9
Ha Kalobbongan Ya Biyang Cha Apostoles
(2Co. 11:7-11; Php. 4:15-18)
1 Ha chakampun un lawayaak? Sakon si Paul, un osaʼn apostoles Apu takuʼn Jesus, ti illilak siya. Ked chikayuʼn mamati utlat, chikayu bungan chi kawachik kan Apu taku.
2 Ked ulay lu achipulak ibilang un apostoles kan cha uchum un tagu, ibilangak otyan kan chikayu ti ha lamatiyanyu kan siya bungan chi kila-apostolesku.
3 Ked allaya songbyatku kan cha mangim-imus si kila-apostolesku.
4 Ha lappun kamman kalobbongak un mapakalan ya mapailuman gapu si allaʼn kawachik?
5 Ked lappun kamman kalobbongak un mangiyaw-awit kan asawak si losan un ayak, un isun chi mangkokopyan cha uchum un apostoles, ya cha susulud Apu takuʼn Jesus ya si Peter?
6 Willu abus kami kan Bernabe masapuɏʼn mangkawachi un lappun kalobbonganmiʼn maidchen si kasapuɏanmi?
7 Somsomkonyu cha alla, awed kamma illilayu si suɏchachu un siya mamayed si gastuwola si kilasuɏchachula? Willu awed kamma kauuma un mammuɏa ked achipunla kalon chi bungan cha immuɏala? Willu awed kamma mangay-ayyuwan un mipalit un umilum si gatas cha ay-ayyuwalala?
8 Ked chakampun un abus cha alla inyaligku un mambyeseɏan si kamatchi, ti kamatchi bo kalan chi Lintog.
9 Ti liigili si lintog Moses, kalala, “Achiyu bunguton chi tupok chi byaka un man-ilikonyu taplu makwa un mangan lu piola.” Ked abus kamma byaka si pion Apudyus un uguchon si hachiʼn imbyegala?
10 Chakampun, ti chitakuʼn tagu piolaʼn uguchon. Somsomkonyu, ulay cha manchelok willu man-ali, lamlamaonchaʼn awed chi awatonchaʼn buwacha si bungan chi kawachicha.
11 Ked isula bo kan chikami, chikami langimuɏa si ugud Apudyus kan chikayu ta makatagu kayu kan siya, ked chakampun un lawwing lu apitonmi cha kasapuɏanmi un siya ikatagumi si sala.
12 Ta lu kalobbongan cha uchum un langibyegbyega kan chikayu, singkumaɏu bò amin kan chikami?
Ngim achipunmi iluseɏ kalobbonganmi. Ilalu-alusanmi siluʼn ligat taplu lappun malipod si mibyegbyeg-an chi Bibiɏuʼn Chameg mipanggop kan Kristu.
13 Ha achipunyu ammu un cha mangkawachi si templo mampeɏpu si templo kaloncha ya cha mansimsimbi si chachattulan, makabingaycha si losan un maichatun kan Apudyus?
14 Ked isula bo kan cha mangibyegbyega si Bibiɏuʼn Chameg, ti imbilin Apu takuʼn Jesus un lappun uchum si mangeancha si mataguwancha lu achi abus chi kawachicha.
15 Ngim achipunku iluseɏ cha hachiʼn kalobbongak ya achipunku bò isuɏat ta maatod kan sakon cha alla. Un-ulloy chi matoyak lu makaan chi kalobbongak un mangibyegbyega un siya ipaspasweɏk?
16 Ked lappun kalobbongak un mangilastug si mangibyegbyeg-ak si Bibiɏuʼn Chameg, ti piliyeɏla sakon un mangibyegbyega. Ked kadcheguwak lu achipunku ibyegbyega!
17 Lu sakon chi lamili si kawachik, makwa un chawatok chi tangchenku. Ngim gapu ta si Apudyus chi langipiyeɏ kan sakon, kook bo amin un lappun somsomokku un matangchalan.
18 Ked himma tangchenku lù? Siyad tangchenku galasku un mangibyegbyega si Bibiɏuʼn Chameg un libli, achipunku iluseɏ kalobbongak un mangibyegbyega si Bibiɏuʼn Chameg.
19 Ti ulay lu lawayaak un lappun simmusassu kan sakon. Lambyalilok chi long-egku musassun cha losan un tagu taplu achu otyan cha maawisku.
20 Ta lu Judio cha mambyegbyeg-ak, itachunku si kachawiyan cha Judio taplu achu maawisku kan chicha. Ked ulay lu achipunku tuttuwaon chi lintog, tuttuwaok bo taplu maawisku chicha un mamati kan Jesu Kristu.
21 Ked isula bo lu mambyegbyegaak kan cha Gentil, ked iwalinku lintog Moses ta itachunku si kachawiyancha taplu achu bo cha maawisku kan chicha. Ngim achipunku kalan un achipunku tuttuwaon chi lintog Apudyus, ti sissiyan suɏusuɏutok chi lintog Kristu.
22 Isula bo lu byegbyegaak cha lakapsut chi pammaticha, lambyalilak lakapsut un isucha taplu maawisku chicha. Si losan un pamuspusan, itachunku si kachawiyan cha ulay silu kalasichaʼn tagu taplu matagu cha uchum.
23 Kook cha alla losan gapu ta piok un mibyegbyega Bibiɏuʼn Chameg, taplu miitkomak mabinchisyulan.
24 Iyaligku allaʼn lamatiyan taku un todtodchak. Ti ammu taku un lu awed todtodchak, ipapatin cha losan chi kabyeeɏanchaʼn makatodtodchak ta mangɏogcha, ngim ossaan chi mangɏog un magunggulaan. Ked chitakuʼn mamati, kamatchi otyan cha koon taku un mangipapati si pammati taku taplu maaɏa taku gunggula taku.
25 Ngim masapuɏʼn iyagey taku cha losan un mampakapsut si pammati taku, un isun chi mangkokopyan cha pin-a makakunkuntis. Ti chicha, ammancha disiplilaon ya ileɏam chi long-egcha ti pionchaʼn maaɏa gunggula. Ngim ha gunggula un maaɏacha, mallasu mayam-alala. Ngim chitakuʼn mamati, sabyali maaɏa taku ti mallalayun un gunggula.
26 Ked ha kook, sosomkok kan ipapuutku ta mangɏogak un isun chi makatodtodchak. Ya isuk bo osaʼn makasansantuk un tatanchaalak ta achi mikawas chi santukku.
27 Ked ha kook bo, iyaattomku cha pion chi long-egku ti chakampun un hachi cha potgok, ta lu mambyegbyegaak kan cha uchum si mataguwancha, achipulak miwalin.