Markus
PONEKORI YUBU WALINGE YESUS SEMBE
MOME TOBOG YUBU
Markusti mome tobogne sembe tibin nenerop yubu palilamap
Markus Yubu ane Yohanes-Markus as Yerusalemneri mome tobog. Yohanes-Markus poneko Petrus, Yesus neleptopne, elkae wamog. Wamogti, Petrusti Yesus sembe ambarelamsiogne ka'ebaogti, mome tobog.
Markusti, “Yesus etne, huro el so'oag kamag uro wamori, nimiri malia uropne sembe seklero tebaonge sembe yog nimi babe el taukang,” aro mome tobog.
Markus pone mome tolamogti, saeri mome tobog. Nomorap pasalap tamap kom-kom mome tobog. Amik nimi orangeri agha, “Pasal ane, nomor ane, tam ane senelamukang,” aro a'ero-a'ero karepto pibek.
Markusti mome tobog yubu tam saekpare karebiagha a'ero-a'ero palilamap
1:1-13 anena, Allahri Elme Yesus wepto poghogne lag taogha sembe mome toro pibog.
1:14-9:50 anena, Yesus mog so'o Galilea wamogha Allah yubu ambarelamsiogti, nimi wali nenelamsiogha sembe mome toro pibog.
10:1-52 anena, Yesus mog so'o Galilea liogha as Yerusalem sip palamogha sembe mome toro pibog.
11:1-12:44 anena, Yesus as Yerusalem wa'iogti, Allahri Mem Ae Allah yubu ambarelamsiogha sembe mome toro pibog.
13:1-37 anena, Yesusti tam amik uro yabilulne sembe ambarelamsiogha sembe mome toro pibog.
14:1-15:47 anena, Yesus seklebaogti, tebaogha sembe mome toro pibog.
16:1-20 anena, Yesus nen kamag taogti, imag ingkiogha sembe mome toro pibog.
Yahudi nimi sembe palilamap
Allahri samenag Abrahamag, “Anenge asap, ankaboap, anenge so'oap laplobiagha Nari mog so'o ambatkenenge nhonag pululam. Andi mangarobari mangkahyikne tanekori mangkahyikne maikno taukang,” aro ambarog (Sumbaogha 12:1-2). Ambarogti, amik sum babe Allahri nen tipto ambarelamogti, “So'o Kanaan ane an nimi sekelanan nang saog uro wamlam aghana, an anisag yabo sembe so'o ane 'Ngai taukang,' aro tatsineri, sin sembe Sikini Allah Na wamnun,” aro salag lekto ambarog (Sumbaogha 17:8). Ambarogne ane sik uro yabiogpa, sikin maikno taekti, mog so'o aneag wamek. Abraham Ibraninge wamogti, elme Isak mangkaogpa, Isak elme Yakub mangkaogpa, amik sum Yakub sembe Allahri elag si nhon Israel engero pibog. Ane sembe, Abraham ponekori mangarobari mangkahiekne sembe Ibrani nimi babe, Israel nimi babe alamsiekpa, amik sum Yahudi nimi babe engero yabiog. Sindi mog ane samenag mog so'o Kanaan alamek.
Allahri Israelnangag, “Nari aruksirop yubu ka'eamlulom!” aro ambatsiog aghana, sikin ka'ebaek kom. Sin ka'ebaek komne sembe Allah Eldamneri yubu silimu tiptopnang Israelnang anabiagha weplamsiogti, sikinkaboag “'A'undi mali-malia ulamlomne lipsimundi, Allah yubu ka'eamlulom,' aro ambarelamsululom,” aro pogsiog. Pogsiog aghana Israel nimiri Allah yubu silimu tiptopnangdi samenag ambarelamsiek yubu ka'elamek komdi, nenne mali-malia ulamsiekti, nenne nimi ya'ag olamsiek. Undop aghana Allahri samenag Eldi yubu silimu tiptopnang pere agha Israelnangag, “Nari me mog so'oag nimi taulbahileri, saelbamsilul aro pognun,” aro salag lekto ambatsiog.
