12
Ha Mangkangkalasin Kabyeeɏan Un Idchon Chi Ispiritun Apudyus
(Rom. 12:6-8; Eph. 4:11-15)
1 Ked si sala, susulud, piok un ipakaawat kan chikayu mipanggop si mangkangkalasi un kabyeeɏan un idchon chi Ispiritun Apudyus kan chitaku, ta maawatanyu otyan.
2 Ti ammuyu mit un ha chaampunyu mamatiyan, latuntulliyan kayu ti chilaychayawyu cha hachiʼn silan-apudyus un lappun angoscha, ked laawis kayu kan chicha.
3 Ngim si salaʼn lamatiyanyu kan Jesu Kristu, sabyali. Ked masapuɏʼn maawatanyu un ha taguʼn laidchen si Ispiritun Apudyus, achipunla eɏwagen si Jesus. Ya lappun tagu si mangibyega un si Jesus chi umapuwala lu achipun chi Ispiritun Apudyus ipaspasmok kan siya.
4 Ulay langkangkalasi maatod kan chitaku un kabyeeɏan, ossaan chi leɏpuwancha un ha Ispiritun Apudyus.
5 Ya ulay lu langkangkalasi in-ilon taku un mansimbi kan Apudyus, ossaan bo mansimbiyan taku losan, siya si Apu Jesu Kristu.
6 Ya ulay langkangkalasi bo kabyeeɏan un mangwa si pion Apudyus, ossaan bo mangatod si koscheɏn cha losan un tagu, siya si Apudyus.
7 Kacha osa kan chitakuʼn mamati laidchen si kabyeeɏan un mangipaila si kilaawed chi Ispiritu kan chitaku ta mauseɏʼn bumaɏuwan.
8 Ti cha uchum un mamati, illidchen chi Ispiritun Apudyus chicha si laing un mangibyegbyega si ugud Apudyus. Ked cha uchum, laidchencha bo si laing un mangawat si ugud Apudyus.
9 Ked awed bo cha uchum un laidchen si mangkoscheɏʼn pammati, ha Ispiritu langatod. Ked cha uchum, laidchencha si kabyeeɏan un mampalin-awa kan cha masakit.
10 Ked cha uchum, illidchen chi Ispiritun Apudyus chicha si kabyeeɏan un mangwa si kaskaschaaw. Ked cha uchum, laidchencha si kabyeeɏan un mangipakaammu si pion Apudyus un ipatigammu. Ya awed bo cha uchum un laidchen si kabyeeɏan un mangilasin lu si Apudyus chi leɏpuwan chi kabyeeɏan willu ha aɏan chi leɏpuwala. Ked cha uchum illidchen bo chi Ispiritun Apudyus chicha si kabyeeɏan un makaibyalikas si sabyali un ugud un achipuncha maawatan. Ked laidchen bo cha uchum si kabyeeɏan un mangipakaawat lu silu piolaʼn uguchon cha katchiʼn ugud.
11 Losan cha katchi un kabyeeɏan, lappun sabyali un lampeɏpuwancha lu achi abus chi Ispiritun Apudyus. Illidchela kacha osaʼn lamati lu silu piolaʼn idchon kan chicha.
Ulay Langkangkalasi Partin Chi Long-eg, Ossaan Mit Laing
(Rom. 12:4-6; Eph. 4:11-16)
12 Ha long-eg takuʼn tagu, achu partila ngim ossaan un long-eg. Siya isun Kristu ya cha mamati kan siya.
13 Ti chitaku losan, cha Judio man willu cha Gentil, cha musassu man willu cha chakampun, libunyeg kan chitaku losan un long-eg Kristu chi ossaan un Ispiritun Apudyus. Ked ha Ispiritun Apudyus iinggew si kacha osa kan chitaku.
14 Somsomkon taku long-eg taku un chakampun un ossaan chi partila ngim achu.
15 Ked lu awatlaʼn kalan chi iki, “Gapu ta achipulak makakopya si koon chi ima, chakampun un ustuwak un partin chi long-eg.” Ngim makwa kamma katchi? Lai, ti ulay achipun makakopya iki si koon ima, masapuɏn chi long-eg chi iki.
16 Ked lu kalan bo chi inga, “Gapu ta achipulak makaitullong, chakampun un ustuwak un partin chi long-eg.” Ngim chakampun kamman un masapuɏn chi long-eg chi inga? Masasapuɏla.
17 Ta lu awatlaʼn losan ata long-eg, himma manchongeɏ kan cha mibyega lù? Ked lu losan bò inga, himma mansungsung lù?
18 Ngim bibiɏu ta killingwan Apudyus cha losan un partin chi long-eg, insigun si piola.
19 Ta lu ossaan chi partin chi long-eg, himma in-ilolaʼn makwa un long-eg?
20 Ngim ha katuttuwaala achu cha partila, ngim ossaan un long-eg.
21 Ked achipun makwa un ibyegan chi ata un achipunla masapuɏ tuɏung ima, ti masapuɏla mit laing! Ya ulay bo uɏu, achipun bo makwa un ibyegalaʼn achipunla masapuɏ si iki, ti masapuɏla mit laing!
22 Ti cha partin chi long-eg un ibilang taku un lakapkapsut lu cha uchum, ked chicha bo patunged taku masasapuɏ.
23 Ked cha allaʼn partin chi long-eg un ibilang takuʼn achipun lapotog ya cha achipun otyan maila, chicha mit gey bo patunged taku leleman ya silupan ta matap-ulan.
24 Ngim cha partin chi long-eg un bibiɏu un maila, achipun taku mit tap-ulan ti achipun masapuɏ. Lantitipugon Apudyus cha losan un partin chi long-eg taplu cha achipun lapotog, chicha patungedla paleɏam.
25 Kamatchi killingwan Apudyus ta mantitimpuyug cha losan un partin chi long-eg taplu man-asileɏamcha.
26 Ked lu mapaligatan chi osaʼn partin chi long-eg, mapaligatan cha bo losan. Ked lu machayaw chi osaʼn partin chi long-eg, makatetteɏokcha losan kan siya.
27 Ked chitakuʼn mamati isun chi long-eg Kristu ked kacha osa kan chitaku partila.
28 Ked lantitimpuyugon Apudyus chitakuʼn ossaan un long-eg un langkangkalasi impabiyangla kan chitaku. Cha ummulaʼn chilutukala, cha allaʼn lan-apostolesla. Ked cha mikadwa, cha allaʼn propeta, ked cha mikatlu, cha mimistulu. Ya awed cha laidchen si kabyeeɏan un mangwa si kaskaschaaw, ya awed cha laidchen si kabyeeɏan un mampalin-awa kan cha masakit. Ya awed cha uchum un laidchen si kabyeeɏan un tumuɏutuɏung, ya awed cha uchum un laidchen si kabyeeɏan un mangipangpangu kan cha mamati, ya awed bo cha laidchen si kabyeeɏan un man-ugud si mansabsabyaliʼn ugud.
29 Ked chakampun un apostoles cha losan un mamati, chakampun un losan cha propeta willu mimistulu. Ya chakampun bo un losan cha mamati awed kabyeeɏancha un mangwa si kaskaschaaw,
30 willu mampalin-awa kan cha masakit ya ulay chi man-ugud si mansabsabyaliʼn ugud, willu mangipakaawat si hachiʼn ugud.
31 Ked kacha osa singtola otyan cha losan un lapotog un kabyeeɏan un idchon chi Ispiritun Apudyus kan chitaku.
Ngim awed bo osaʼn ibyegak un lapotpotog ya labibbiɏu lu cha hachiʼn uchum, ha ayat siya pionyu otyan.