6
1 गे परमेस्वरस सिप य़ेन दाज़्यावराए जेलाई है गेदाचिज़्या, जेल्योदा परमेस्वरए उयुँ ओगराँव अऩाकलाव ताजैच्यो।
2 धर्मसास्त्रल ब परमेस्वरए है लिज़्या,
“ङायुँ ओनाव बेलाक ज़ जेपाँ ङाथैके,
जेचाहित ओताव छ्याम ज़ ङासघैचिके।”
है जैद ङा जेलाई है ङादाचिज़्या, परमेस्वरए उयुँ ओनाव छ्याम ब आछिम ज़, जेचाहित ओताव छ्याम ब आछिमकिन ज़।
पावलए उदुखर
3 गे परमेस्वरए ओय़ेन दान्यात ओपाँःच्या ल्यो कान्त ज़ ताताक लिद सुलाई ज़ यायुँ केःद्यान्या य़ेनर गेमादोए।
4 बुरू प़ाइँ सहिद परमेस्वरए ओसेवा दान्यात सतैंद नैसिउ मितावर गेजैसिज़्या। है जैद दुखल तादी ब, अखत्याल तादी ब, धो सहिउल तादी ब,
5 गेलाई यारीःसिदी ब, झ्यालखानाल याझाःसिदी ब, भोरो·सिद याझ्याम्सिदी ब, गेदोज़्याव य़ेनलाई माऱास्द कैताक मास्याँद तादी ब, तुर्द तादी ब, धामास ज़ गेदोज़्या।
6 है जैद गे बनै छैंव युँस, चाव माचाव सैंद, माचाव भरी गाल्द प़ाइँए जूँनी ज़ गेदोज़्या। परमेस्वरए उपुरूसनी प़ाइँए ल्योदा गेयुँ थू जैद,
7 परमेस्वरए ओसक्तीनी ओपाँ सतस गेरासथैज़्या। वोर्फताव गेकुइत स़ोनो दाबर्याफताव गेकुइत परमेस्वरए ओय़ेन दान्यात चाहिज़्याव हत्यार भरी रैद गेनै।
8 गे कैताक बीज्यात मनी गेताज़्या, कैताक इज्यात मनी गेदैज़्या। फरी कैताक चाव मिन ब हुज़्या, कैताक माचाव मिन ब हुज़्या। गेलाई छुल्यार है यादासिदी ब साचो ज़ गेथ॰रिज़्या।
9 कान्ल ज़ मागनिसिउर यारँःसिदी ब गनिसिउर ज़ गेलिज़्या, सिउ मितावर गेलिदी ब बाँचिउ ज़ गेलिज़्या, सजा धूँल यानैसिदी ब गेपोहोन ते माबाए।
10 फरी सोगो धूँल गेलिदी ब रेंव ज़ गेलिज़्या, काता ज़ माल्यो मितावर गेलिदी ब प़ाइँनी यो·वर ज़ गेलिज़्या, फरी गरीब मितावर गेतादी ब प़ाइँ मिँरालाई धनी मितावर गेराजैज़्या।
गेलाई जेयुँर फैद्यासिचिके
11 अ कोरिन्थलाव गेनैं गेमेंर, गेय़ेन भरी काता ज़ माम़ोंसिद गेदाँजीं ज़ सतैंद गेयाचिके।
12 खाली गेयुँर फैद गेयाचिदी ब जे ते जेयुँर फैव जेमाभैंःके।
13 ङा जेलाई ङाज़ा मितावर जैद ङासम्जैचिज़्या, गे गेदोज़्याव मिताव जे मनी गेलाई जेयुँर फैद्यासिचिके।
यायुँ माहुप्ज़्यावरास मानारिसिन्या
14 जे परमेस्वरलाई यायुँ माहुप्ज़्यावरास तोबो कुमत तानारिसिच्यो। धर्म स़ोनो अधर्मनी माखैनी, चुम चुमो स़ोनो पलाँवनी ब माखैनी।
15 हिताव ज़ फरी ख्रीस स़ोनो सैताननी ब माखैनी। है जैद परमेस्वरलाई उयुँ हुबो स़ोनो उयुँ माहुबोनी कातानी निखैरिज़्याव?
16 परमेस्वर लिन्या ध्यान झ़िम स़ोनो मिँए जैसिउ अङग्यानी ब कातानी निखैरिज़्याव? परमेस्वर लिन्या झ़िम ओललाई उयुँ हुप्ज़्यावए उयुँल ज़ ताज़्या। धर्मसास्त्रल ब परमेस्वरए है लिज़्या,
“ङा जेक्याँत बास दाद जेस ज़ आदा होदा ङालिरिज़्या।
ङा जेपरमेस्वर ज़ तान्या ङाले,
जे ङामींर ज़ तान्या जेले।”
17 है जैद परमेस्वरए है लिज़्या,
“नोराए खार्नी पुलुस्द जेबातङ लिचिके।
अऩाकलाव माचाहिउर काता ज़ जेमाछुकिन,
ङा जेलाई ङाल्योदा रैद,
18 ङा जेबाबु तान्या ङाले,
जे ङाज़ार तान्या जेले।
आव है लिज़्याव ङा माहान परमेस्वर ज़।”