Wene aro ambatsiogti, Allahri elme Yesus so'oag nimi sembe poghog aghana, Israel nimi eldi yubu babe ka'elamek komdi, obek. Israel nimiri samenag Allah Elme Yesus obek aghana, Allahri Yesus nen kamag nembaog. Wene Allah yubu walinge anena, nu mog so'oag nimiri mali-malia ulamapne sembe Allahri nu opsinep aghana, nu mog so'oag nimi sembe o'ona senelamsiogti, Allahri Elme Yesus mog so'oag nimi sembe poghog. Poghogpa, Yesus nunag yaogpa, nuri mali-malia ulamapne sembe Allahri nu ya'ag opsinep aghana, Yesus nu tebanep nimi sembe lunumna taogpa, nimiri obek. Obek aghana, Allahri nen kamag nembaog. Yubu wali sirikne nene sembe, nimi maiknori Yesusag wana saingnia sikne aro seneraglamikti, tala-tala urop nimi ambatto tongolamsiang.
Israel nimiri samenag Allah yubu silimu tiptopnang ka'eban koma mali-malia ulamsiekne sembe babe, Allah Elme obekne sembe babe, Yesusti Israel nimi nubu nangag sunumna yubu nhon ambarelamsiog. Ambarelamsiog yubu ene Markus yubu mome tobogne wene palilamapne kembiagha pasal 12 keknep.
Roma nimi sembe palilamap
Yesus so'oag wamoghag Yahudi nimi sindi mog so'o wamek aghana, sikin mo sektop kom. Yahudi nimi wamek mog so'o eneko Roma nimiri samenag wamek nimi luknubahiekti, saelba ulamsiek. Roma nimi sikini nimi nubunge Kaisar pone as nubunge Roma weag wamog. Wamogti, tala-tala wamek nimi mog so'o maikno saelbamogpa, mog so'o wamek nimi taneko eldi yubu ka'elamekpa, Yahudi nimi babe el umag wamek. Tam ane sembe Yahudi nimi karong senelamekti, “Mo seksebeba, nimi nubunge nuringe mo wamsori, nu Yahudi nimi saelbamsiso,” senelamek. Undo senelamek aghana, Roma nimi sikini nubunge Kaisar ponekori, “Israel nimiri nari yubu ingisaplobikagti, yae wamlulom!” aro yin saleropnang maikno Yahudi nimi wamek so'oag pogto sekitsiog.
Yesus mangkaogpa, eldi ua ulamogne kembiag agha Yahudi nimiri, “Roma nimi yaglambahileri, el agha nuri nimi nubunge wamlul,” sembaek. Ane sembe Yesus pham keledai me alibag pulingkina as Yerusalem wa'iogpa, Yahudi nimi maiknori, “Wene el nuri nimi nubunge taleri, Roma nimi yag lambahilul,” senelamek (Markus yubu pasal 11 nene agha keknep). Undo senelamek aghana, Yesusti “Roma nimi yaglambahineba, Yahudi nimi mo sekukang,” aro Yesus so'oag yaog kom.
Samenag Musari mome tobogne ambatsiropnang sembe palilamap
Samenag Allahri, “Undo-undo unulamlulom,” aro aruktop yubu Musa ambarogpa, Musa ponekori nen tipto Israel nimi sembe mome toro pibog. Amik sum Israel nimiri Musari mome tobogne kilbiagha yubu kiki telekto, “Undo-undo unualulom,” aro ambarelamsiek. Samenag Musari mome tobogne sembe babe, amik nimiri “Undo-undo unualulom,” arop yubu babe, Musa yubu ambatsiropnang el uro wamek. El uro wamekpa, Allah yubu lerop aeag nimi poloro winiltalamekag Allahri aruksirop yubu neneap, nimiri, “Undo-undo unualulom,” arop yubu eneap ambarelamsiek.
