19
Ha Illinggewan Paul Ud Ephesus
1 Si illinggewan Apollos ud Corinth, ummoy si Paul ud Ephesus un lampeɏpuʼd Frigia un lalidtidchaɏan langoy si bibbilig. Gummatong pun udchi, inchesala cha uchum un mamati.
2 Ot ilimusla kan chicha, “Ha ilawatyu kamma Ispiritun Apudyus si lamatiyanyu?”
Kalancha, “Lai, lappun chingchingngeɏmi un awed Ispiritun Apudyus.”
3 Ot ilimus Paul, “Simma tudtuchu un siluɏutyu si labunyagen kayu?”
Kalancha, “Ha tudtuchun mipanggop si bunyeg un insuɏun John.”
4 Oli pun kalan Paul, “Ha bunyeg un intudtuchun John ked mipanggop si mambyabyawiyan cha tagu kan cha byasuɏcha. Ngim imbyegala bo kan cha tagu un mamaticha si misagsagulud kan siya un si Jesus.”
5 Chingngeɏcha pu hachi, lampabunyegcha kasin ta ipakaammucha un si Jesus chi Apucha.
6 Impatay pun Paul chi imala kan chicha, ummoy chi Ispiritun Apudyus kan chicha ot lan-ugudcha si sabyaliʼn ugud ya impakaammucha ugud Apudyus.
7 Umoy un lasawaɏan si chuwaʼn lelleɏaki.
8 Lilumlok si Paul si sinagogan cha Judio ot lateɏod un pin-a langibyegbyega si ugud Apudyus si tiɏun buɏan. Lateɏod un lakasongsongbyat ya langawis kan cha tagu mipanggop si Mampangatan Apudyus ta mamaticha.
9 Ngim mangkatangkin cha uchum ot achipuncha lamati. Lan-ugu-uguchencha si lawwik cha pammatin cha kristiano kan cha kadwacha si sangwalan cha grupu. Ot tilelan Paul chicha ot intallayla cha mamati ot ummoycha si iswilaan Tyrannus. Ot ileɏgew un man-iillacheɏcha.
10 Lantuytuɏuy alla si chuwaʼn tawon. Ot losan cha taguʼn inggew si probinsiyan chi Asia, Judio man kan Gentil, chingngeɏcha ugud Apudyus mipanggop kan Apu Jesus.
Cha Aalak Sceva
11 Achu-achu cha lakaskaschaaw un killingwan Apudyus gapu kan Paul.
12 Ti ulay chi panyu ya luput un pin-an Paul iluseɏ, lu iyoycha kan cha lasakit willu laaɏan, ked lummin-awacha ya telan cha aɏan chicha.
13 Ngim inggew cha uchum un Judio un pin-a umoy manliklikwos un mampeɏyaw kan cha aɏan, ot pilachascha iluseɏ chi ngachen Apu Jesus. Ha pin-acha koon, kalancha, “Sikan aɏan, gapu si kilabyelin chi ngachen Jesus un pin-an Paul ibyegbyega, ibyegak un lumawaka kan siya.”
14 Cha pin-a mangwa si katchi ked cha pituʼn lelleɏakiʼn alak Sceva un osaʼn ap-apun cha papachin cha Judio.
15 Osaʼn eɏgew summongbyat chi aɏan kan chicha un kalala, “Ammuk si Jesus ya ammuk bo si Paul, ngim chikayu ngay, silu kayu?”
16 Ot lawalaswas chi leɏakiʼn laaɏan kan chicha ot patunged lakatiliw kan chicha inggala laabyakcha losan. Ot ummawidcha un simpapatiwayway ya lasugasugat.
17 Laammuwan pun cha losan un taguʼd Ephesus, Judio man ya cha Gentil, laam-amodcha ummogyat ot chilayawcha ngachen Apu Jesus.
18 Achu cha mamatiʼn ummoy langipudlu ya langipakaammu un lambyabyawicha si lawwing un pin-acha killingwa si sangwalan cha tagu.
19 Ot chilagup cha uchum un pin-a mansalsalamangka liblucha ot singgobcha si sangwalan cha tagu. Ha gated chi liblucha ked umoy un limampuɏun libun pilak.
20 Ot gapu si hachiʼn laklakwa, lanchinchilameg chi ugud Apudyus mipanggop kan Apu Jesus ya ummachu-achu cha lamati kan siya.
Ha Gulu Ud Ephesus
21 Lagamput pu hachiʼn lakwa, simsimmok Paul un mangoy si probinsiyan chi Macedonia ya Achaia asi ot umoy ud Jerusalem. Kalala, “Lu magamputak umoy udchi, masapuɏʼn inyak bo ud Rome.”
