12
पावलए ओरँःव अचम्बलाव पाँर
1 ङा इताव सघ्योःसिद पाँन्या माचाहिउ य़ेन मिताव उलिदी ब आथ पाला ते जेजूँनी ओचाहित ल्यो ज़ तारिज़्या। है जैद प्रभुए ङाङ़ाक सरैंःद ओयाँव अचम्बलाव पाँर तोबो ऩेब्लो है ङादाचिज़्या।
2 ख्रीसलाई उयुँ हुबो तोबो मिँ चौध बर्स ङ़ादा प़ाइँरानी झेंःव पो स्वर्गत परमेस्वरनी ज़ छींसिद बाके। खाली ओक्याँस ओबाव सैं ओक्याँनी पुलुस्द ओबाव ओताव ङा ङामासैंए, परमेस्वरए वाज़ सैंज़्याव।
3-4 नल सुए खामल ज़ माल्यो अचम्बलाव पाँर थैक्यो। नो स्वर्गत बाव ओक्याँस ओबाव सैं उपुरूस ओबाव ओताव ङा ङामासैंए, परमेस्वरए वाज़ सैंज़्याव।
5 नो बाव मिँए उजूँनी वाज़ सघ्योःद ङापाँज़्या, ङानी ते ङामासघ्योःसिए। ङा ङाजूँनी ङापाँज़्याव ते ज़िम्ज़ा ङारैंःवनी वाज़ ङापाँज़्या।
6 सघ्योःसिद ङापाँदी ब नो पाँ थ॰रिउ ओतावए उर्ती माल्यो ङामाथ॰रिए। खाली मिँराए ङाक्याँताव याथैज़्याव यारँःज़्यावकिन चा·सिउ ताताक लिद आगल्या ङामापाँए।
परमेस्वरए ओसक्तीर पावलए ओक्याँत रैंःज़्या
7 नो ङ़ादा ङारँःव पाँर बनै अचम्बलावर यातावए, ङालाई नो पाँरानी तासघ्योःसिक लिद परमेस्वरए ङाक्याँलाई ख्यो·न्या तोबो ज़ु मिताव याद नैनाव। ननी ङालाई सैतानए ओचाकर्याए दिनकाव ज़ ओख्यो·नाज़्याव मिताव लिज़्या।
8 आव दुख ङाक्याँनी उपुलुस्क लिद प्रभुलाई स़ोंखेप बिन्ती ङाचरैःके।
9 खाली प्रभुए ङालाई, “ङायुँ नल्योदा य़ाल्द ङासघैनिज़्याव नँस धोल पोगोल ज़ ताज़्या। ङा ङासक्ती मिँराए यामादोधुज़्यावल ज़ रैंःज़्या,” है दाँक्यो। है जैद ख्रीसए ओसक्ती ङाक्याँत ज़ ओरैंःक लिद ङानी ङामादोधुज़्याव पाँलाई सघ्योःन्यात ङालाज माहुद खुसीस ङापाँज़्या।
10 है जैद ङा ख्रीसए ओय़ेनत ङार्सा ओमालिदी ब, ङालाई बीज्यात याजैनादी ब, ङाखिरी पसिद दुखर यायाँदी ब, उस्किउ मादैन्या मितावराल ङापरिदी ब नो भरिल रेंव ज़ ङालिज़्या। निताव ङार्सा माल्योल ज़ झन परमेस्वरए ओसक्तीर ङाक्याँत ज़ रैंःज़्या।
काराव जेयुँल सिल्द जेनैनाज़्याव?