Samenag Musari mome tobogne ambatsiropnangdi, “Allahri so'oag nimi taulbahileri, saelbamsiilulne nhon poglul,” aro el uro wamektiog, sin Yesus sembe, “Allah elme,” aro sik senelamek komdi, wa'epto ebek.
Farisi nimi sembe palilamap
Allahri Musaap, Allah yubu silimu tiptopnangap pere agha eldi aruksirop yubu Israel nimiag ambarelamsiog aghana, amik sum Israel nimiri, “Nen undo-undo unualulom,” aro ma'arop yubu babe maikno ambarelamsiek. Farisi nimiri sop-sop, “Undo-undo unualulom,” arop yubu ene senelamekti, ul palamek. Sin Farisi nimiri seneraglameknena, “'Undo-undo unualulom,' arop yubu ene sunsunum uro ulapmun kom tanena, Allahri a'un sembe karong sembahilul,” senelamek. Undo senelamekti, ambarelamsiekpa, yog nimiri sin Farisi nimiri ul piroba kemelamsiekti, maiplamsiek.
Yesusti sin Farisi nimiag, “A'un nimi wana waknang wamlom,” seogti, nen tipto ambarelamsiogti, “Nimiri ma'aro, 'Undo-undo unualulom,' arop yubu mikip uro saelba ulamlom aghana, Allahri aruksirop yubu sembe teba'an nenero ul palamlom,” seog. Tam nene sembe, Markus pasal 7:6, 8 kembiagha el tanep.
Memnang Allah sembe pairopnang sembe palilamap
Memnang Allah sembe pairopnang Allah Eldamne Mem Ae nubungeag Allah yeplamekti, Allahap nimiap anabiag uropnang wamek. Nimiri “Allah omekto tarel pinun,” aro ulamekti, wali-waliaba memnang tarel piekti, memnang saeag tarelamsiek. Tarelamsiekpa, memnang Allah sembe pairopnangdi wali-waliaba Allah sembe aukag talamek. Yahudi nimiri pham-domba, pham-sapi, pham-kambing, mem winang tarel palamsiekpa, memnang Allah sembe pairopnangdi oro aukag talamek. Yahudi nimiri tena babe tarel palamsiekpa, Allah sembe aukag talamek.
Memnang Allah sembe pairopnang taneko Allahap nimiap anabiag uropnang wamekti, awe yogne salelamek. Awe salelameknena, Allah yubu ambarelamsiekti, molona babe nimi sembe Allahag molbarelamsiek. Memnang Allah sembe pairopnang wameknena, memne Allah sembe pairopnang sikini nubunge nhon wamogpa, memnang Allah sembe pairopnang sikindoyabo babe wamekpa, memnang Allah sembe pairopnang umagnang babe wamek.
Allahri Mem Ae sembe palilamap
Allahri Mem Ae mog so'o Israel as nubunge Yerusalem anekoag nhonog wamog. Ae ane kembi agha nubu sirik ae wamog. Allahri Mem Ae anekoag ae lom maikno sobaekti, aramag sip babe a'ero-a'ero nembaek. Ot Yahudi sisa nimi aghabog Allahri Ae aramag wa'alamek. Yahudi sisa kom nimi Allahri Ae peagmanag seka ulamek aghana, Yahudi sisa nimiri leka solingkieka Yahudi sisa kom nimi iriklamsiek. Yahudi sisa kom nimiri “Allahri Ae peramag wa'inun,” aro irikna ane philamek tanena, Yahudi nimiri ya'ag olamsiek.
Nimiri, “Allahag yubu lero Allah omeklamukap,” aro Allahri Mem Ae aramag palamekti, wali-waliaba Allah sembe tarel palamek. Allahri Mem Ae tanekoag memnang Allah sembe pairopnangdi wali-waliaba Allah omekto aukag talamek.
Yahudi nimiri Allah yubu lerop ae sembe palilamap
Yahudi nimiri as tala-tala wamekag nimi poloro winirobag Allah yubu lerop ae nhon-nhon solamek. Yahudi nimiri senelameknena, “Yahudi nang sa'obare nikag wamebe tanena, Allah yubu lerop ae sobanep aghana, nengabo sa'obare wamebe kom tanena, Allah yubu lerop ae sobaukap kom,” senelamekne sunsunum uro ul palamek.
