5
Kwatia imbojapyre ojora va'erã Ovexa Ra'y ramigwa va'e
1 Upe rire ahexa kwatia inhapemombypyre. Mburuvixagwasu apykagwasu ári ogwapy oĩ va'e po akatúa-py ahexa oĩ upe va'e kwatia. Ijape-rehe igwy-rehe ave oĩ hese nhe'ẽ. He iraity ramigwa-py omondyky omboja hagwã ojóehe va'ekwe. Sete imbojapyre oĩ hese. Ogwapy oĩ-vy va'e po-py ahexa upe kwatia.
2 Ahexa ave peteĩ Nhandejáry rembigwái yváy pygwa va'e. Ipu'aka va'e. Hatã onhe'ẽ oporandu-vy: Kiva'e po oipe'a va'erã kwatia imbojapyre ojora va'erã hexa-vy? he'i oporandu-vy. Avave para'e ndoikóiry heko marangatu porã va'e ojora va'erã hexa-vy? he'i oporandu-vy.
3 Ha avave ndoikói ipe'a kwaaharã. Yváy-py ndaipóri. Yvy-py ndaipóri ave. Yvygwy-py ndaipóri ave. Avave ndoikóiry heko kwaaharã.
4 Ahexase eterei-gwi amboasy. Upéa-gwi xe rasẽ. “Ndojohúi ra'e ipe'aharã” ha'e xejéupe. “Ndikatúi opa va'e rei oipe'a. Heko marangatu va'e po pygwarã voi ra'e upe kwatia ha upeixagwa ndojohúiry ra'e ipe'aharã” ha'e xejéupe anhemboasy-vy.
5 Upéa ha'e-ma ramo peteĩ mburuvixa he'i xe-vy:
—Ani erejahe'o teĩ, he'i. —Oĩ voi peteĩ ipe'a kwaaharã, he'i xe-vy. —Judéu re'ýi kwéry gwigwa upe va'e, he'i. —Davi hembypy, he'i hese. —Ha'e leão imbaraeteha-rami imbaraete tee va'e, he'i hese. —Onhembopu'aka-ma va'ekwe opamba'e-rehe. Nonheme'ẽi va'ekwe ojeity ukaharãgwe-pe. Sete imbojapyre oipe'a va'erã voi ko kwatia nhe'ẽ ohexa hagwã, he'i hese.
6 Upéi katu ama'ẽ ramo ahexa Ovexa Ra'y ijukapyre ramigwa oikove jevy-ma onhembo'y oĩ-vy ramo mburuvixagwasu apykagwasu renonde ete-py. Upe irundy Nhandejáry apyka jere-rehe oiko va'ety pa'ũ-my oĩ. Gwĩ mburuvixa kwéry pa'ũ-my ahexa upe Ovexa Ra'y ramigwa va'e oiko. Hesa jojapa va'e. Hatĩ eta va'e. Sete hesa ogwereko va'e. Sete hatĩ ave ogwereko ave upe Ovexa Ra'y ramigwa va'e. Upe sete hesa nhane momandu'a Tupã Nhandejáry Nhe'ẽ Marangatu tee va'e-rehe. Gwĩ sete opa-rupi yvy ári onhemondo mondo va'ekwe-rehe.
7 Ha upe jave upe Ovexa Ra'y ramigwa va'e ijukapyre oikove jevy va'ekwe ou ogwahẽ ogwapy oĩ-vy va'e ha-py. Upéi oipyhy ipo-gwi, ipo akatúa koty ogwereko va'e kwatia oipyhy oipe'a íxugwi.
8-9 Oipe'a-ma ramo gwĩ ijerekwe rupigwa onhesũ joa Ovexa Ra'y ramigwa va'e rovagwy-py imboete-vy. Upe irundy Nhandejáry apyka jere-rehe oiko va'ety onhesũ hovagwy-py ave. Upe vinte e quatro mburuvixa kwéry ave hovagwy-py onhesũ ave. Peteĩ teĩ ogwereko opo-py hikwái gwemimbopu isã reta va'e. Mba'e ryru ouro-gwi ijapopyre ogwereko meme ave. Ha mba'e ryru meme-py oĩ hyakwã porã porã va'e. Hesu reroviaha kwéry ombojeupi upi onhe'ẽ Nhandejáry-pe hyakwã porã va'e vérami. Ha mburuvixa kwéry onhesũ Ovexa Ra'y ramigwa va'e rovagwy-py imboete-vy. Oha'ã peteĩ mborahéi pyahu okwa-vy hikwái.