11 ङा निताव फदवाल्या ङाजैसिउ जे जेघलैनावनी ज़ सानी। खास नो ङापाँव पाँर थ·रैद ङादोव य़ेन सघ्योःद्याव परिन्यार ते जे जेल्यो। ङा कान्ल ज़ मागनिसिउ मिताव ङालिदी ब नो स॰द सघ्योःसिद ख्रीसए ओहक दैव जैसिज़्यावराकिन ङा कान्त ज़ ज़िम्ज़ा ङामाले।
12 ङा जेल्योङ ङालिज़्याक ब ख्रीसए साचो ओसाचीए सतैंव परिन्या अचम्बलाव य़ेनर, अचम्बलाव सरेसर बनै धामास ज़ ङादोके।
13 जे पो पोङाव मन्दलीराकिन कातार छ्या जेदैव मिताव जेङम्सिज़्याव? सैं जेल्योनी काता ज़ मारैद ङादोवनी जेयुँ उहुर्ज़्याव? हिताव ताकिन काराव ङालाई जेयुँल सिल्द जेनैनाज़्याव?
14 आथ पालाकाव हुव ङापैंज़्यावस जेल्योङ हुन्या स़ोंखेप तारिके। आथ पाला ब कान्त ज़ घचैन्या ङामाले। ङा जेस लिज़्याव जेसम्पतीर ङाखिम्हुज़्याव माःक, जेलाई वाज़ ङाखिम्हुचिज़्याव ची। याज़ाराए याबाबु याआमाराए जूँनी मादुप्र, याबाबु याआमाराए ची याज़ाराए जूँनी दुप्र।
15 है जैद ङा मनी जेजूँनी ङाजिउए मया मादाद ङास लिज़्याव भरी खेम्द तादी ब ङाक्याँलाई सख्यूद तादी ब रेंद ज़ ङादोज़्या। जेल्योदा ङायुँ थू ताद नाःकाव ङादोवनी जे ङागुन छ्या ज़ जेरँःज़्याव रो?
16 हैज़ जेलिकिन्दा हैज़ लिज़्याचिके, ङा दासर जेल्योनी खर्क ज़ कातार रैद ङामाघचैचिए जे ज़ जेसैंज़्या। सैं बाथो जैसिद तँनी झुकैद ङाहाइचिज़्याव जेथ·रैनाज़्याव?
17 नो जेल्योदा ङारापरींवर जेलाई हाइद ज़्यान्याए जूँनी ङारापरींव ते माःक।
18 ङा तीतसलाई ओनैंस जेल्योदा ङानिपरींक मनी जेलाई कातार हाइद माज़्युखिनिहो। तीतसस गिनयुँ तोबो ज़ लिज़्या, तोबो युँनी ज़ गिन्दोज़्या।
जेल्योङ ङाहुक सुस ज़ ङारिस चोव ताताक
19 ङानैं ङामेंर, आव गेपाँर जे गेपाहा झाःद जेयासिउनी झेंःसिउ गेपैंज़्याव ते माःक, आव पाँर परमेस्वरए ओङ़ाक ख्रीसस लिद जेलाई पाथ पारैन्याए जूँनी गेपाँज़्याव ची।
20 खाली ङा जेल्योङ ङाहुक ङायुँलाव मितावर जेमाताए सैं लिद जाँ ङाछे·ज़्या। हिताव ताकिन ते ङा मनी जेयुँलाव मिताव ङामाताए सैं। जेखार्ल इ़सिन्या, अर्काए ओक्याँत मी तून्या, रिस चोन्या, क्याँलाई तान्या वाज़ खिम्न्या, अर्काए उछींनी पाँद उमिन बले·द्यान्या, स॰द सघ्योःसिन्या, सुस ज़ माखैव तान्या, नितावर जेले सैं लिन्या ङाङम्सिज़्या।
21 जेल्योङ ङाहुक परमेस्वरए ओङ़ाक जेलाई रँःद लाज मोर्नो ङाताए सैं लिन्या छ्यास ब लिज़्या। नो ङ़ादाकिनकाव जेल्योङाव फुरी य़ेन दाद पातर्या पातर्नी जैसिज़्यावर, जोत ब यायुँ मानैधुद मादान्या य़ेन दावर परमेस्वरए ल्योदा यायुँर माफर्कैद हिताव ज़ यालिकिन ङासोगोए भुतुक तान्या ङाले।