15
Ɓejaki yitan jɔ yiɓa kɛ lɛpɔ mɛkemiyɛ
mɛte yi ta ɗya̧ kɛ́
1 Kɛ kɔŋte, ɛ mi ɓɛŋɛ wɛtɛ nyaŋgwɛ mɛyekambiyɛ sendi kɛ ɗyoɓɔ. Yo ɓa̧ yasi te yi ŋgbakima ɓuɗyate. Yo ɓa̧ ɓejaki ɓe Njambiyɛ yitan jɔ yiɓa. Ɓo ɓa̧ nɛ njena mɛkemiyɛ yitan jɔ yiɓa. Yo nde, Njambiyɛ ta kwa̧ nɛ mɛkemiyɛ mɛnɔri yí siɗyɛ nɛ teɗya ŋgambi nɛ.
2 Ɛ mi ɓɛŋɛ yiŋa yasi nda maŋ. Yo ɓa̧ kɛ panɔ nɛ ŋgɛ̧y ŋgɛ̧y. Ɗitɛ ɓa̧ sendi kɛte. Ɛ mi ɓɛŋɛ sendi ɓomɔ kɛ tɛri kɛ to maŋ yinɔri. Ɓo ɓa̧ nɛ mɛkunde mɛ Njambiyɛ kɛ mɛɓɔ. Yo ɓa̧ ɓotu ɓete ɓe laŋsama nyamɔ kɔ ɓaka. Ɓo tì kanɛ yekambiyɛ nɛ ho ɓɛ nɛ yiŋa ɓuyɔ yasi kɛtinate kɛ yotu yan yi teɗye ɗinɔ nyamɔ kɔ na.
3 Ɓo kɛ jembɔ jembi te yi Mɔyisi te mɔ mɛsay mɛ Njambiyɛ ɗikima jembɔ kɛ́, jembɔ sendi jembi *Mɔnɔ Sam. Ɓo kɛ jembɔ lɛpɔ nde: «Njambiyɛ te Baba Mbokɔ ɛ nɛ ŋguŋguɗyɛ hɛnɛ, mɛkele mɔ gba nyaŋgwɛte, yo yasi te yi ŋgbakima ɓuɗyate: Wɛ Kumande ɓomɔ hɛnɛ kɛ to mɛnɛti, wɛ kél yasi nɛ ŋgbeŋ, mɛkele mɔ hɛnɛ téɗya ndi gbakasi.
4 Baba Mbokɔ, nda ta ɗiyɔ kinɛ kambɔ wɛ kɔ? Nda ta ɗiyɔ kinɛ lukse ɗinɔ ɗyɔ kɔ? Kɛto yo ndi wɛ nyɛpɔ ɓɛ kinɛ sɛmbɔ na. Mɛkandɔ hɛnɛ kɛ to mɛnɛti maka ta ŋgbɔ nje kanɔ wɛ, kɛto wɛ teɗya nyɛ ɓomɔ hɛnɛ nde, mɛkele mɔ nɛ ŋgbeŋ.»
5 Kɛ kɔŋte, kɛ mi ma kaŋɛ misi, ɓɛŋa, mbanjɔ Njambiyɛ te yi ɗiyɛ kɛ ɗyoɓɔ kɛ́ ɓutunama. Ɛ mi ɓɛŋɛ mɔnɔ tu̧ te yi ɓo kelɛ nɛ to mɛlambɔ yi teɗye nde, Njambiyɛ kɛ njoka ɓomɔ ɓenɛ kɛ́ kɛ mɔyte.
6 Ɛ ɓejaki ɓe Njambiyɛ yitan jɔ yiɓa ɓe ɓa̧ nɛ mɛkemiyɛ yitan jɔ yiɓa ɓaka pundɛ kɛ mɔy mbanjɔ Njambiyɛ kɛ̀ sɛ̧. Ɓo ɓa̧ nɛ yiŋa wumna mɛlambɔ nɛ fanya fanya kɛ yotu nɛ̀ mɛkanda kɛ ɓeti tandɛ lɔr.
7 Kɛ njoka ɓe joŋjoŋgwɛ mɛyasi mari yini, ɛ wɛtɛ kaŋɛ mɛpelɔ yitan jɔ yiɓa nyɛ ɓejaki ɓe Njambiyɛ ɓaka yitan jɔ yiɓa. Mɛpelɔ mɛte ɓa̧ tandɛ lɔr. Yo ɓa̧ tondunate nɛ ŋgambi Njambiyɛ te ɛ ɗiyɛ kpo nɛ kpo kɔ.
8 Ɛ mɛluksa nɛ̀ ŋguŋguɗyɛ te yi Njambiyɛ ɓɛ nɔ kɛ́ kelɛ nde, yiɗyɛ tôndu kɛ mbanjɔ Njambiyɛ nɛ kip. Ko mumɔ wɛtɛ nɛ wɛtɛ tì ɓɛ nɛ ɗeti te yi nyiŋɛ kɛ mɔy mbanjɔ na kumɔ nde, mɛkemiyɛ yitan jɔ yiɓa te yi ɓejaki ɓe Njambiyɛ ɓaka yitan jɔ yiɓa ɓɛ nɔ kɛ́ sîki kelna.