8
Ha Koon Chi Mamati Un Mangatod Si Ituɏungcha
(2Co. 9; Php. 4:10-20)
1 Susulud, pionmi un ipatigammu kan chikayu mipanggop si kachegun Apudyus un lipaila kan cha mamati ud Macedonia.
2 Ti ulay amod chi malliligatcha ya achu palikutcha, lagalascha bo. Ked ulay lu patunged cha kapus, isucha byaklang un mangatod si tuɏungcha kan cha susulud taku ud Jerusalem.
3 Ya takcheɏak bo un chakampun un patinggan chi lobbongcha illidchoncha, ngim illidchoncha losan un kabyeeɏancha un lampeɏpu si somsomokcha.
4 Ked langkadkachegucha kan chikami un tumuɏungcha un mansimbi kan cha tagun Apudyus ud Judea.
5 Ked laschaaw kami si man-aatodcha! Ti ha chamu illidchoncha long-egcha kan Apu. Ot lansimbicha bo kan chikami si mangwaancha si pion Apudyus.
6 Si Titus chi ummulaʼn langwa si alla. Siya gapuʼn langkadkachegu kami kan siya un ituɏuyla otyan cha alla ked tuɏungan chikayu un mangigamput si allayaʼn bibiɏu un mansimbi gapu si ayat.
7 Byaklang kayu si losan un awed kan chikayu: pammati, man-ugud, kilaammu, mangipapati un mangwa si losan ya ayatyu kan chikami. Ked lamlamaonmi un lawedwed chi man-aatodyu si tuɏungyu.
8 Chakampun un ibilinku alla. Ngim ipakaammuk kan chikayu ayat cha allaʼn uchum un mangatod si tuɏung, ta main-an chi gettok un ayatyu kan cha bubuɏunyu.
9 Ti ammuyu kachegun Apu takuʼn Jesu Kristu. Ulay lu byaklang, lambyalin siya kapus gapu kan chikayu taplu mapabyaklang kayu si kummapusala.
10 Ked allaya ibyegak mipanggop si ituɏungyu. Bibiɏu lu igamputyu illugiyu si lummaus un tawon. Chikayu langilugi un langwa ya langatod si tuɏung.
11 Ked ilanyu ta igamputyu chi kawachiyu! Ipapatiyu un mangigamput si kiged chi kabyeeɏanyu un mangatod.
12 Lu mangatod kayu gapu si ayatyu un mangatod, magalasan si Apudyus, achipunla singilon chi chakampun un kabyeeɏan taku un idchon.
13 Chakampun un kalak un bumaklang cha uchum ked chikayu machegsolan.
14 Ti ha piok, man-asituɏung taku losan. Si salaʼn alla silaweɏyu, bibiɏu lu tuɏunganyu cha makasapuɏ si tuɏung. Ta lu chumtong chi timpuʼn mangkuɏang kayu ya awed sawaɏoncha, tuɏungan chikayu bo. Ta lu kamatchi koon taku, lappun ossaan si maligatan kan chitaku un mamati.
15 Isun chi liigili si ugud Apudyus, “Ha taguʼn lan-apit si achu, chakampun un lasaweɏ ti illidchola kan cha uchum. Ked ha taguʼn akit chi laapitla, achipun makuɏangan ti idchen cha uchum.”
Ha Langiyoyancha Titus Si Suɏat Ud Corinth
(1Co. 16:1-4; Php. 4:10-20)
16 Manyaman kami kan Apudyus ti illidchela si Titus si ayatlaʼn tumuɏung kan chikayu un isun chi ayatmi un maluɏung kan chikayu.
17 Ti ha langibyeg-anmi un umoy siya utlat, latetteɏok ti leusla simsimmok un umoy utlat.
18 Ked awed chi osaʼn ibiɏunmi kan siya un sulud taku un machaychayaw si losan un mamati gapu si mangibyegbyeg-ala si Bibiɏuʼn Chameg.
19 Ked siya mismu chilutukan cha mamati taplu mibiɏun kan chikami un mangiyoy si ituɏung taku kan cha makasapuɏ si tuɏung ud Judea ked chikami mansimsimbi gapu si ayat un machayawan Apu Jesu Kristu ya mipaila taku ayat taku un tumuɏung.
20 Ked an-allechenmi ta lappun mamabyasuɏ kan chikami mipanggop si in-ilonmi un mansimbi si allaʼn chakeɏ un tuɏung un laumung.
21 Ti ipapatimi un mangwa si ustu un chakampun abus si sangwalan Apudyus ngim ulay bo si sangwalan cha tagu.
22 Ked ibuunmi allaʼn sulud taku kan chicha un umali utlat un lapachasmi ya lapaloklokanmi si achuʼn byaleg. Ngim si sala ipapatimi un tumuɏung ti patunged kami mantegod kan chikayu.
23 Lu mipanggop kan Titus, siya biɏunkuʼn tumuɏung si kawachi kan chikayu. Ked lu mipanggop kan cha uchum un susulud taku, chicha pillakalong-eg un libuun kan cha mamati si kaili-ili utla. Ked gapu kan chicha, machaychayaw si Kristu.
24 Ked ipailayu ayatyu kan chicha taplu mapaloklokan cha losan un mamati ked ichaychayawmi mipanggop kan chikayu.