एफिसीरालाई
पावलए परींद ओरायो चिथी
आव चिथी एफिसस सहरलाव मन्दलीलाई पावलए झ्यालखानानी परींद ओरायो ज़ (एफिसी ३:१)। ङ़ादा पावल एफिससल स़ोंरिम लिद नल परमेस्वरए ओपाँ ओरासथैज़्याव (ओसाचीर १९:१-४१)। आव चिथील मिँरालाई परमेस्वरए येसु ख्रीसनी ओलस ज़ ओरासखैव (एफिसी १:४), स़ोनो प़ाइँए याङ़ैताव ब ओज़ालाई ज़ जैद ओरायो सरैंःसिउ लिज़्या (१:१०,२२)। ननी ज़ मिँर जो जातलावर तादी ब (२:१४-१५), ओज़ार ताद येसु ख्रीसए ओल्योनिकाव यादैज़्याव असिकर धोल पोगोल ज़ रैंःज़्यार (१:६-८)। है जैद मिँरालाई कितावनी खुल्द ओरानैज़्याव, हितावनी ज़ दोव ताके (४:१,१५)।
1
1 ङा पावल, परमेस्वरए ओखतैनाव येसु ख्रीसए ओसाचीए ङाल्योनी जे एफिससलाव येसु ख्रीसए ओसतत लिज़्याव, परमेस्वरए छैंव उमींरालाई आव चिथी परींद ङायाचिज़्या।
2 परमेस्वर गेबाबु स़ोनो गेप्रभु येसु ख्रीसनी जेल्योदा नियुँ गराँद जेयुँ होलाँ जैद ओयाचिरक।
येसु ख्रीसनिकाव असिकर
3 गेप्रभु येसु ख्रीसए ओबाबु परमेस्वरए उमिन बनै ओघ्योःक। नोए गेलाई ओल ओज़ा येसु ख्रीसए ओक्याँत ज़ स्वर्गताव लिज़्याव अचम्बलाव असिकर गेपुरूसए उजूँनी ज़ जोरैद नैद्यासिउ।
4 ङ़ादा ओल ज़ गेलाई, ‘ङाङ़ाक याखत माल्यो छैंवर घतारक’ लिद नाम नम ओमाजैद ज़ ओज़ा येसु ख्रीसए ओदोव य़ेननी ज़ छाँतिद ओनैसिज़्याव।
5 निताव छाँतिद ओनैसिज़्यावराए गेल्योदा उयुँ थू जैद येसु ख्रीसनी ओज़ार जैन्या ब थ·रैद ओनैसिज़्याव। नो ओल ओपैंज़्याव मितावनी ज़।
6 परमेस्वरए गेल्योदा उयुँ गराँद तोबोका तोबो उयुँलाव ओज़ाए ओक्याँत निताव असिकर अइज़ जोरैद ओयासिउए उमिन ब सघ्योःद गेएज़्या।
7 नो ओज़ा येसु ख्रीसए उजिउ झाःद उझी सोभोद ओयासिउए गे गेदोव पापए सजा भरी फो·द्यासिक्यो, परमेस्वरए ओकानुन गेबले·व ब क्याल्द्यासिक्यो। परमेस्वरए नाःल्दिउ य़ेन दाद ओयासिउ ते घ्योःव ओदयानी ज़।
8 नो ओदया गेक्याँत थुद्याद अचम्बलाव उबुद्धी ब धोल पोगोल ज़ याद नैसिउ।
9 नो ओज़ानी ज़ अचम्बलाव ओगोइँनी ओल है उलिज़्याव मितावनी ज़ ङ़ादाकिनकाव कप्सिउ सुए ज़ यामासैंताव य़ेनर दाव ओपैंज़्याव ब सतैंद्यासिक्यो।
10 नो आज्याल सतैंद ओयासिउ ओय़ेनर आवर ज़ — ओल गोइँद ओनैज़्याव बेला ओयो·वत ज़ ओराजैव भरी, नामलावर तादी ब, नमतावर तादी ब, ओज़ा येसु ख्रीसए उधूँल याजैक्यो।
