Mɛlɛpi mɛ Njambiyɛ Jɔnja Mbon 1 TESALONIK 5

1 Wunɛ njɔŋ, wusɛ tí gwe nɛ kɛtɔ mɛkana kɛnjɛ wunɛ kɛ kasi ŋgimɔ nɛ̀ kɛ kasi mɛtu mɛte yi mɛyasi mɛte ta ɗya̧ kɛte kɛ́ na. 2 Kɛto wunɛ nɛ ŋguru wun kɛ kombile duwɛ nde, *Yesɔ Nyaŋgwɛ Kumande ta ŋgbakɛ wusɛ ŋgbaka nda yi mɔ guɓɔ nje nɔ nɛ tu kɛ́. 3 Kɛ ŋgimɔ te yi ɓomɔ ta lɛpɔ nde: ‹Yasi hɛnɛ nɛ tɛ, yaŋa yeti kɛ́!› Yo kɛ ŋgimɔ te yite yi nyaŋgwɛ kemiyɛ ta ɓalɔ kɛ to yan ŋgbakɛ ɓo nda yi kwana mɔy mi̧ ŋgbakɛ nɛ nyari kɛ́. Ko mumɔ wɛtɛ nɛ wɛtɛ kɛ njoka yan tí diyɔ na. 4 Wunɛ njɔŋ, kɛ ɓɛ wunɛ, wunɛ yeti nda ɓotu ɓete ɓe ɗiyɛ kɛ yitil, nɛ́ yesɔ te nje ŋgbaki wunɛ nda mɔ guɓɔ na. 5 Kɛto wunɛ hɛnɛ ɓotu ɓe mɛjasi. Wunɛ ɓotu ɓe yesɔ. Wusɛ yeti ɓotu ɓe tu ho ɓotu ɓe yitil na. 6 Ɗete, wusɛ tî joŋnaŋgwɛ nda ɓotu ɓete ɓe kwa̧ nɛ jakɔ ɓaka na. Yasi wɛtɛ, wusɛ pɛ̂m yasi. Sendi, wusɛ tî jeki nyɛ temɔ kɛ mɛyasi na. 7 Kɛto ɓotu ɓete ɓe ya ɓaka, ɓo yáki nɛ tu. Sendi, ɓaka ɓe gwe mɛnjam ɓaka, ɓo gwáki nɛ tu. 8 Ma wusɛ su ɓotu ɓe yesɔ, wusɛ ɓîya mɛtemɔ musu kɛ mɛyasi. Wusɛ kɛ̂n mbɔmbu tikɔ temɔ kɛ yi Yesus, ɓɛ sendi nɛ temɔ mɛkwaɗya nda yi mumɔ lɛŋɛ nɛ lambɔ sumba ɗyambi yí petɔ nɛ ɓeti ɗyenɛ kɛ́. Wusɛ ɓɛ̂ki nɛ ɓiɓina temɔ kɛ yi Yesus nde, a ta nyɛ wusɛ joŋgwɛ. Wusɛ ɓɛ̂ki nɛ ɓiɓina temɔ ɗete nda yi mumɔ ɓu̧ nɛ guka sumba lɛŋɛ kɛ to kɛ̀ nɔ ɗyambi kɛ́. 9 Kɛto Njambiyɛ tì tɔkɛ wusɛ nde, nɛ́ wusɛ saŋgwa nɛ ŋgambi nɛ na, yasi wɛtɛ, a kpoma nde, wusɛ ta ɓɛ nɛ joŋgwɛ te yi kpo nɛ kpo, kɛto Nyaŋgwɛ Kumande wusu Yesus Krist. 10 Yesus Krist gwa̧ gbate yí joŋgwɛ nɛ wusɛ. Ɗete, ko ɓɛkɔ nde, wusɛ ɓɛ́ki ndi nɛ joŋ, ho nde, wusɛ ta si gwe, sinɛ ɓe Yesus ta joŋna komɛ nyɛ ta nje kɛ́. 11 Ma yɔkɔ kîta jakɔsɔ, yɔkɔ kama maŋ, na ɗɔku kɛ mɛlɛpi mɛ Njambiyɛ nda yi wunɛ kelɛ kɛ́.

