4
1-2 फरी मिँराए गेचलननी तोबो मिसाल झाःद ङायाचिरिज़्या। तोबो छोर्या ओमाछिप्द ज़ ओबाबु उसिकिन नोए ओबताहा ओल ओमाछिपा पै छुतए धानिदिज़्याव। नो बताहा छोर्याए उमीं ओतादी ब नो धानिदिज़्यावए उधूँल लिद ओबाबुए ओय़ेन दाज़्यावरास तोबो मिताव ज़ ताज़्या।
3 हिताव ज़ गे ब ङ़ादा मानुवाताव चाल चलनराए धूँल माछिप्तावर गेल्यो।
4 खाली बेला ओयो·वत परमेस्वरए ओज़ालाई परींक्यो। तोबो मेंमानी कानुनए उधूँल जर्मिद,
5 गे परमेस्वरए ओबताहा दैव ओज़ार तान्याए जूँनी कानुनए उधूँल लिज़्यावरालाई गेएः फो·द्याद ऱास्सिक्यो।
6 गे परमेस्वरए ओज़ार गेतावए ओज़ाए उपुरूस गेयुँल झाःद्याद, नो पुरूसए ज़ परमेस्वरलाई ‘अब्बा, बाबु’ है ल्यो ब परींसिज़्याव।
7 हाःकिन गे बाँदाल मागनिसिद, ओज़ार गेगनिसिके। ओज़ार गेतावए ओबताहा दैन्यार ब गेताके।
पावलए उयुँ थू ओताव
8 खाली जे ङ़ादा परमेस्वरलाई मासरेस्द देवताराए याबाँदा जेल्यो। नोर ते परमेस्वर माःक।
9 आज्याल ते परमेस्वरलाई जेसरेस्ज़्या, परमेस्वरए जेलाई ब सरेस्चिज़्याव। है जैद जे निताव ताव मिँर कै जैद जेछींदा ओल्द माथ॰रिउ ओर्सा माल्यो थालनलाव पाँदा ज़ बाव जेपैंज़्याव? नितावए ते फरी ब बाँदा ज़ जैसिउ जेपैंके।
10 जे नो कानुननिकाव अऩाकलाव पर्बर, बारर, मैनार स़ोनो बर्सर ब जेमानिज़्या दी।
11 जेक्याँताव ङादोव य़ेन ते अऩाकलाव ज़ ताए सैं लिद ङायुँ थू ताज़्या।
कै जैद जेयुँ ङाल्योनी तँदा ओबाव?
12 अ ङानैं ङामेंर, जेस ङापाँ तोबो लिज़्या। ङा कानुन धूँनी हाइसिद जे मिताव मायहूदी ङाजैसिके, जे मनी ङा मिताव जैसिचिके।
जे ङालाई माचाव काता ज़ जेमाजैनाए।
13 जे ज़ जेसैंज़्या, जेल्योङ ङाजोरो हुद ङाथलिउए ङाल्योनी परमेस्वरए ओपाँ थैव जेदैके।
14 हाः बेलाक ङाबेथा बनै माचाव ओतावए जेलाई दुख ताद ओल्यो। हितावत ब जेयुँ जाम्द जेसुम्नाके। झन ङालाई परमेस्वरए ओचाकर्या मिताव रँःद येसु ख्रीस उहुव मिताव जेजैनाके।
15 हाः बेलाकाव निताव ङाल्योदा ल्यो जेमया आज्याल कै ओताव? ङा जेसाची ङालिज़्या, हो बेलाक ते जेधुकिन जेमी कोला·द ङालाई यान्याकावर ब जेल्यो।
16 आज्याल फरी साचो पाँ सतैंद ङायाचिउए जेसुतुर मिताव जेजैनाव रो?
17 नो जेल्योङाव तँनी पैज़्यावराए जेलाई याल्योदा जैन्याए जूँनी बनै उदिम दोज़्यार। नो यादोज़्याव चावनी माःक, जेलाई ङाल्योनी फातैद लाँव यापैंज़्याव वाज़ ची।
18 चाव य़ेनत उदिम यादोज़्याव ताकिन ते चाव ज़, खाली ङा जेल्योङ ङालिक वाज़ माःक, एकम्न्या निताव ओताक।
19 अ ज़िम्ज़ा ङाज़ार, जे ख्रीसए ओगे चावस जेमारैवा पै किताव ज़ा दैन्या मेंमा ओघर्लिज़्याव, ङा ब हिताव दुखल ज़ ङालिज़्या।
20 ङा जेस जाँवा पै सिप ल्यो ङादैकिन ताखेहो है ङालिज़्या। हो ताकिन इताव नासो पाँर जेलाई है दाव ब मापरिखेहो। खाली ङा आः तादानी जेस कै जैद पाँन्या, ङामासैंए।
बाँदानीकावर स़ोनो फुर्सुलनिकावर
21 जे मोसाए ओकानुन धूँल ल्यो पैंज़्यावराए आव धर्मसास्त्रलाव पाँ जेमाथैए रो?
22 नल सर्सिउ लिज़्या, अब्राहामए ओज़ानी ऩेब्लो निल्यो, तोबो बाँदानी बातनिकाव, तोबो फुर्सुल बातनिकाव।
23 नो बाँदानी बातनिकाव मिँए ओपैंज़्यावनी ज़ जर्मिके, फुर्सुल बातनिकाव फरी परमेस्वरए ओयो य़ाकानी ज़ जर्मिके।
24 नो मेंमानी निक्याँत ऩेब्लो बाचा रैंःज़्या। नो बाँदानी हागार सीनै खागरताव बाचा स्यासो लिज़्या। नल लिज़्यावर हागार बातनिकाव बाँदा मितावर लिज़्यार।
25 आज्यालकाव यहूदी धर्मलाव मिँर ब नो कानुन धूँल यालिज़्यावए अरब देसलाव सीनै खागरत हागारस यालिज़्याव स्यासो ज़ लिज़्या।
26 गे स्वर्गताव यरूसलेमलाव मिँर ते अब्राहामए ओज्या स्यासो फुर्सुल बातनिकावर गेलिज़्या।
27 धर्मसास्त्रल ब इताव सर्सिउ लिज़्या,
“अ ज़ा मादैन्या थारी मेंमा, नयुँ होलाँ जैके।
ज़ा दैन्या नक्याँत मापरिउ, नरेंतए स़ास्निके।
काराव ल्यो ताकिन ओरेस लिज़्याव मेंमाए ओज़ाराकिन,
नरे माल्योए नज़ार कुधु तान्या लेर।”
28 ङानैं ङामेंर, जे इसहाक स्यासो परमेस्वरए ओय़ाकानिकाव ओज़ार जेताके।
29 किताव ङ़ादा मिँए ओपैंज़्याव मितावनी जर्मिउ इस्माएलए परमेस्वरए उपुरूसनी जर्मिउ इसहाकलाई ओसोज़्याव, आज्याल ब हिताव ज़ लिज़्या।
30 है जैद धर्मसास्त्रल अइ लिद सर्सिउ लिज़्या,
“नो बाँदानीलाई ओज़ास निखेपैके।
नोए बताहा मादैव।
फुर्सुल बातनिकावए वाज़ दैरिज़्याव।”
31 है जैद ङानैं ङामेंर, गे ब बाँदानीकावए ओज़ार माःक, फुर्सुलनिकावए ओज़ार गेलिज़्या।