Enterove remimomba'egwasu arã nde.
Iporã voi ereipyhy ko kwatia nhe'ẽ
Imbojapyre ereipe'a ave.
Nde voi erejejuka va'ekwe.
Nde rugwy avyte-py eremano va'ekwe
eremopotĩ potĩ hagwã heta eta va'e Nhandejáry pegwarã.
Opa opa rupigwa yvy oho va'e-rupigwi ou va'ekwe eremopotĩ Nhandejáry pegwarã.
Ijypye pye va'e eremopotĩ Nhandejáry pegwarã.
Nhe'ẽ ambue mbue-py onhe'ẽ va'e eremopotĩ Nhandejáry pegwarã.
Kente ambue mbue opa rupigwa eremopotĩ Nhandejáry pegwarã.
Gwetã gwetã rupigwa eremopotĩ íxupe gwarã.
Ereipe'a va'ekwe íxupe kwéry
Tupã Nhandejáry pegwarã he'yirã va'ekwe.
10 Eremoingo íxupe kwéry mburuvixagwasu ramo.
Eremoingo-ma íxupe kwéry Nhandejáry re'ýi kwéry ramo
pa'i-rami ha'e kwéry omboete ete hagwã Nhandejáry-pe.
Oiko va'erã mburuvixagwasu ramo yvy ári ne remimopotĩkwe.
Upéa-rehe iporã voi nde ereipe'a imbojapyre
erehexa hagwã kwatia nhe'ẽ,
he'i oporahéi joa okwa-vy Ovexa Ra'y ramigwa va'e-pe imboete-vy.
11 Upéi ahexa, ahendu ave hetave oporahéi va'e. Avave ndoipapa kwaáiry upe oporahéi va'e-pe heta eterei hikwái. Nhandejáry rembigwái yváy pygwa meme hikwái. Mburuvixagwasu apykagwasu jerekwe-rehe oporahéi. Gwĩ Nhandejáry apyka jere-rehe oiko va'ety jerekwe-rehe ave, mburuvixa va'e kwéry jerekwe-rehe ave
12 oporahéi okwa-vy.
Oromboetese-gwi ore oroporahéi nde jerekwe-rehe.
Ereikove jevy-gwi oromboeteseve voi nde-vy,
he'i íxupe oporahéi okwa-vy imboete-vy.
Nde Ovexa Ra'y-rami nde juka va'ekwe.
Upe rire ereikove jevy-ma va'ekwe.
Nde pu'aka tee va'e nde opaixagwa-rehe, opamba'e-rehe ave.
Entéro mba'e mba'e nde-vy gwarã voi.
Nde ne arandu tee va'e voi.
Tuvixa vixa ete va'e voi nde.
Iporã voi enterove ne mboete ete tee.
Ne mba'egwasu gwasu ete voi nde.
Iporã voi enterove omoherakwã porã nde rehegwa nhe'ẽ
Ne rerohory hagwã.
Iporã voi oronhe'ẽ porã porã nde-rehe,
he'i oporahéi okwa-vy.
13 Upéi ahendu-ma oporahéi joa ramo okwa-vy. Yváy-py oĩ va'e, yvate okwa va'e, yvy pype ave yvygwy-py okwa va'e ave, ygwasu gwy-rupi okwa va'e ave, opamba'e ipy-py kwéry okwa va'e gwive oporahéi joa okwa-vy. He'i oporahéi ramo okwa-vy:
Tonhemomba'egwasu porã katu
Mburuvixagwasu apyka ári ogwapy oĩ-vy va'e-pe,
Ovexa Ra'y ramigwa-pe ave.
Tonhemboete tee katu pe Nhandejáry-pe.
“Entéro remimomba'egwasu voi ko nde”
te'i katu Nhandejáry-pe.
“Nde ko, nde pu'aka tee va'e voi” te'i ave íxupe.
Opa e'ỹ reheve upéixa toiko íxupe,
he'i oporahéi joa okwa-vy.
14 Ha gwĩ irundy Nhandejáry apyka jere-rehe oiko va'ety he'i:
—Upéixa voi toiko, he'i.
Ha gwĩ vinte e quatro mburuvixa kwéry onhesũ ogwapy oĩ va'e rovagwy-py Ovexa Ra'y ramigwa va'e rovagwy-py ave. Ha omomba'egwasu gwasu upe Nhandejáry-pe.