24
Isakaisi tolula si paisewa
1 Boda mabudosina metoya baisa Eroni odalela. Eroni litula taivasi Nadaba, Abiu, Eleasa, deli Itama.
2 Nadaba sola Abiu ikaligabogwasi oluviga tumasi, e matausina gala wala isim dalesi, mapaila bwadasia Eleasa sola Itama imila tolulasi.
3 Guyau Debida ivili Eroni dalela ilosi osi boda, budotala budotala makawala avaka si wotetila. E Sadoki matauna Eleasa dalela, Aimeleki matauna Itama dalela kasitaiyu ipilasaisi Debida.
4 E Eleasa dalela ikatuvaisi si boda kala bawa kweluwotala kwailima kwaitala, e Itama dalela si boda kala bawa kwailima kwaitolu, uula leivagaisi makawala paila odalela Eleasa saina bidubadu tommoyesi dala.
5 E paila bogwa isim Bwala Kwebumaboma tokaraiwogala deli Yaubada la todabala paila wotitalela tapwaroru oluwalaisi dala madalasina dilayu Eleasa sola Itama dalesi, e ikavaginasi metoya okowobobuta.
6 E taitala taitala metoya odalesi Eleasa sola Itama ivagaisi kowobobuta wotitalela. Oluvi Semaia matauna Netaneli latula, mina Libai si togini paila karaiwaga, igini yagasi matausina. E guyau Debida deli la tosikwawa, tolula Sadoki, Aimeleki matauna Abiata latula, deli tommoyesi dala madalasina tolula deli goli mina Libai dalesi, komwaidosi wala isalaisi vavagi makwaisina.
7-18 Baisa makawala kala takasa paila boda mabudosina kasi bawa budoluwoyu budovasi leisakaisi si wotetila.
| 1. | Yeoyaribi |
| 2. | Yedaia |
| 3. | Arim |
| 4. | Seorim |
| 5. | Malikia |
| 6. | Miamini |
| 7. | Akosi |
| 8. | Abia |
| 9. | Yesuwa |
| 10. | Sekanaia |
| 11. | Eliasibi |
| 12. | Yakim |
| 13. | Upa |
| 14. | Yesebea |
| 15. | Biliga |
| 16. | Imera |
| 17. | Esiri |
| 18. | Apisesa |
| 19. | Petaia |
| 20. | Yeesikeli |
| 21. | Yakini |
| 22. | Gamuli |
| 23. | Delaia |
| 24. | Maasia. |
19 Tauwau matausina leiginaisi yagasi meliloki wala makawala si wotetila paila bisusuvisi wa Bwala Kwebumaboma e bivagaisi si wotetila makawala tubusi Eroni eivitouli metoya ola kabikaula la karaiwaga Guyau matauna Isireli la Yaubada.
Yagasi mina Libai
20 Yuwoyuwela tommoyesi dala tubusia leikitetilasi metoya baisa Libai.
Yedeiya, matauna Sebweli dalela Amram tabula;
21 Isia, matauna dalela Reabia;
22 Yaata, matauna Selomiti dalela Isa tabula;
23 Yeria, Amaria, Yeasieli, deli Yekameyam, matausina litula Ebironi, molitomoya eila molagwadi;
24 Samira, matauna Maika dalela Usieli tabula;
25 Sekaraia, matauna Isia dalela Maika tuwala Usieli tabula;
26 Merari dalela, Mali, Msi, deli Yaasia.
27 Yaasia litula taitolu, Sowam, Sakura, deli Ibiri.
28-29 Mali litula taiyu, Eleasa sola Kisa. Eleasa gala litula, mitaga Kisa latula taitala, Yerameeli.
30 Msi litula taitolu. Mali, Ederi, deli Yeremoti.
E dala madilasina dalesi Libai.
31 E dala dilatala dilatala tomoyela deli tomoyela taitala bodala ikowobobutasi wotitalela bikamokwiti si paisewa, makawala wala tolula matausina, veisia Eroni dalela leivigakaisi. Guyau Debida, Sadoki, Aimeleki, deli tommoyesi dalesi tolula deli dalesi mina Libai isalaisi vavagi makwaina.