22 Ot pilaulalaʼd Macedonia cha Timothy kan Erastus un chuwaʼn pin-a tumuɏung kan siya, ngim illinggew siya si sin-akitan ud probinsiyan chi Asia un awechen Ephesus.
23 Si hachiʼn timpu inggew chi kaog-ogyat un gulu ud Ephesus mipanggop si pammatin chi kristiano.
24 Ti inggew chi osaʼn leɏaki un mangngachen Demetrius un osaʼn mamboboseɏ si palata, pin-a mangwa si silan-templon Artemis un apudyuscha. Ked amod chi galansiyacha un maaɏan cha mamboboseɏola.
25 Chilagup Demetrius cha losan un mamboboseɏola ya cha uchum un mamboboseɏ ot kalala kan chicha, “Kakadwa, ammuyu un ha allaʼn kawachi taku siya bummaklangan taku.
26 Intutullong taku ya chingchingngeɏ taku pin-ala itudtuchu kan cha achuʼn tagu. Ibyegbyegalaʼn chakampun un tuttuwaʼn apudyus cha pin-an chi tagu koon. Ked achu cha ilawislaʼn tagu un lamati utla Ephesus ya allà akit un losan cha ili si probinsiyan chi Asia.
27 Lu lawwik chi chameg chi kawachi taku, si umaliʼn eɏgew lappun mangngila. Chakampun un abus chi hachi, ngim mambyalin lappun simbin chi allaʼn templon chi apudyus takuʼn Artemis. Ked mayam-an bo potogla un siya pin-an cha tagu chaychayawon si kaili-ili si probinsiyan chi Asia ya losan un lubung!”
28 Chingngeɏn pun cha tagu hachi, amod chi silangacha kan Paul ya cha kadwala, ot lanchichisaloncha lampakuy un kalancha, “Machayaw si Artemis un apudyus taku utla Ephesus!”
29 Achipun labyeyeg lagulu cha losan un umili ot sintotodchakchaʼn ummoy si palasa ot chilokmaancha cha Gaius kan Aristarchus un kadwan Paul un iMacedonia.
30 Pion Paul un umoy si sangwalan cha amod un tagu ngim achipun cha mamati impalubus.
31 Inggew bo cha uchum un pangat si hachiʼn probinsiya un gagayyom Paul, langibuuncha si ummoy langibyega kan siya ta mampakpakaasicha ta achipun siya mampappaila kan cha tagu si palasa.
32 Oli pun, amod cha atingeɏ un lappun kapuutan chi ipakupakuycha, ti lagulu cha tagun lachagup ked kaachuwan kan chicha lappun ammucha lu pachaggey langgetgetong.
33 Ot inchulun cha Judio si Alexander si sangwalan cha amod un tagu ta ipakaawatla kan chicha, ti ummogyatcha lu pabyasuɏon cha amod un tagu chicha. Intayeg Alexander chi imala ta pagingkola cha tagu ta man-ugud si malakcheɏala.
34 Ngim immatulan pun cha tagu un Judio siya, lanchichisaloncha impakupakuy si chuwaʼn uras un kalancha, “Machaychayaw si Artemis un apudyus taku utla Ephesus.”
35 Ot lampaila chi iskubentiʼn chi siudad. Pilagilokla ked chicha, kalala, “Susulud un iyEphesus, ammu taku losan un ha siudad ud Ephesus chi mangay-ayyuwan si templon chi machaychayaw un Artemis ya ha byetuʼn laodcheg un lampeɏpuʼd langit.
36 Lappun makwaʼn makaibyega un chakampun un tuttuwa alla. Ked gumilok taku ya achi taku mangkamukamu.
37 Cha taguʼn inggetongyu utla, lappun ilakawcha si templo taku ya lappun bo imbyegbyegacha si lawwing mipanggop si apudyus taku.
38 Lu si Demetrius ya cha kadwalaʼn mamboboseɏ, lu awed ipabyasuɏyu si osaʼn tagu, awed cha kuis ya cha pangat chi ili si opisilacha. Udchi masapuɏʼn ayanyuʼn manchiɏuman.
39 Ngim lu awed sabyali un masapuɏyu, masapuɏʼn uwayonyu ta man-uuguchenmi si ustuʼn mammimitinganmi.
40 Ti machalagelak lu ichiɏumcha chitaku kan cha papangat taku ud Rome gapu si allaʼn gulu si salaʼn eɏgew. Ked simman li ilasun taku ti lappun ustù bibiɏuʼn mallasun taku.”
41 Lagamputla pun imbyega hachi, pilaoyonla cha tagu.