3
1 Kun ak mam ay Gor niŋek tep gip gok. Jiysis bi Gor nup simboŋgep yomb yimb chin ak nup gosimb niŋyiŋg, Gor nup kisen gipun ak, nuk Bi yerip rek ak niŋrep ginjun.
2 Pen nimb gunap aŋgniŋgambim “Basind yes chin Mosis biyomb yimb; Jiysis bi yikop rek ayip aŋgniŋgambim.” Pen Jiysis nup gos kun ak rek ma niŋnimimb.
3 Gor Mosis nup, Ñinuk nup yimb dand ar biyoŋ aranak rek; ma gak. Bi korip gipay gok yimb dand aranbay ak pen; korip gipay gok tap yikop; yimb ma mindip. Kun ak rek, Jiysis Bi yimb sek, Mosis beŋ nup okok mindip.
4 Korip tap gok biynimb gaypay ak pen; Gor tap okok maŋgiysek alwol gayak.
5 Pen niŋind: Mosis Gor biynimb nuk namb ak woŋg giñirep giyiŋg, Gor chinup kisen giniŋgamb rek, minim tep gunap aŋgñak.
6 Pen Krays Gor Ñinuk yipund giy ak mey; chinup Gor kiñiŋ nuk mindpun gok, bi korip nop nimb rek, kond mindrep gip. Nup chiŋgiy nep mindon mey, andkind apek, biynimb nuk nep mindoniŋgambun.
7 Kun ak Gor Kawnan aŋgak rek niŋjun. Nuk aŋgak:
“Ñin biy minim yip ak aŋgey niŋiy, niŋdinimimb.
8-9 Nasind napis sikop wosrey, simiy ñin jiwiy omiŋal miñmon nep namb okok mindey, kuyip tap mageprek gok giyiŋg, kond mindenik ak pen; minim yip ak ma niŋiy, gos kiyk keynep niŋiy gey amyiŋgip.
10-11 Kun gey, yip yiruk yimb gek aŋgnik, ‘Per minim yip ak ma niŋdiy kun gipay ak, yand yip mindiy, añiŋ ay mindrep giniŋgiy aŋgnik ak, ma diniŋgambay. Pisnep mer aspiyn aŋgak!”
12-13 Kun ak mam ay sikop. Gor minim ak kirgiy, gos nimb key niŋnimimb rek ayip ak, niŋrep ginimimb. Miñiy Gor minim niŋep ñin biy, namam nanay gok yip, minim tep ak minek minek aŋg amiy apiy giyiŋg, mindrep ginimimb. Mer ak, Gor nup minim ak kirgiy, gos yesek ar ak apek niŋdand amiy, apyap pikniŋgambun.
14 Pen Krays minim nind niŋiy aŋgñinik ak, niŋyiŋg nep mindiy mey, biynimb nuk yimb mindoniŋgambun.
15 Baybol buk ak tikiy aŋgyak:
“Miñiy Gor minim nup ak niŋiy, yiruk ma niŋnimimb. Wosrey minim nup niŋiy diyokpik rek, ma ginimimb aŋgyak.”
16 Biynimb an Gor nup minim ak niŋiy, ma niŋjun aŋgyak? Mey Yisrel biynimb; Mosis Yijip nimb dand awak gok maŋgiysek.
17 Pen biynimb an simiy ñin jiwiy ñin jiwiy Gor minim ak ma niŋey, kuyip niŋek tep ma gak? Mey Yisrel biynimb; tap siy tap timey giy, miñmon nep namb okok taŋg taŋg, tokiy ay kumyak gok nep.
18 Gor biynimb minim kilis aŋgiy, ap yand yip ma mindeniŋgambay aŋgak gok an? Mey biynimb minim nup ma niŋniŋgambun aŋgyak gok nep.
19 Kun ak niŋbun: nup gosimb ma niŋiy, nup ma chiŋgyak rek, am nuk yip mindrep giniŋgiy rek ma ayak.