Ha Ugud Apudyus Acts 11

Ha Imbyegan Peter Kan Cha Mamatiʼd Jerusalem

1 Chingngeɏn cha apostoles ya cha mamati si intilun chi Judea un lamati bo cha Gentil si ugud Apudyus. 2 Langulin pun si Peter ud Jerusalem, ilam-amsiw cha grupun cha Judioʼn mamati si sogyat. 3 Kalancha, “Ummoyka impamangili kan cha Gentil ya lakakanka bo kan chicha!”

4 Oli pun ilug-uggud Peter kan chicha cha losan un lakwa malipud lugila. 5 Kalala, “Inggewak ud Joppa un malluluwalu ot inggew chi impain-ilop Apudyus impaila kan sakon. Intullongku isun chi ewaʼn luput un labubukyed lipacheɏaʼn lampeɏpuʼd langit un latatakkod chi mampasiigid ot libyelat si sangwalak. 6 Ammak pun intullong chi chaɏomla, inggew cha mangkangkalasin alimeɏ, laamu ya laatap, mangkadkachap ya achuʼn kalasin tumattayap. 7 Oli pun chingngeɏk chi ginga un kalala, ‘Peter, Lumibbyatka ya peɏtiyom chi piom un kalon!’ 8 Ngim kalak, ‘Lai Apu, ti lappun kilkillankù ibilangmiʼn Judio un kiisaw.’

9 “Chingngeɏk kasin chi ginga un lampeɏpuʼd langit un kalala, ‘Achim ibilang un kiisaw cha makan un pileɏkas Apudyus.’ 10 Lamitlu lakwa chi alla ot lipangatuʼd langit chi luput.

11 “Si hachi met laing gummatong cha tiɏuʼn leɏaki si byeɏoy un illinggewak. Libuuncha un lampeɏpuʼd Caesarea un umoy mangayeg kan sakon. 12 Ot imbyegan chi Ispiritun Apudyus kan sakon un mitun-uchak kan chicha un achipulak manchuwachuwa. Kiladwaalak kan cha olom un mamatiʼn iJoppa ot ummoy kami ud Caesarea. Gummatong kami pun udchi, lilumlok kami ud byeɏoy cha Cornelius. 13 Ot imbyegala kan chikami lampain-an chi anghel kan siya ud uwacha ya imbyegan chi anghel kan siya un kalala, ‘Mangibuunka si umoy ud Joppa mangayeg si taguʼn mangngachen Simon Peter. 14 Siya mangibyega kan sika si ugud Apudyus un tumagu kan sika ya cha kabyeɏoylu.’ 15 Ot lugiyak pun un man-ugud, ummoy chi Ispiritun Apudyus kan chicha un isun chi ummoyala kan chitaku si chamu. 16 Oli pun ingkagasmokku imbyegan chi Apu, ‘Bilunyagen John chikayu si chelum, ngim mabunyagen kayu si Ispiritun Apudyus.’ 17 Lu illidchon Apudyus chi Ispiritula kan cha Gentil un isun chi langidchela kan chitaku si lamatiyan taku kan Apu Jesu Kristu, siluwak man un mangipalit kan Apudyus un achipunla koon katchi?”

18 Ot chingngeɏcha pu hachi, inyageycha un langam-amsiw kan siya ot chilaychayawcha si Apudyus un kalancha, “Illidchen bo Apudyus cha Gentil si wayachan mambyabyawi ta maidchencha si biyeg un mallalayun.”

Cha Mamatiʼd Antioch

19 Inggan chi lamatoyancha kan Stephen, lapalpaligatan cha mamati ot liwatawatakcha. Cha uchum ummoycha inggalaʼd Phoenicia, Cyprus ya Antioch. Ot imbyegbyegacha ugud Apudyus kan cha Judio abus. 20 Ngim cha uchum un mamatiʼn iCyprus ya iCyrene ummoychaʼd Antioch. Ot imbyegbyegacha bibiɏuʼn chameg mipanggop kan Apu Jesus kan cha Gentil. 21 Gapu ta inggew chi kilabyelin Apudyus kan chicha un mambyegbyega, achu-achu cha taguʼn lansagung kan Apu Jesus ya lamati.

22 Chingngeɏn pun cha mamatiʼd Jerusalem chi chameg un lamati cha Gentil ud Antioch, imbuuncha si Barnabas ud Antioch. 23 Gummatong pun udchi, intullongla un kilacheguwan Apudyus chicha, lagalasan ot silegegla chicha ta ipapaticha pammaticha kan Apu Jesus. 24 Ti bibiɏuʼn tagu si Barnabas ya inggew chi kilabyelin chi Ispiritun Apudyus kan siya ya lapigsa pammatila. Si hachi ummachu-achu cha laawisla un lipati kan Apu Jesus.

25 Oli pun ummoy Barnabas singngit si Saul ud Tarsus. 26 Inchesala pun, ilawitla siyaʼd Antioch. Ot sintawon chi illiinggewancha udchi, litipugcha kan cha mamati. Ot tiludtuchuwancha cha achu-achuʼn tagu udchi. Cha mamatiʼd Antioch, chicha ummulaʼn langachalan un Kristianu.

27 Si hachiʼn timpu, lan-osog cha uchum un propeta ud Antioch un lampeɏpuʼd Jerusalem. 28 Ha osa kan chicha mangngachen Agabus. Summiked siya ot gapu si kilabyelin chi Ispiritun Apudyus impadtula un umali amod un uɏat si achuʼn ili utla pita. (Ot latungpeɏ alla si timpun chi lanturayan Emperador Claudius.) 29 Ot cha mamatiʼd Antioch, lantutuɏegchaʼn mangipaw-itcha si tuɏungcha kan cha susuludcha si pammati un inggew ud Judea. Kacha osa langatod sigun si kabyeeɏala un idchon. 30 Killingwacha ot impaw-itcha kan cha Barnabas kan Saul ta iyoycha kan cha pallakayon cha mamati udchi.