Yahudi nimiri Allah yubu lerop sum talamogpa, Yahudi nimiri Allah yubu lerop aeag wa'alamekti, Allah yubu ambarelamsieka ka'elamek. Ora sum babe sindi mabo Allah yubu lerop aeag wa'alamekti, mome toroba kembanepneap, pimnepneap sembe el talamekti, Allah Yubu babe usoghag tobongkia wanaag agha el uro lelamek. Yesusti babe Allah yubu lerop aeag wa'ina Allah yubu ambarelamsiog.
Yesusti wepto pogsiognang sembe palilamap
Nimi aobare Yesusti wepto yopsiognena, “Sin nanap nhon wameberi, Allah yubu ambarel palamsiberi, phia nimi kulomag wamikne yag lanalamsukang,” aro wepto pogsiog. Yesusti samenag wepto pogsiognang anena:
Simon Petrus
Zebedeus elme Yakobus
Yakobus elipsae Yohanes
Andreas
Pilipus
Bartolomeus
Matius
Tomas
Alfeus elme Yakobus
Tadeus
Simon mo sekukap aro yin saleropne
Yudas Iskariot
Sin nimi aobare abini wepsiog. Yesusti sin wepto pogsiogne sembe Markus yubu pasal 3, ayat 13-19 kembiagha, Yesusti sin aobarenang wepsiogha el tanep.
Ane sembe sin aobarenang aneko Yesus ilipsabo taptopne kom, aghana Yesusti wepto pogsiognang alamap. Yesus ilipsabo taptopne babe, ilipsa'elabo taptopne babe wamek aghana, sin Yesus sopsop neleplamek kom. Markus pasal 6 kembiagha, Yesus ilipsabo taptopneap, ilipsa'elabo taptopneap sembe el tanep. Yesus ilipsabo taptopne sina Yakobus, Yoses, Yudas, Simon wamek aghana, sinna Yesus anam teban komag wameknena, sindi Yesus neleplamek kom. Ane sembe aobarenang sembe palilamapne nene Yesus ilipsabo alamap kom. Yesus ilipsabo a'ero, Yesus neleptopnang a'ero, Yesusti wepto pogsiognang babe a'ero wamla.
Tibin nenerop yubu komopto pibap.
Markusti Yubu Walinge Yesus sembe mome tobogha
Allahri Elme Yesus wepto poghogne lag taogha
1:1-13
1
1 Yubu walinge Allah Elme Yesus Kristus sembe na Markusti mome palilamnange tamna ane.
2 Samenag Yesus anam yan komag, el mog so'oag yalulne sembe Allahri yubu ambarelamogti, Allah yubu silimu tiptopne Yesaya ponekori tipto mome toro pibog. Allahri samenag Elmeag lebogne Yesaya poneko el taogti, nen tipto mome tobogne ane:
“Nari yubu ambatsirop nimi nhon pogneba,
'Eldi ina an pinepne sembe yarelamlul,' aro pognun.
3 Pognenge poneko pai aldesog urobag pileri,
yubu haum aro nimi yoplamsileri,
'Ina nu saelbamsilulne yanepne sembe yarelamlulom.
El yanep ina porog nenelamsut,' aro ambatsilul,”
aro Allahri lebogne sunsunum uro Yesayari mome toro pibog.
Yohanesti maghag pelengelamsiogha
(Matius 3:1-12; Lukas 3:1-18; Yohanes 1:19-20)
4 Yesaya ponekori mome tobogne sunsunum uro Allahri yubu ambatsiropne poghogpa, Yohanes nimi maghag pelengahiropne poneko pai aldesog urobag yaog. Yaogti, Allah yubu ambarelamsiogti, “A'undi mali-malia wanaag seneragto ulamlomne lipsumunba, maghag pelengkipsinun. Pelengkipsineba, a'undi mali-malia ulamlomne Allahri wailag nembaleri, kom nembalul,” aro ambarelamsiogti, maghag pelengelamsiog.
