23
1 Intutukkeɏn Paul chicha ot kalala, “Susulud, ammun Apudyus un mampeɏkas chi somsomokku mipanggop si in-ilok un lansimbi kan siya malipud si chamu inggala si salaʼn eɏgew.”
2 Imbyegala pu hachi, imbyegan Ananias un kangatuwan un pachi kan cha liyaadchali kan Paul ta tippaponcha tupokla.
3 Ot kalan Paul kan siya, “Agin-agin kan kuis, asin Apudyus sika tippapon! Miyaligka si chingching un lapuntuɏan si mamputilak. Umaammuyka utlat un manguis kan sakon un mibyaseɏ si lintog taku, ngim sika mismu lalupling si lintog ti imbilinlun tippapon cha sakon.”
4 Ot kalan cha liyaadchali kan Paul, “Puggey pabiilan chi kangatuwan un pachin Apudyus?”
5 Ot kalan Paul un summongbyat, “Susulud, achipunku ammu un kangatuwan un pachi siya, lu ammuk achipunku pilabiilan, ti awed chi liigili si ugud Apudyus un kalala, ‘Achiyu man-ugu-uguchen si lawwing chi pangat si iliyu.’ ”
6 Laammuwan pun Paul un lagodwa cha papangat, cha uchum Saduceo ked cha uchum Pariseo, lan-ichakeɏla gingala un kalala, “Susulud, Pariseowak ya alak chi osaʼn Pariseo. Siyad lichiɏumak si salaʼn eɏgew gapu ta lamlamaok un matagu kasin cha latoy!”
7 Imbyegala pu hachi, illugin cha Pariseo kan cha Saduceo un lansisillongbyat, ot lagodwacha.
8 Achipun cha Saduceo mamati un umuli matagu cha latoy. Achipuncha bo mamati un awed anghel ya kalichodwa. Ngim cha Pariseo, mamaticha losan kan cha alla.
9 Oli pun ngummoyacha. Ot cha uchum un Pariseo un mimistulun chi lintog, summikedchaʼn langipatut si kasomsomkancha, ot kalancha, “Lappun mit inchesanmi si byasuɏn chi taguʼn alla. Lakaug-uggud lin chi osaʼn ispiritu willu anghel kan siya.”
10 Laam-amod chi sillongbyatcha ot lachalagen chi komander pakalawa ta mambilbillatancha si Paul. Ot imbilinla kan cha suɏchachulaʼn umoycha aɏan si Paul kan chicha ked inyoycha siya ud kampu.
11 Si hachiʼn labi lampaila si Apu Jesus kan Paul ot kalala, “Pakoscheɏom chi somsomoklu, ti masapuɏʼn sika mantistigu mipanggop kan sakon ud Rome un isun chi killingwam utla Jerusalem.”
Lantutuɏeg Cha Judio Un Mamatoy Kan Paul
12-13 Labigat pun, inggew cha lasuɏuk si opat puɏuʼn Judio un lantutuɏeg un mamatoy kan Paul. Insapatacha losan un achipuncha teɏon mangan ya umilum inggala mapatoycha siya.
14 Ot ummoycha kan cha ap-apun cha papachi ya cha pallakayon cha Judio ot kalancha, “Insapatami un achipun kami mangan inggala otoyonmi si Paul.
15 Si sala chikayu ya cha kukunsiseɏ, mangibuun kayu si umoy mangibyega si komander ta igetongla si Paul utla, ta isun chi imbistigeɏonyu un ustu-ustu chi kasusla. Ked isalobmi si chaɏan ta otoyonmi siya sakbyey un gumatong utla.”
16 Ngim chingngeɏn chi amulakon Paul chi mipanggop si hachiʼn lantutuɏagencha ot ummoy si kampun cha susuɏchachu ot imbyegala kan Paul.
17 Ot ilayagen Paul chi osaʼn kapitan ot kalala, “Kewam ta iyoylu yan chi allaʼn bumaru kan komander, ti awed chi ibyegala kan siya.”
18 Ot illiyoy chi kapitan siya kan komander ot kalala, “Ilayagen Paul un byaɏud sakon ot imbyegala un igetongku bumaruʼn alla kan sika, ti awed chi piolaʼn ibyega kan sika.”
19 Ot kiliwid chi komander hachiʼn bumaru ot ummoyla intalin ot ilimusla, “Simma piom un ibyega kan sakon?”
20 Ot kalan chi bumaru, “Lantutuɏagen cha papangat cha Judio un chawatoncha kan sika ta iyoylu si Paul lu bigat udchi mammimitingancha, ta isun chi imbistigeɏoncha un ustu-ustu kasusla.
21 Ngim achim tuttuwaon, ti lasuɏuk si opat puɏun lelleɏaki cha mangisalob kan siya. Lansapatacha losan un achipuncha mangan ya umilum inggala patoyoncha si Paul. Lakasagalacha ked uuwayoncha ibilinlu.”
22 Ot pilaoyon chi komander siya ya bililinla un, “Achim pay ibyegbyega ulay siluʼn tagu un ummoylu imbyega kan sakon.”
Intallaycha Si Paul Ud Caesarea
23 Oli pun ilayagen chi komander cha chuwaʼn kapitan ot kalala kan chicha, “Umisagala kayu si chuwaʼn gasut un suɏchachu ya chuwaʼn gasut un mantutubyey ya pitumpuɏuʼn mangabyayu ta ingkayu itiɏud si Paul ud Caesarea. Ingkayu lu labi lu masuyop cha tagu.
24 Idchenyu bo si Paul si mangabyayuwala ked ammanyu siya itiɏud ta lappun makwa kan siya inggala gumatong kayu kan Gubillachuɏ Felix.”
25 Ot laluɏat si komander un kalala,
26 “Apu Gubillachuɏ Felix, sakon si Claudius Lysias chi allaʼn maluɏat kan sika. Kumustaka.
27 Ha allaʼn leɏaki un impaitiɏudku kan sika ked chilokmaan cha Judio ot amas cha otoyon siya. Ngim laammuwak pun un osaʼn Romano, ummoymi silaɏaklibyen siya kan cha susuɏchachuk.
28 Piok un ammuwon lu silu ipabyasuɏcha kan siya, ot illiyoyku siya kan cha papangatcha.
29 Ot laammuwak un lappun lakabyasuɏala un umalay si matoyala willu mabyaɏuchela, ti ha ipabyasuɏcha mipanggop abus si lintogcha.
30 Inggew pu langibyega kan sakon un lantutuɏagen cha Judio un otoyon si Paul, kakmak imbuun siya kan sika. Imbyegak bo kan cha langichiɏum kan siya un umoycha ichateg chi chiɏumcha kan sika.” Hachi losan.
31 Si hachiʼn labi, tiluttuwan cha susuɏchachu cha imbilin chi komandercha, ot intiɏudcha si Paul inggalaʼd Antipatris.
32 Labigat pun, langulin cha susuɏchachuʼn lalidtidchaɏan si kampucha ud Jerusalem ot cha langakabbyayu intuɏuycha intiɏud si Paul.
33 Gummatong cha pun ud Caesarea, illidchoncha suɏat kan Gubillachuɏ Felix ot impuɏangcha si Paul kan siya.
34 Bilasan ked chi Gubillachuɏ suɏat, ilimusla kan Paul lu silu probinsiya un lampeɏpuwala. Ot laammuwala pun un iCilicia,
35 kalala, “Asik sika imbistigeɏon lu umali cha mangichiɏum kan sika.” Oli pun imbilinla un achugen cha susuɏchachu si Paul ud byeɏoyla un impapaud Ari Herod.