7
Isolaiya Sena Kesale Muta Koteyewi Ta:pele Tiye Sikapowemi Momateyawa Wekeye
1-2 A:pele Sipi Sa:yewi imayewi hakeyawa tekapeipe teka:tiye itapa tepela:, neyewi nano ketea papowa wekeye. Hepene sena pinipewa peleya: sosolo weyamo kukunane pinipe tesi tiye elapita: papokeye. Hepene sena pinipe amokiwa peleya: sosolo weyala, hano ka:nawemiwana ikomomita: Koteyewi ima penaiya kinisapekeye. Iyewi alopo pinipewa peleya: sosowemiwana apula: hano ka:nawemiwana apula: i sopowemiwana aloka mina:pekitise ka salikeye. Amo fo:suwemi, niye potakamake hepene sena nowa opo inisene tapowemi emi fiyanekeye. Hepene sena amowa kokolo kao tesene Kote munu telakeye. Eye hepene sena pinipema unwapo holose,
3 “Peleya: weyala, hano ka:nawana, iwala se ikomopa. Puwano niyewi hepene sena sopoke nini Kote ta: tisene sena kesale amowa ili sipupa:wemi momatelese kotetiyapola:, ikila emiwa peleya: sosolo we olokeyaleye tisaleke ililakeye.”
4 Apula: neyewi ta:takamake, “Isolaiya sena maya sopowemi sena kesale sakopolo semetei talo pinipe epela: taosene pinipe amowa (144,000) ta:pele tiyapola: sipupa:wemi momatema:na:keye,” au seyakeye.
5 Yuta sena maya sena kesale kukuluipe taosene (12,000) ta:peyakeye.
Lupene sena mayawana, sena kesale kukuluipe taosene (12,000) ta:peyakeye.
Ka:te sena mayawana, sena kesale kukuluipe taosene (12,000) ta:peyakeye.
6 A:sa sena mayawana, sena kesale kukuluipe taosene (12,000) ta:peyakeye.
Nafatali sena mayawana, sena kesale kukuluipe taosene (12,000) ta:peyakeye.
Mana:sa sena mayawana, sena kesale kukuluipe taosene (12,000) ta:peyakeye.
7 Simione sena mayawana, sena kesale kukuluipe taosene (12,000) ta:peyakeye.
Lifai sena mayawana, sena kesale kukuluipe taosene (12,000) ta:peyakeye.
Isaka sena mayawana, sena kesale kukuluipe taosene (12,000) ta:peyakeye.
8 Sepulane sena mayawana, sena kesale kukuluipe taosene (12,000) ta:peyakeye.
Yosepe sena mayawana, sena kesale kukuluipe taosene (12,000) ta:peyakeye.
Penesamene sena mayawana, sena kesale kukuluipe taosene (12,000) ta:peyakeye.
Sena Kesaleyewi Muta Sosolo Tela Eta: Akema:na: Telama Kekenawa Wekeye
9 Amo kotetiyapola:, neyewi wa:ke papowa wekeye. Sena kesale muta sosolo tela kekenesapekeye. Sena kesaleyewi muta sosolo tela kekenawa akeyawa eta: akema:na: telamakeye. Iwa peleya: sopoke emi minawa, sena maya sopowala, sena toma sopowala, sena solo sopowala, iwa sopoke inapola: Piseiki Kote sea enene emi A:pele Sipi Sa:wala enewemi, minitapowemi kekenesapekeye. Sena kesale kekenayewi tapola koiya senatolo kapela:, tiya:yewi paselepa seli tiye tiyapola: sita:nekeye.
10 Aluse sita:la:, Kotewalapulu A:pele Sipi Sa:le a:ko: wapilimita: unuwapo holose,
“Kote sea enenewana, A:pele Sipi Sa:wala niwamo mene silima:na:wa niwa a:ko:mo wapilikeye.”
11 Apula: hepene sena sopoyewi Piseiki sea pawemi hekelesa:, sena sololo tilila hekelesa:, nano falela a:pele amuna pinipe hekelesa: sita:nekeye. Aluse, iwa sopoke sita:la: Kote E sikapowemi panoka:pela:la: Kotema wapilise kisalese,
12 “Solo we henekeye. Koteo, niyewi Kema wapilise napola:tesekeye. Ke ho:liyawa sosokeye. Ke matanawa napolo hekeya sopokeye.
Niyewi Kema napolo selakeye. Ke unuwa heneye sosokeye. Keye penaiya timinisekeye.
Kewa ikila sopoke kao elaposakeye. Henekeye.”
Aluse, Kotema wapiyakeye.
13 Aputa: sena sololo tilila semetei nowamoke nema selese, “Sena kesale tapola koiya senatolo kalawa ipa:? Iwa kami tepela: minana? Keyawa matanana?”
14 Au selapita:, neyewi ema selese, “Kena, kewa matanakeye.” Apula: eyewi selese, “Sena kesale tapola koiya senatolo kalawa, Ikila Sosolo Ikomonawemi iwa emi kulukeye. Ili senato tapolawa A:pele Sipi Sa:le pepetayewi selako tiye koiya apoyakeye.
15 Alanase, Kote koawemi Kote Piseiki sea minitapowemi sita:nekeye.
Ikilalewala nukulapowala, ewamopela: iyewi tima:na: tiya:sela: sita:nekeye.
Aluse sitalapita: Kote Piseiki sea enene
Eyewi iwa pote elakeye.
16 Pote ela: iwa wa:ke mamenipesakeye. Iwa hano ma:na:tepo, auwa maselaposakeye.
Otewi ili tomawa masanaposakeye. Nano nowamokiwala ili tomawa ma kopukakepesakeye.
17 Koiyawemiye, a:pele sipi inayewi E a:pele sipi potapola: ela epapuluse,
A:pele Sipi Sa:le Kote sea pawemi ela amoke iwa aluse potapola: ili a:pele sipi inawa elaposakeye.
Potapola: ela:, iwa hano si maita: siliyapola: inaposakeye. Inapola: iyewi napita:, iwa kokolo kao sitalaposakeye.
Apula: ili ya:la siyawa sopoke Koteyewi helaposakeye.”
Aluse, sena sololo tilila semetei nowamoke nema selesapekeye.