2 Tessalonika
Nalob̃ulat napisulan na-vǝha-ru-an aPol totosi van hǝn alat a Tessalonika
Ase itos nalob̃ulat napisulan egai?
APol itosi.
Itos nalob̃ulat napisulan egai hǝn nǝsa?
Itosi hǝn b̃ikel mai alat siYesu len naut a Tessalonika ke leum tidaŋ siYesu van vǝbar natǝlmaman san. Ikel nalǝlǝgauan mai galito ke salesǝsǝloŋ hǝn ahai p̃usan gǝgǝras gail.
Itos nalob̃ulat egai m̃os ase?
Nalob̃ulat egai evi napisulan aPol totosi van hǝn alat siYesu len naut a Tessalonika.
APol itos nalob̃ulat egai ŋais mai len naut a be?
APol itosi pǝpadaŋ hǝn nasihau A.D. 52 nǝboŋ totoh len naut a Korint.
1) Na-ke-ivoi-an (1.1-2)
2) Nasipaan mai na-sor-tuṽ-an ke aGot dereh tisab̃ mǝttonor hǝn nǝsa toutaut hǝni m̃os gamito (1.3-12)
3) Mǝtedǝlom tabtab hǝn nap̃usanan sinamito. Samtinau masuṽ hǝn napisulan ideh toke Nǝboŋ siNasub̃ togǝm tia, nǝlomit satetuhatuh hǝni (2.1-17)
4) Mitisor tuṽ ke tisob̃ur am ledǝlom napisulan husur Nasub̃ aYesu. Mǝtolǝboi mǝtb̃eil gǝgat len Nasub̃. Dereh tihavhav gol gamito dan atenan tosa vǝsa (3.1-5)
5) Namtukele hǝn gamit ke, mǝtebulatut dan nǝbathudud nadǝlomian ideh tomǝtahun nauman (3.6-15)
6) Nǝ-maris-kotovi-an (3.16-18)
1
Na-ke-ivoi-an
1 Ginau aPol mai aSilas mai aTimoti, namtutos nalob̃ulat napisulan egai. Namtutosi van hǝn alat siYesu len naut a Tessalonika, gamit mǝttovi siGot aTǝmadato mai Nasub̃ aYesu Kristo.
2 AGot aTǝmadato mai Nasub̃ aYesu Kristo areviol kǝmas hǝn navoian mai gamito, mai arigol nǝlomit tikad natǝm̃at tabtab!
Nasipaan
3 Bathudud nadǝlomian, namtimassipa akis vi tǝban aGot m̃os gamito. Inor hǝn namtb̃esipa vi tǝban husur nadǝlomian samit evivi mǝhat masuṽ, mai na-lǝmas-buni-an samit ṽisusua van hǝn gamit gabag, etibtibau am.
4 Imaienan namtusor patpat gamit mǝhat van hǝn alat siYesu lotolotu hǝn aGot len naut tiltile gail. Namtukel mai galito ke mǝtoil gǝgat mai mǝtudaŋ len nadǝlomian samito, naut kǝmas nǝvanuan gail lotomǝdas tabtab hǝn gamito, gol na-lǝŋon-isa-vǝsa-an len gamito.
Naut kǝmas na-lǝŋon-isa-vǝsa-an samito namtuke mǝtelǝŋon tivoi am len nǝlomito
5-6 Be len natgalenan aGot dereh tigol nanoran san tip̃arp̃ar, husur dereh tigol gamit mitinor hǝn mǝtb̃itoh len natohan pipihabǝlan mǝttolǝŋon tosa vǝsa m̃osi. Ale len nanoran san, dereh aGot tipansem alat lotomǝdas bun gamito.
7 Ale gamit mǝttolǝŋon tosa vǝsa husur lotomǝdas bun gamito, aGot dereh tigol mitiŋavŋav mai ginamito, len nǝboŋ Nasub̃, aYesu b̃egǝm len nǝmav. Dereh tegǝm mai aŋel san gail lotodaŋ
8 mai nǝhab towunwun, hǝn b̃ilav nǝpanismen mai alat lǝsalǝboi aGot mai alat lǝsagol nǝsa na-kel-uri-an tovoi husur aMasta sidato, aYesu tokele.
9 Dereh lipanis hǝn na-mǝdas-buni-an topat vi sutuai. Nǝpanismen enan dereh tepǝpehun galit vi tut dan Nasub̃ mai nǝyalyalan hǝn nǝdaŋan san vi sutuai.
10 Nasub̃ aYesu dereh tigol natenan nǝboŋ b̃egǝmai, hǝn nǝvanuan san gail lǝb̃isal suh nǝyalyalan san mai alat lotoriŋ nǝlolit lan tia lǝb̃imaŋmaŋ lan. Ale len nǝboŋ enan gamit am mǝteputsan nahǝsan ei, husur mǝtodǝlom nǝsa namttokel koti husuri.
11 Imaienan namtusor tuṽ tabtab m̃os gamito ke aGot sidato dereh tisab̃ sǝhoti ke, mǝtunor hǝn nǝmauran gai tokis gamit m̃osi. Namtusor tuṽ ke len nǝdaŋan san, aGot dereh tigol nalǝŋonian samit p̃isi hǝn navoian, mai natit p̃isi mǝttogole len nadǝlomian samito, liṽan hǝn naṽite.
12 Namtusor tuṽ magenan hǝn nǝvanuan p̃isi lǝb̃eputsan nahǝsan aMasta sidato, aYesu, hǝn nǝsa togole len nǝmauran samito, mai hǝn aYesu b̃eputsan gamito. Natgalen dereh levisi len navoian, aGot sidato mai Nasub̃ aYesu Kristo, artoviol kǝmas hǝni.