11 ओल ओबताहा दैन्या उमींर जैन्याए जूँनी गेलाई ख्रीसए ल्योनी ङ़ादाकिन ज़ छाँतिद ओनैसिज़्याव। परमेस्वरए ओय़ेन भरी ङ़ादा ओल उयुँल थ·रैद ओदोज़्यावए गे हुनी ज़ ताद गेले।
12 परमेस्वरए फरी गे ङ़ादाकिन ज़ ख्रीसलाई गेयुँ हुप्द ओक्याँत ख्यासिद लिज़्यावरालाई उमिन सघ्योःद्यन्याए जूँनी खतैद नैसिउ।
13 जे ब ख्रीसनिकाव अजम्बरी जुनी यान्या साचो ओथा थैद जेयुँर सुहुप्द ओपाँत जेहुके। ननी ज़ जे परमेस्वरए ओय़ाकालाव छैंव पुरूस दैद ओज़ाए उमिनत थामिद नैसिउर जेताके।
14 नो ओयासिउ पुरूस गे उमींरालाई चबनै फुर्सुल जैद ओराएरिज़्याव बताहा ओमायासिवा पै, ‘ङाज़ारालाई अजम्बरी जुनी यान्या ङाले’ लिद बैना याद नैसिउ। ननी ब ‘ङामिन सघ्योःद घयाँरक’ लिद परमेस्वरए निताव य़ेन दोद्यासिक्यो।
पावलए असिक ऩिद ओरायो
15 जे, गेप्रभु येसु ख्रीसलाई जेयुँ हुप्द परमेस्वरए छैंव उमींराए ल्योदा जेयुँ थू जैद नोरास खैद जेलिज़्या दी लिन्या ङाथैक,
16 जेजूँनी परमेस्वरलाई ङापोंखारिउ पती धन्याबाद चरैःव ज़ ङानैज़्या।
17 गेप्रभु येसु ख्रीसलाई परींज़्याव ज़गै मगैव परमेस्वर गेबाबुए ओललाई सरेस्धुन्या ओसक्तीर, ओल उबुद्धीर ब ओयाचिउक लिद ङापोंखारिज़्या।
18 स़ोनो परमेस्वरए उखुल्चिज़्याव अजम्बरी जुनी आः चाव उलिज़्याव ओल्यो लिन्या जेयुँल ज़ थ·रैधुन्यार ओतारक लिद ब ङापोंखारिज़्या। गे छैंव उमींरालाई बनै अचम्बलाव युँ होलाँ दाव पाँर थ·रैधुन्यार ब ओजैचिउक।
19 झन गे ओललाई गेयुँ हुप्ज़्यावराए जूँनी दाद ओयासिज़्याव ओसक्तीलाव य़ेनर आः चावर ची यालिज़्याव ओल्यो लिन्या थ·रैधुन्यार ब ओजैचिउक।
20 नो गेजूँनी दाद ओयासिज़्याव ओसक्ती, ख्रीसलाई सिउनी ओसोचोइव ओसक्ती ज़। हो ओसक्तीए ज़ फरी ख्रीसलाई स्वर्गताव ओमान ल्यो पोल नैक्यो।
21 ख्रीस नो पोल आव जुकल तादी ब, हुन्या जुकल तादी ब, नाम नमलाव लिज़्याव भरिराए याङ़ैताव ज़ ताके। है जैद घेप्पा मिन दैवर तादी ब, राजार तादी ब, दै देवतार तादी ब, स्वर्गताव चाकर्यार तादी ब,
22 परमेस्वरए प़ाइँ जात ज़ ओज़ाए उखँ धूँल झाःद ब एक्यो, मन्दलीए जूँनी ओज़ालाई प़ाइँए ङ़ैताव ब जैक्यो।
23 मन्दली ख्रीसए ओक्याँ ज़। है जैद नाम नमलाव प़ाइँ सयो·ज़्याव ख्रीस नो मन्दलीनी यो·व ज़ ताज़्या।