5 Wene aro ambarelamsiogti, maghag pelengelamsiogpa, nimi maikno mog so'o Yudea wamek nimiap, as Yerusalem wamek nimiap, Yohanesag ka'el alamek. Ka'elamekti, “Nuri malia-malia undo-undo ulamubu” aro lag phoro ambarelamekpa, Yohanesti mag Yordan inaag pelengelamsiog.
6 Yohanesti pham unta hong agha wirop ag wangkamogne, Allah yubu silimu tiplameknangdi samenag wangkamekne sunsunum uro wangkamogti, uwoghag lebe aroba kon agha sunurop haing kauptangkamog. Kauptangkamogti, eldi tena whengap pondog maghap tero wamog.
7 Undo tero wamogti, nimiag yubu ambarelamsiogti, “Na sam yano aghana, amik nimi nubunge nhon, nanap sunum komne phelektopne mikipne nubunge nhon yalul. Na nimi ologne wamnaba, el mikip phelektopne wamlul ane sembe, eldi arukna tanunne na sunurop kom. El mikip sirikne yaleba, na kinipto pulingkina nari eldi yan wangana haing lopna babe nanap sunurop kom.
8 Nari mag mo aneag agha a'un maghag pelengelamsin aghana, El nubunge yalulne ponekori Allah Eldamne Yame Walinge a'unag pelengkatsilul,” seog.
Yohanesti Yesus maghag pelengkaogha
(Matius 3:13-17; Lukas 3:21-22)
9 Yohanesti nimi maghag pelengelamsiog abeneko Yesus as Nazaret, mog so'o Galilea wamogha laplobiagha, Yohanes wamoghag yaog. Yaogpa, Yohanesti Yesus mag Yordan inaag maghag pelengkaog.
10 Pelengkaogpa, Yesus maghag agha lambaog abeneko imag tiwalengelamogpa, im sangal naghogpa, Allah Yame Walinge mem winang saog uro elag kulukul alamogha ibog.
11 Elag kulukul alamogpa, imag agha yubu nhon lelamogti, “Anna name nari o'ona senero angkenne, na wana awi nenelamnelam,” al toghogha ka'ebaog.
Phia Sikini nubungeri Yesus yubu nebogha
(Matius 4:1-11; Lukas 4:1-13)
12 Allah yubu lelamogha ka'ebaog abeneko pere, Allah Yame walinge anekori enero pabiogpa, Yesus pai aldesog urobag piog.
13 Piogti, wamogti, inipna ik teng nhon epto nualbareap (40) taog. Wamogpa, phia sikini nubungeri, “Allahri iriktop yubu phibalul to, kom to,” aro wana aluktop yubu agha yubu neplamog. Yubu neplamog paghabog Yesus winangap, manaap, pagheap ua urobag wamogpa, Allah arukna malaikat imagnang yinkina el yepto piamek.
Yesus mog so'o Galilea wamogti, Allah yubu ambarelamsiogti, nimi wali nenelamsiogha
1:14-9:50
Yesusag nelepto eldi yubu ka'ero uropnang tombare yopsiogha
(Matius 4:12-22; Lukas 4:14-15; 5:1-11)
14 Mog so'o saelba uropne nimi nubunge Herodesti, Yohanes haing sae kaupto salero kop aeag tobongkaogpa, Yesus mog so'o Galilea so'oag piog. Piogti, Allah yubu walinge ambarelamsiogti,
15 “Allahri samenag, 'Mog so'oag nimi wali uro paiamsineri saelbamsinun,' aro salag pibogne sunsunum uro wene undo uro yabinual. A'undi mali-malia ulamlomne lipsimundi, Allah yubu walinge aneko sik sembamundi, salero ul palamsut,” aro ambarelamsiog.
