook.
5 Masapuɏʼn bibiɏuwonyu cha koonyu kan cha achipun mamati ya pasigyu ibyega mipanggop kan Jesu Kristu kan chicha.
6 Pasig otyan lagalas ya ustu cha losan un ug-ugguchonyu ta ammuwonyu in-ilonyuʼn malongbyat si kacha osa un makaimus mipanggop si pammatiyu.
Ha Lampakumustaan Cha Uchum Un Mamati
7-8 Si Tychicus un sulud takuʼn ay-ayaton taku ya malagpati ya biɏunmi un mansimsimbi kan Apu. Ibuunku siya kan chikayu utlat ta siya asi mangug-uggud si makmakwa kan chikami utla ya mansegeg si somsomokyu.
9 Buɏlan chi malagpati un sulud takuʼn Onesimus, osa boʼn ay-ayatok un kailiyanyu. Ked chicha chi mangibyega kan chikayu si losan un makmakwa kan chikami utla.
10 Si Aristarchus un lakabyaɏud kan sakon, pakumustaola bo chikayu. Ya ulay si Mark un kapingsan Barnabas, pakumustaola bo chikayu. Imbyegbyegak kan chikayu un lu umali si Mark utlat, sayakawonyuʼn mammangili kan siya.
11 Si Jesus Justus, pakumustaola bo chikayu. Ked cha losan un Judio un mamati utla, abus cha allaʼn tiɏu si lakakawachi kan sakon mipanggop si mampangatan Apudyus. Ked chicha masegagen chi somsomokku.
12 Si Epaphras un osa boʼn kailiyanyu, pakumustaola bo chikayu. Siya bo osaʼn bubùulon Jesu Kristu. Pasigla ipapati un mangiluwalu kan chikayu ta kumoscheɏ ya maangsan chi pammatiyu ked lappun mangkuɏanganyu un malungpeɏ si pion Apudyus.
13 Paloklokak chi kilalagpotlaʼn mangkawachi para kan chikayu ya para bod cha mamatiʼd Laodicea ya Hierapolis.
14 Si Luke, un ay-ayatonmi un chuktuɏ ya si Demas, pakumustaoncha bo chikayu.
15 Pakumustaonyu bo cha susulud takuʼn mamati ud Laodicea ya si Nympha ya cha mamati un pin-a manchetchetong ud uwacha.
16 Lu magamputyu byasaon chi allaʼn suɏatku, ipabyasayu bo si simbyaan ud Laodicea. Ya byasaonyu bo suɏat un mampeɏpuʼd Laodicea.
17 Ya ibyegayu kan Archippus un masapuɏʼn ipapatila gamputon chi kawachiʼn lipiyeɏ kan siya.
18 Sakon si Paul, imak chi mismuʼn langisuɏat si alla. Kumusta kayu. Otyan ta mallin-awa kayu losan utlat. Achiyu otyan maliwatan un libyabyaɏuchak. Si Apudyus chi kumachegu kan chikayu losan.