៥៤
សូមរកយុត្តិធម៌ឲ្យទូលបង្គំផង
ទំនុកជាសេចក្តីបង្រៀនរបស់ស្តេចដាវីឌ ដែលទ្រង់លើកនៅវេលាដែលពួកស៊ីភបានមកទូលស្តេចសូលថា ដាវីឌពួននៅជាមួយនឹងយើងខ្ញុំ សំរាប់ឲ្យមេភ្លេងលេងដោយប្រដាប់មានខ្សែ។
១ ឱព្រះអង្គអើយ សូមជួយសង្គ្រោះទូលបង្គំ
ដោយសារព្រះនាមទ្រង់
ហើយវិនិច្ឆ័យទូលបង្គំ ដោយឥទ្ធិឫទ្ធិរបស់ទ្រង់
២ ឱព្រះអង្គអើយ
សូមស្តាប់សេចក្តីដែលទូលបង្គំអធិស្ឋាន
សូមផ្ទៀងព្រះកាណ៌ស្តាប់វាចារបស់ទូលបង្គំផង
៣ ដ្បិតមានមនុស្សដទៃលើកគ្នាឡើងទាស់នឹងទូលបង្គំ
ហើយពួកមនុស្សច្រឡោតស្វែងរកជីវិតទូលបង្គំ
គេមិនបានតាំងព្រះនៅមុខគេឡើយ។ –បង្អង់
៤ ៙ មើល ព្រះទ្រង់ជាជំនួយនៃទូលបង្គំ
ព្រះអម្ចាស់ទ្រង់គង់ជាមួយនឹងពួកអ្នកដែលទប់ទល់
ព្រលឹងនៃទូលបង្គំ
៥ ទ្រង់នឹងសងសេចក្តីអាក្រក់របស់ពួកខ្មាំងសត្រូវ
ទូលបង្គំទៅលើគេវិញ
សូមបំផ្លាញគេដោយនូវសេចក្តីស្មោះត្រង់របស់ទ្រង់
៦ ទូលបង្គំនឹងយកដង្វាយស្ម័គ្រពីចិត្ត
មកបូជាថ្វាយដល់ទ្រង់
ឱព្រះយេហូវ៉ាអើយ
ទូលបង្គំនឹងសរសើរដល់ព្រះនាមទ្រង់
ដ្បិតព្រះនាមទ្រង់ល្អវិសេស
៧ ពីព្រោះទ្រង់បានជួយទូលបង្គំឲ្យរួចពីគ្រប់សេចក្តីវេទនា
ភ្នែកទូលបង្គំបានឃើញបំណងចិត្តកើតដល់ពួកខ្មាំង
សត្រូវរបស់ទូលបង្គំហើយ។