कोरिन्थीरालाई
पावलए छींनीकाव परींद ओरायो चिथी
पावलए कोरिन्थ सहरलाव मन्दलीलाई उस॰कताव चिथी परींद ओरायो छींनी छुत चिथी मनी तोबो सर्द याएक्यो। नो चिथील कोरिन्थीराए यायुँ क़्याके काना लिद ओसोगोए फरी छींनी आव चिथी सर्द याएक्यो (२ कोरिन्थी २:३-४; ७:८-९)। झन ख्वा ख्वा धुतनी पैज़्यावराए पावलए ओपाँलाई सज़िम्द बले·द्याव यापैंज़्याव (११:४-५; १२:११)। है जैद आव चिथील नोराए जूँनी पावलए परमेस्वरनिकाव ओदैव हक सतैंद ओरायो सरैंःसिउ लिज़्या (१०:१–१२:१०)। पावल कोरिन्थीराए याल्योदा ओमाहुद यरूसलेमलाव गरीबराए जूँनी भिती दुप्द ओनैरक लिन्या मनी सरैंःसिउ लिज़्या (९:३-५)।
1
1 ङा पावल, परमेस्वरए ओखतैनाव येसु ख्रीसए ओसाची, स़ोनो ङास लिज़्याव गेभाइ तिमोथीस गिन्ल्योनी कोरिन्थलाव परमेस्वरए ओमन्दलीलाई स़ोनो अखैया खन्दलाव छैंव उमीं भरिरालाई आव चिथी परींद गिन्याचिज़्या।
2 परमेस्वर गेबाबु स़ोनो गेप्रभु येसु ख्रीसनी जेल्योदा नियुँ गराँद जेयुँ होलाँ जैद ओयाचिरक।
युँ होलाँ जैद्याज़्याव परमेस्वर
3 गेप्रभु येसु ख्रीसए ओबाबु परमेस्वरए उमिन बनै ओघ्योःक। नो गेल्योदा उयुँ नाज़्याव गेबाबु ज़, गेयुँ होलाँ जैद्याज़्याव गेपरमेस्वर मनी ज़।
4 नोए गेदुख भरिल गेयुँर होलाँ जैद ओयासिज़्यावए गे मनी हितावनी ज़ छुतरालाई यादुखराल यायुँर होलाँ जैद्याद यायुँर सझेंःद्यान्यार ताव परिके।
5 गे ख्रीसए उमिनताव दुखर खा गेदैज़्या, हाःज़ ख्रीसए उमिननी परमेस्वरए गेयुँर होलाँ जैद यासिज़्याव।
6 गे परमेस्वरए ओपाँ सथैज़्यावराए उमिनताव गेदैज़्याव दुखर जेजूँनी ज़। जे ननी ज़ अजम्बरी जुनील बान्या येम ब जेदैके। हिताव ज़ नो गेदैज़्याव दुखराल परमेस्वरए गेलाई गेयुँर होलाँ जैद ओयासिज़्यावए जेलाई मनी निताव दुखर जेदैक जेयुँर सघ्योःद्याद सहिधुन्यार जैचिज़्याव।
7 है जैद गे ननी ज़ जेल्योदा गेयुँ हुबो लिज़्या। कैताराक जे मनी गे गेदैज़्याव मिताव दुखर जेदैक, गे किताव गेदुखराल गेयुँर होलाँ ओताज़्याव, जे मनी गेस सिप ज़ जेयुँर होलाँ ओताक।
8 जे ङानैं ङामेंर, ङासकाव लिज़्यावरास एसिया खन्दलाव गेदैव दुखर जे तखेप थैचिके। हो बेलाक नलावर गेखिरी यापसिक गे सही ज़ मासहिधुन्या दुखर दैद, ‘अब ते सिन्या ज़ गेताके ब’ लिद हार ज़ गेमानिके।
9 नो दुखर अब ते ङाथ·रैके, गे ननी पुलुस्न्या काताए आस ज़ ओमाल्योए, गे गेक्याँत माःक, सिउरालाई सोचोइज़्याव परमेस्वरए ओक्याँत ख्यासिद ल्यो परींन्याए जूँनी ची नै गेताव ओल्यो।