12 Wunɛ njɔŋ, wusɛ kɛ ŋgwɛta nɛ wunɛ nde: Wunɛ jɛ̂si ɓotu ɓete ɓe kelɛ mɛsay kɛ njoka yun ɓaka. Yo Nyaŋgwɛ Kumande tɛmbiɗye ɓo nde, ɓo kɛ̂ kita wunɛ. 13 Wunɛ kômbila jɛsɔ ɓo, kwaɗyɛ sendi ɓo, kɛto mɛsay mɛte yi ɓo kelɛ kɛ́. Wunɛ jôŋnaŋgwɛ nɛ tɛ tandɛ yun. 14 Wunɛ njɔŋ, wusɛ kɛ kɛ̀ mbɔmbu ŋgwɛta nɛ wunɛ nde: Wunɛ ɓâmaŋgwɛ nɛ ɓotu ɓete ɓe joŋna nɛ ndul ndul ɓaka. Wusɛ kɛ ŋgwɛta sendi nɛ wunɛ nde: Wunɛ wɛ̂ɗya mɛtemɔ mɛ ɓotu ɓete ɓe gwe kaŋ ɓaka, kamɛ ɓaka ɓe nɛ tɛkɔ ɓaka. Wunɛ dîsimaŋgwɛ ɓomɔ hɛnɛ. 15 Wunɛ ɗîy nɛ sɔsɔ, ŋgɛ mumɔ kelɛ ɓeya yasi suŋgwɛ nɛ jakɔsɔ, a tî yɔkiɗya kelɔ sendi ɓeya yasi nɛ nyɛ na. Yasi wɛtɛ, wunɛ sâŋ nje te yi kelɔ kimɔ yasi mɛtu hɛnɛ tandɛ yun, kelɔ sendi ɗete suŋgwɛ nɛ ɓomɔ hɛnɛ. 16 Wunɛ sôsaŋgwɛ mɛŋgimɔ hɛnɛ. 17 Nɛ ŋgwɛ̂taŋgwɛ nɛ Njambiyɛ mɛtu hɛnɛ. 18 Wunɛ nyɛ̂ki Njambiyɛ wosoko kɛ mɛyasi hɛnɛ te yi yakama ɗya̧ kɛ́. Kɛto Njambiyɛ kwáɗyikwɛ nde, wusɛ kêl ɗete kɛ joŋgwɛ ɗyusu sinɛ ɓe Krist Yesus. 19 Wunɛ tî peti mɛsay mɛ Kimɔ Sisiŋ na. 20 Wunɛ tî yɛlkwɛ mɛlɛpi mɛte yi ɓotu ɓe punja mɛlɛpi mɛ Njambiyɛ lɛpɛ kɛ́ na. 21 Yasi wɛtɛ, wunɛ nɛ̂mba mɛyasi hɛnɛ, ɓakiɗye mɛyasi mɛte yi ɓɛ kimɔte kɛ́. 22 Wunɛ tîki kelna ɓeya mɛkele hɛnɛ.

23 Njambiyɛ te ɛ nyɛ tɛte kɔ kêl nde, joŋgwɛ ɗyun hɛnɛ ɓɛ̂ki pupunate kɛ mbɔmbu wenɛ. A ɓâkiɗya mɛtemɔ mun nɛ̀ joŋgwɛ ɗyun nɛ̀ mɛyotu mun hɛnɛ nɛ njololo kumɔ kɛ ŋgimɔ te yi Nyaŋgwɛ Kumande wusu Yesus Krist ta nje kɛ́. 24 Yɔkɔ ɛ jeɓa wunɛ kɔ ta kelɔ yasi te yi nyɛ ma kpo kɛ́ gbate, kɛto nyɛ yɔkɔ ɛ tonjɛ mɛyasi hɛnɛ te yi nyɛ kpo kɛ́. 25 Wunɛ njɔŋ, wunɛ ŋgwɛ̂taŋgwɛ nɛ Njambiyɛ kɛto su. 26 Wunɛ nyɛ̂n ɓenjɔŋ ɓusu hɛnɛ wuse ɓo nɛ kimɔ temɔ te yi Njambiyɛ. 27 Mi kɛ kombile lɛpɔ nyɛ wunɛ nɛ ɗinɔ Nyaŋgwɛ Kumande nde: Wunɛ tɔ̂l mɛkana maka nyɛ ɓenjɔŋ ɓusu hɛnɛ. 28 Ŋgikwa te yi wulɛ kɛ yi Nyaŋgwɛ Kumande wusu Yesus Krist ɓɛ̂ŋnaŋgwɛ pɛ wunɛ.