33
Anutu imi hiabia.
1 Ic solaŋa ini Yaweac niŋac ʒézé ségiségi wammu. Mepé qepésiac legic imi ic solaŋa ionac buŋa sécya.
2 Gita ʒéma kulele hésia sasalanéŋ Yawe ewa hia wammima mepési mimu.
3 Legic ɋelianéŋ héimima ségiségiac ewa hétéŋnéŋ hiabianec meʒericma héimimu.
4 Yaweac ackuaʒéc imi solaŋ dindiŋa, waŋu iwac haka silic imi mocʒoŋ hélacnec.
5 Inéŋ haka solaŋa ʒéma haka dindiŋawac siŋa niŋanʒac. Imuac baec séc Yaweac goi héihéianéŋ sécgéma hezac.
6 Yaweac ackuaʒécnéŋ kurumeŋa kurumeŋa mihicŋiyec. Iwawai sécgéma hezac imi mocʒoŋ kuaya wéséséyanéŋ mihicŋidarec.
7 Inéŋ konduŋ doku qauqau haiyu eŋu doku hiŋgac hiŋgara imi hofi yandaiguc haiyu heanʒac.
8 Baec séc ic embac Yaweac bac yandi yandi waŋgic. Baera baera miŋina ini eeya héi mimu.
9 Imi mia hénia yomuhuc niŋac; Iwawai imi mocʒoŋ inéŋ ʒéyu hicŋidarec. Waŋu inéŋ ʒéseliyu seligima nandarec.
10 Yawenéŋ baera baera ionac niniŋ areŋgia imi nélicgéyu nenesic wandacʒac. Waŋu hicŋisai hénia hénia ionac niniŋ hiŋgac hiŋgara imi meleŋu eŋomia wandacʒac.
11 Yawenéŋ niniŋa niŋareŋgéyu hehe seli naŋselianʒac. Iwac niniŋa hiŋgac hiŋgaranéŋ hicŋisaiya hicŋisaiya emma hema kecmac.
12 Yaweac neŋaŋ Anutu ʒémima aŋgéŋ tigic Anutuac ic embac buŋa ʒéénécmiyu kecʒu imi eneŋ ségiségi ginaguc.
13 Yawenéŋ kurumeŋiguc ninicsosolima baec ic mocʒoŋ ninicanʒac.
14 Tacyac waŋanʒac ama duŋa imuacnec mia baec séc tacyachéra imi mocʒoŋ kiwa hiyu mayu ninicanʒac.
15 Inéŋ mia ic séc ionac ewa qerigina héniagina meyacgéma wawaŋ memegina héŋsosolianʒac.
16 Ic kewu méŋac aŋgéŋ timimia imi téŋgiŋ ichéra sasala ionac muru ménda hezac. Ic kawali méŋac aŋgéŋ timimia imi acguc eŋeya kuha kuneŋ yanda imuaru ménda hezac.
17 Kekecnina imi becosic me kuc yandanéŋ ménda aŋgéŋ tiwiŋac séc.
18 Ninʒu, Yawe imi eeya héimima goi héihéiyawac kic hihi waŋanʒu imi onac inicgaleŋ waŋ énécmianʒac.
19 Imuhuc wamma ionac kekec uŋa imi humuc igucnec metecgé énécmima béti naléiguc méra énécmiyu kekecginaguc kecanʒu.
20 Kekec uŋaninanéŋ Yaweac kic hihi waŋanʒiŋ. Inéŋ mia neŋaŋ héipuc ic ʒéma saiwanina wanʒac.
21 Ewa qerininanéŋ iwac ségiségi wamma iwac qac téréyawac héima naŋanʒiŋ imuac mia imuhuc waŋ nénécmianʒac.
22 Yawe, guac mambéc waŋanʒiŋ nalé sura imuac séc guac goi héihéiga qacninaiguc hemac.