16 Yesus mag Galilea longorop mag peramag mag abol toman palamogti, tilamogpa, ikan oropnang phende wamdekne Simonap, ilipsae Andreasap tibogahiog. Tilamsiogpa, ikan oropnangdi ulamekne sunsunum uro ikan liptangop ag maghag talamteka tibogahiog.
17 Tibogahiogti, Yesusti sinag yubu lelamogti, “Nanag yarumunba, nanap nelepto nhon pukap. Wene a'un ikan aghag lilamsirom saog uro amik sum babe yepsineba, a'undi nimi ero yubu sikne ambarelamsirumundi, nanag payahirurom. Nanag yahut,” seog.
18 Yesusti wene seogpa, ta'ap sen koma sindinge ikan liptangtop ag laplobi agha Yesusag nelepto elap nhon palamek.
19 Nelebarekpa, olog we koma piekti, tilamogpa, Yesusti Zebedeus elmabo phende Yakobusap, elkae Yohanesap tibogahiog. Sikin kabong lomag wamtekti, sindi ikan liptangtop ag o'oro wetnel tolameka tibogahiog.
20 Tibogahiogti, ta'ap sen koma Yesusti, “A'un nanag nelepto nhon pukap,” aro sin yopsiog. Yopsiogpa, sindi sikini Zebedeusap eldi aruknaap kabong lomag wameka aneko lilobi agha Yesusag nelebarek.
Yesusti phia yonge yaglambaogha
(Lukas 4:31-37)
21 Yesusap, Eldi yopsiognang abenekoap as Kapernaum piekti, wamek. Wamekpa, Yahudi nimiri poloro winiptangto Allah yubu lerop sum taogpa, Allah yubu lerop aeag wa'iekti, Yesusti Allah yubu ambarelamsiog.
22 Wali uro ambarelamsiogpa, nimi taneko ka'ebaekti, “Yaghe, el mo el uropne wamlari, mikipneag agha ambarelamsil. Musari samenag mome tobog yubu ambatsiropnangdi undo mikipneag agha ambarelamsiang kom,” senelamekti, lo'om seek.
23 Yahudi nimiri Allah yubu lerop ae as Kapernaum wa'iek nimi taneko anabiag agha phia yonge kulomag wa'iog nimi nhon wamog. Wamogpa, Yesusti ambarelamsiogha ka'elamekti, lo'om alamek abeneko, phia yonge kulomag wa'iog nimi enekori haum aro yubu lelamogti,
24 “Yesus, Nazaretneo! An nunag hualulam? Nu sembe 'Kom nembahinun,' aro yalam te? Anna etne na el wamna. Anna Allahri 'Pognun,' aro salag pibogne sunsunum uro Eldamneri wepto pogkeogne wamlam,” seog.
25 Wene seogpa, Yesusti phia yonge anekoag, “Yubu kom tae! Nimi eneag agha lambae!” aro arukaog.
26 “Lambae!” aro arukaogpa, phia yonge nenekori nimi eneko yo uro lologlamogti, yubu ngolol aro nimi kulomag agha lambaog.
27 Lambaogpa, nimi ni taneko kembaekti, “Yaghe, mane agha ual!” al talamek. “Huropne mikipne agha undo uro yabil? Nimi enekori yubu wendogne mikipneag agha ambarelamsil. Eldi phia yongeag, 'Lambae,' aro aruklamsilba, ka'elamangdi, lanalamang,” seekti, lo'om seek.
28 Lo'om seekti, sindi, “Yesusti unuro unual,” aro ambarelamsiekpa, ka'ebaek nimiri tipto ambarelamsiekpa, Galilea mog so'oag yubu eneko men phea sabo taog.
Yesusti nimi maikno wali nembahiogha
(Matius 8:14-17; Lukas 4:38-41)
29 Sin nimi poloro winirop aeag aneko laplobi agha, Simonap, ilipsae Andreasap sindi aeag piekti, Yesusap, Yakobusap, Yohanesap sin lambare nhon piek.
30 Aeag yaekpa, Simon elyamal kel naikna bobo along wamogpa, ae lomag malamog. El yamalkel eneko naiklamogha sembe Yesusag peket ambarek.
