៣៤
ព្រះហឫទ័យសប្បុរសរបស់ព្រះអម្ចាស់
ទំនុកនៃស្តេចដាវីឌ ដែលទ្រង់លើកក្នុងកាលដែលទ្រង់ក្លែង ធ្វើជាឆ្កួត នៅចំពោះអ័ប៊ីម៉្មាឡិច ហើយត្រូវបណ្តេញចេញទៅ។
១ ខ្ញុំនឹងលើកសរសើរដល់ព្រះយេហូវ៉ាគ្រប់
ពេលវេលា
សេចក្តីសរសើរពីទ្រង់នឹងនៅក្នុងមាត់ខ្ញុំជានិច្ច
២ ព្រលឹងរបស់ខ្ញុំនឹងអួតតែពីព្រះយេហូវ៉ា
មនុស្សរាបទាបនឹងឮ ហើយនឹងមានសេចក្តីអំណរដែរ
៣ ចូរដំកើងព្រះយេហូវ៉ាជាមួយនឹងខ្ញុំចុះ
ចូរយើងព្រមគ្នាលើកព្រះនាមទ្រង់ឡើង
៤ ខ្ញុំបានស្វែងរកព្រះយេហូវ៉ា ហើយទ្រង់ក៏ឆ្លើយតបមកខ្ញុំ
ក៏ប្រោសឲ្យខ្ញុំរួចពីអស់ទាំងសេចក្តីភិតភ័យរបស់ខ្ញុំ
៥ អ្នកណាដែលពឹងដល់ទ្រង់ នោះក៏មានសេចក្តីអំណរ
ដ៏ព្រោងព្រាយ
ហើយមុខគេមិនដែលត្រូវខ្មាសឡើយ
៦ ខ្ញុំ ជាមនុស្សវេទនានេះ បានអំពាវនាវទៅ
នោះព្រះយេហូវ៉ាទ្រង់បានស្តាប់តាម
ហើយជួយសង្គ្រោះឲ្យរួចពីសេចក្តីលំបាកទាំងប៉ុន្មានរបស់ខ្លួន
៧ ទេវតានៃព្រះយេហូវ៉ាចោមរោមនៅជុំវិញនៃអស់អ្នកដែល
កោតខ្លាចដល់ទ្រង់ ហើយក៏ជួយគេឲ្យរួច
៨ ឱសូមភ្លក់មើលឲ្យដឹងថា ព្រះយេហូវ៉ាទ្រង់ល្អចុះ
មានពរហើយ មនុស្សណាដែលពឹងជ្រកក្នុងទ្រង់
៩ ឱពួកបរិសុទ្ធរបស់ទ្រង់អើយ សូមកោតខ្លាចដល់
ព្រះយេហូវ៉ា
ដ្បិតអស់អ្នកដែលកោតខ្លាចដល់ទ្រង់មិនខ្វះអ្វីឡើយ
១០ ឯអស់ទាំងសិង្ហស្ទាវ វាតែងតែខ្វះ ហើយក៏ឃ្លាន
តែអស់អ្នកណាដែលស្វែងរកព្រះយេហូវ៉ា នោះនឹងមិនខ្វះអ្វី
ដែលល្អឡើយ
១១ កូនទាំងឡាយអើយ ចូរមកស្តាប់អញចុះ
អញនឹងបង្រៀនឯងរាល់គ្នា ពីសេចក្តីកោតខ្លាចដល់
ព្រះយេហូវ៉ា
១២ តើមានអ្នកឯណាដែលចង់បានជីវិត ហើយស្រឡាញ់
អាយុយឺនយូរ
ដើម្បីឲ្យបានឃើញសេចក្តីល្អ
១៣ ត្រូវឲ្យរក្សាអណ្តាតខ្លួន ឲ្យរួចពីសេចក្តីអាក្រក់
ហើយបបូរមាត់ផង មិនឲ្យពោលពាក្យកំភូត
១៤ ចូរថយចេញពីការអាក្រក់ ហើយប្រព្រឹត្តការល្អវិញ
ចូរស្វែងរកសេចក្តីសុខ ហើយដេញជាប់តាមចុះ
១៥ ព្រះនេត្រព្រះយេហូវ៉ាទតទៅចំពោះមនុស្សសុចរិត
ហើយព្រះកាណ៌ទ្រង់ក៏ប្រុងស្តាប់សំរែករបស់គេ
១៦ ព្រះភក្ត្រព្រះយេហូវ៉ាទាស់ទទឹងនឹងពួកអ្នក
ដែលប្រព្រឹត្តអាក្រក់
ដើម្បីនឹងដកយកសេចក្តីនឹកចាំចំពោះគេពីផែនដីចេញ
១៧ ឯមនុស្សសុចរិត គេអំពាវនាវ ហើយព្រះយេហូវ៉ា
ទ្រង់ទទួលស្តាប់
ទ្រង់ក៏ប្រោសគេឲ្យរួចពីគ្រប់សេចក្តីលំបាករបស់គេ
១៨ ព្រះយេហូវ៉ាទ្រង់គង់ជិតបង្កើយនឹងអស់អ្នក
ដែលមានចិត្តសង្រេង
ហើយទ្រង់ជួយសង្គ្រោះដល់អស់អ្នក
ដែលមានវិញ្ញាណទន់ទាប
១៩ មនុស្សសុចរិតតែងតែកើតមានសេចក្តីលំបាកជាច្រើន
តែព្រះយេហូវ៉ាទ្រង់ជួយឲ្យរួចពីសេចក្តីទាំងនោះ
២០ ទ្រង់រក្សាអស់ទាំងឆ្អឹងរបស់អ្នកនោះ
មិនឲ្យឆ្អឹងណាមួយត្រូវបាក់ឡើយ
២១ សេចក្តីអាក្រក់នឹងសំឡាប់មនុស្សដែលប្រព្រឹត្តអាក្រក់
ហើយពួកអ្នកដែលស្អប់ដល់មនុស្សសុចរិត
នឹងត្រូវមានទោស
២២ ព្រះយេហូវ៉ាទ្រង់លោះព្រលឹងនៃអស់អ្នកដែលគោរព
ប្រតិបត្តិដល់ទ្រង់
ហើយក្នុងពួកអស់អ្នកដែលពឹងជ្រកក្នុងទ្រង់
នោះគ្មានអ្នកណាមួយនឹងត្រូវទោសឡើយ។