10 गे निताव सिउल गनिसिउरालाई परमेस्वरए जोगोइद निताव दुखरानी पाथस पले·सिक्यो। आकिनी ब पले·न्या ज़ ले लिद गेयुँ हुबो ज़ लिज़्या।
11 जे मनी गेलाई ‘परमेस्वरए पाथस ओरानैवक’ लिद पोंखारिद धुरिद्याव ताके। हो ताकिन जेपोंखारिउ परमेस्वरए थैद गेलाई असिक ओयासिज़्याव रँःद कुधुए गेजूँनी धन्याबाद चरैःन्या लेर।
पावल कोरिन्थल हुन्या दिलो ओदोव
12 आव तोबो पाँत गेसुनी च्याँःसिउ ज़ लिज़्या, जेस स़ोनो छुतरासकाव गेदोव य़ेन भरी छैंव युँनी सतस ज़ गेदोके लिद गेयुँ हुबो ज़ लिज़्या। नो भरी आव मानुवाताव मिँराए बुद्धीनी गेदोव माःक, परमेस्वर गेल्योदा दाइनो ओतावए गेदोव ची।
13 जे माप़रिधुन्या स़ोनो मातीधुन्या पाँर काता ज़ गेमासरे। है जैद ङाआस आव ज़,
14 जे गेलाई आःपै चबनै जेमाथ·रैसिदी ब तछा गेय़ेन भरी थ·रैद साचो ज़ ची ओल्यो लिद गेप्रभु येसु उहुन्या छ्याम गे जेलाई रँःद गेलाज ओमाहुज़्याव मिताव जे मनी गेलाई रँःद जेलाज माहुन्यार जेताकिन ताखेहो है ङालिज़्या।
15-16 ङापाँ भरी तीद ङालाई ब यायुँ हुप्खेहो ज़ लिद ङा माकेदोनियादा बान्या थ·रैद, ङ़ादा जेल्योक हुद जेल्योलाव घ्याँ बान्या ङाथ·रैके। हो ताकिन आनी ङाबाक ब, हुनी ङाहुक ब यास ऩेखेप दैसिउ दैन्या ङाले है ङालिके। फरी ननी यहूदियादा ओल्द ङाबाक मनी सघैनार्या है ब ङालिके।
17 खाली जेल्योदा हुव ङामादैवए उकिला माल्यो मिताव ब जेरँःनाज़्याखेहो। यातिर वाज़ दोज़्याव मिँराए होक ज़ हैज़ हैज़, होक ज़ माःक माःक है यालिज़्याव मिताव ब जेथ·रैनाज़्याखेहो।
18 है जेदाँदी ब ओल परमेस्वर सतस उलिज़्याव मिताव ङा ङापाँ ब जेजूँनी आव ताक्या, हो ताक्या है लिन्या स्यासो माले।
19 गे सिलास तिमोथीरास जेलाई परमेस्वरए ओज़ा येसु ख्रीसए ओपाँ गेसथैचिउ भरी ‘आव सैं हो सैं’ है लिन्या ओमेला ज़ माले, परमेस्वरए ओल्योनिकाव साचो थ॰रिउ पाँ ज़ याद गेनैचिए।
20 परमेस्वरए भाःकिनकाव मिँरालाई ओरायो य़ाका भरी ब ओज़ाए ओक्याँत ओयो·व साचो ज़। है जैद गे मनी नो ओपाँलाई ओज़ाए उमिननी ‘आमेन’ है गेलिज़्यावनी परमेस्वरए उमिन सघ्योःद गेएज़्या।
21 जेलाई गेस सिप ज़ छाँतिद ख्रीसए ओक्याँत थ॰रिउ जैज़्याव मनी ओल परमेस्वरए ज़।
22 फरी नोए गेलाई ‘ङामींर ज़’ लिद छाप झाःद बैनाए जूँनी गेयुँल छैंव उपुरूस ब याद नैसिउ।
23 खास ते जेलाई ङारिसनी जोगोइन्याए जूँनी कोरिन्थल जेल्योक हुन्या ङातेन्सिके। धुत ङामापाँए, परमेस्वर साची लिज़्या।
24 गे जेलाई परमेस्वरए ओपाँत कर गेमालैचिए, काराव ल्यो ताकिन जे ज़ ओपाँत थ॰रिउर जेलिज़्या। गे गेय़ेन ते जेस तोबो ताद जेयुँर होलाँ जैद्यान्या वाज़ लिज़्या।