3
माखैवरालाई सुधारैन्या
1 अ ङानैं ङामेंर, ङा जेस ङालिज़्याक परमेस्वरए उपुरूस दैवरास ङापाँज़्याव मिताव माताके। जे ख्रीसए ओबगाललाव माछिबो भाउज़ा स्यासोर वाज़ जेलिज़्यावए मानुवाताव मिँरास पाँज़्याव मिताव पाँव परिके।
2 हो बेलाक ङ़ादा ख्रीसए ओपाँ ङायाचिक ज़्याव माज़्युताव भाउज़ारालाई नुइँ याराएज़्याव मितावनी ज़ ङायाचिके, आःपै ब हाःवाकावर ज़ जेलिज़्या।
3 जे जेल सोसिन्या इ़सिन्या वाज़ ओतावए परमेस्वरए उपुरूस मादैव अइज़काव मिँ स्यासोर ज़ जेलिज़्या।
4 जे ख्वाराए ‘ङा पावलसकाव’, ख्वाराए ‘ङा अपोल्लोससकाव’ है जेलिकिन निताव जेपाँए परमेस्वरए ओपाँ मादैव स्यासोर ज़ जेलिज़्या।
5 अपोल्लोस सुदा? पावल सु? गिन परमेस्वरए सु सु गिनय़ेनत खतैद जेलाई परमेस्वरए ओयेमदा लाँज़्याव ओनोकोरनी वाज़ माःक रो?
6 ङा परमेस्वरए ओपाँत धुर वास्ज़्याव मिताव ङालिज़्या, अपोल्लोस ऱी यो·ज़्याव मिताव लिज़्या। सपरीद्याज़्याव ते ओल परमेस्वर ज़।
7 है जैद धुर वास्ज़्याव ब काता ज़ माःक, ऱी यो·ज़्याव ब काता ज़ माःक, सपरीद ओसै झाःद्याज़्याव परमेस्वर वाज़ लिज़्या।
8 धुर वास्ज़्याव स़ोनो ऱी यो·ज़्यावनी निलेखा तोबो ज़। सु सु निय़ेनए ओजेला दैरिज़्यानी।
9 गिन परमेस्वरए ओएँःल य़ेन दाज़्याव स्यासोनी गिन्लिज़्या। जे परमेस्वरए ओएँः स्यासोर जेलिज़्या, परमेस्वरए ओजैज़्याव झ़िम स्यासोर ब जेलिज़्या।
10 ङालाई परमेस्वरए ओखतैनाव य़ेनत ओल ओयाँव असिकनी ज़ पाखो भुली मिताव ङा उझ़िमलाव गज ङाथालिके। होए ओतर्त छुतए चा·ज़्याव, खाली होए जोगोइद ओचा·वक।
11 गज ते ताधुके — नो गज येसु ख्रीस ज़। परमेस्वरए ओराज्याल छुत गज माले।
12 नो गज तर्ताव याजैव सुन चाँदी तादी ब, ओएः ल्यो लुँर तादी ब, सींर छीर तादी ब,
13 परमेस्वरए फाल्न्या छ्याम मिँराए यादोव य़ेन भरी मेंःनी जाँचिन्या ले। नो याय़ेन चाव सैं माचाव लिन्या मेंःए ज़ सरैंःद्यान्या ले।
14 नो गज तर्ताव उऱिमो य़ेन उथ॰रिकिन नो मिँए इनाम दैन्या ले।
15 नो ओदोव य़ेन फरी मेंःए ज़्याद ओएकिन, ओय़ेन भरी अऩाकलाव तान्या ले, खाली ओल ते मेंःनी पुलुस्द ओबाँचिउ मिताव ज़ तान्या ले।
16 परमेस्वरए छैंव उपुरूस जेस बास दाद नैव लिन्या जेमासैंज़्याव रो? जे ते परमेस्वरए चोखो उझ़िम ताद जेले।
17 नो झ़िम छैंव ओल परमेस्वर लिन्या पो ओतावए जोए नो झ़िमलाई बले·ज़्याव परमेस्वरए नोलाई ब बले·न्या ले। नो झ़िम जे ज़।
18 है जैद जे सु ज़ ताझुकिच्यो। जोए आव मानुवाताव याथ·रैव गोइँनी “ङा प़ाइँरानी सैंन्या ङालिज़्या” है उलिकिन होए ओसघ्योःसिन्या ओऱासोक। हो ताकिन ची परमेस्वरनिकाव साचो बुद्धी दैव मिँ तान्या ले।
19 आव मानुवाताव बुद्धी परमेस्वरए ओङ़ाक ते काता ज़ माःक। नोए उजूँनी धर्मसास्त्रल इताव सर्सिउ लिज़्या,
“परमेस्वरए याबुद्धी ल्योरालाई या यापाँनी ज़ याक्योःज़्याव।”
20 फरी तोथोल,
“याबुद्धी ल्योराए याबिचार
अऩाकलाव लिज़्या लिन्या परमेस्वरए सैंज़्याव।”
21 है जैद जे मिँरालाई तारासघ्योःच्यो, काराव ल्यो ताकिन प़ाइँ जेजूँनी ज़ लिज़्या।
22 पावल तादी ब, अपोल्लोस तादी ब, पत्रुस तादी ब, ताव भरी तादी ब, सिन्या तादी ब, बाँचिन्या तादी ब, आज्यालकाव पाँर तादी ब, हुन्या पाँर तादी ब, प़ाइँ जेजूँनी ज़ जैसिउ लिज़्या।
23 जे ते ख्रीसए उमींर ज़, ख्रीस फरी परमेस्वरए उमीं ज़।