៨៤
ទូលបង្គំស្រឡាញ់អាសនៈរបស់ព្រះអង្គណាស់!
ទំនុករបស់កូនចៅកូរេ ដែលលើកសំរាប់មេភ្លេង ត្រូវលេងដោយប្រដាប់ភ្លេងគីធីត។
១ ឱព្រះយេហូវ៉ានៃពួកពលបរិវារអើយ
អស់ទាំងទីដែលទ្រង់ស្ថិតនៅ
នោះគួរស្រឡាញ់ណាស់ហ្ន៎
២ ព្រលឹងទូលបង្គំរឭក
អើ ក៏កន្លេងចិត្ត ដោយនឹកដល់ទីលាននៃព្រះយេហូវ៉ា
ចិត្ត និងសាច់ឈាមទូលបង្គំ
ស្រែកអាល័យដល់ព្រះដ៏មានព្រះជន្មរស់នៅ
៣ ឱព្រះយេហូវ៉ានៃពួកពលបរិវារ ដែលជាមហាក្សត្រ
ហើយជាព្រះនៃទូលបង្គំអើយ
ទោះទាំងចាបក៏រកទីនៅបាន
ហើយសត្វត្រចៀកកាំ ក៏បានសំបុកសំរាប់ខ្លួន
ជាកន្លែងដែលដាក់កូនបានដែរ
គឺជាអាសនានៃទ្រង់
៤ មានពរហើយ អស់អ្នកណាដែលអាស្រ័យនៅ
ក្នុងដំណាក់ទ្រង់
គេនឹងចេះតែសរសើរដល់ទ្រង់ជានិច្ច។ –បង្អង់
៥ ៙ មានពរហើយ មនុស្សណាដែលយកទ្រង់ជាកំឡាំង
របស់ខ្លួន
ជាអ្នកដែលមានគ្រប់ទាំងផ្លូវរៀបចំក្នុងចិត្តហើយ
៦ កាលណាអ្នកនោះដើរកាត់ច្រកនៃសេចក្តីយំសោក
ក៏ធ្វើឲ្យច្រកនោះត្រឡប់ទៅជាទីមានក្បាលទឹកហូរ
អើ ទឹកភ្លៀងក៏គ្របដោយពរដែរ
៧ ពួកនោះដើរទៅទាំងមានកំឡាំងខ្លាំងឡើងបណ្តើរ
គ្រប់គ្នាក៏លេចមកនៅចំពោះព្រះ ត្រង់ស៊ីយ៉ូន
៨ ឱព្រះយេហូវ៉ា ជាព្រះនៃពួកពលបរិវារអើយ
សូមស្តាប់សេចក្តីអធិស្ឋានរបស់ទូលបង្គំ
ឱព្រះនៃយ៉ាកុបអើយ សូមផ្ទៀងព្រះកាណ៌ផង។ បង្អង់
៩ ៙ ឱព្រះដ៏ជាខែលនៃយើងខ្ញុំអើយ សូមទ្រង់ទតមក
សូមមើលចំមុខរបស់អ្នកដែលទ្រង់បានចាក់ប្រេងតាំងឲ្យ
១០ ដ្បិត១ថ្ងៃនៅក្នុងព្រះលាននៃទ្រង់
នោះវិសេសជាង១ពាន់ថ្ងៃណាទៀត
ទូលបង្គំស៊ូធ្វើជាអ្នកឆ្មាំទ្វារ
នៅក្នុងដំណាក់របស់ព្រះនៃទូលបង្គំ
ជាជាងនៅក្នុងលំនៅនៃសេចក្តីអាក្រក់
១១ ពីព្រោះព្រះយេហូវ៉ាដ៏ជាព្រះ ទ្រង់ជាព្រះអាទិត្យ
ហើយជាខែល
ព្រះយេហូវ៉ាទ្រង់នឹងផ្តល់ព្រះគុណ ព្រមទាំងកិត្តិយស
ទ្រង់នឹងមិនសំចៃទុករបស់ល្អអ្វី
ដល់ពួកអ្នកដែលដើរដោយទៀងត្រង់ឡើយ
១២ ឱព្រះយេហូវ៉ានៃពួកពលបរិវារអើយ
មនុស្សណាដែលទុកចិត្តនឹងទ្រង់ នោះមានពរហើយ។