31 Ambarekpa, Yesus kel enekoag piogti, sae kiliro yepto pukirog. Pukirog abeneko pere bobona orog taogpa, kel enekori sin tena yepto yobarelamsiog.
32 Heng puruklamog abeneko ae imbaogpa, nimi naiktopneap, nimi phia arukna yonge kulumag uropneap maikno Yesusag payahiek.
33 As aneko nimi ni yalonga saog uro ae aneko ina siramag longol aek.
34 Longol aekpa, Yesusti naikna yogne-yogne seklelamekne wali nenelamsiogti, phia arukna yonge babe nimiag agha yaglambahiog. Phia arukna taneko Yesus sembe “El etne wamla,” aro el uro wamek, ane sembe Yesusti sikinag, “A'un yubu lepseng kom,” aro irikahiog.
Yesus mog so'o Galilea so'oag wamogti, Allah yubu walinge ambarelamsiogha
(Lukas 4:42-44)
35 Kweleknag aneko ae anam wareban komag Yesus pukogti, ae aneko laplobi agha as peramag nimi oroghag piog. Piogti, anekoa Allahag moloro yubu lelamog.
36 Lelamog aghana Simonap elkaboap Yesus el piek.
37 Elamekti, ibekti, elag yubu lelamekti, “Nimi maiknori an elangkeangpa, nu nen samoro aeag pukap,” seek.
38 Aghana Yesusti samoro ambarelamsiogti, “Kom. Nana, 'Nimi niag Allah yubu sikne ambatsinun,' aro so'oag yahi ane sembe, nu yog as peramag wamang nimiag pukapti yahut!” seog.
39 Anea Yesus mog so'o Galilea as wamekne kanero wamek nimiag ambattoa tongolamsiog. Allah yubu lero poloro winirop aeag babe Allah yubu ambarelamsiogti, phia arukna yonge babe yag lanalamsiog.
Yesusti kon pololamogne nhon wali nembaogha
(Matius 8:1-14; Lukas 5:12-16)
40 Yesus mog so'o Galilea kanero wamek nimiag ambattoa tongolamsiog abeneko, nimi nhon konag naikna poloro telamogne, wali tanep komne, telamog nimi nhon yaog. Yaogti, Yesus whingag yabu sanukto pulingkiogti, wanaag agha mololamogti, “An wali nembahinepne wamlamdi, yeng sembamen tanena, andi na wali nembanululam, te?” seog.
41 Seogpa, nimi eneko o'ona sembamog. O'ona senelamogti, sae saelbamogti, yubu lelamogti, “Na yeng. Wali tae!” seog.
42 Lelamog abeneko pere naikna aneko orog taogpa, nimi eneko wali taog.
43 Wali taogpa, Yesusti elag iriklamogti,
“Wali pululam!
44 Nari an wali nembaghenne sembe ora nimiag ambatsiseng kom! Aghana memne nimi sae agha Allah sembe pairopne nhonag peket pimendi, waliaba Allah sembe pimnepne elag pabululam. Waliaba pabululamnena, Musari samenag, 'Kon naikna urop nimi wali tale tanena, Allah sembe pimnepne payalul,' aro mome toro paibog yubu sunsunum uro pabululam. Pabimendi, memne Allah sembe pairopneag aghabog ambarel pimendi, 'Wali nembamnel,' aro ambatlulam. Ambarel pimenba, kembaghelenge pere agha an wali nembaghenne sembe el taleri, waliaba tarel pabimenne Allah sembe aukag taplul. Ni undo uro yabalamle pere agha, kekneba sinag uro yabileba, nimi el wamnep,” seog.
45 Wene aro irikaog aghana, nimi eneko anekoa laplobi agha Yesusti el wali nembaogne sembe nimiag salik-malik uro neplamog. Undop agha, Yesus as nhon tibin uro wa'inep komdi, El sop-sop nimi oroghag ua ulamogpog, sopsop tala-tala nimi elag yalamek.