26
Ʒésolaŋi mimac niŋ ʒéwelerec.
1 (Dawidiac legic ʒéra.) Ni hakana solaŋanec waŋanʒua. Waŋu keŋqe haqe qahac Yaweac héima kecanʒua. Imuac Yawe néŋgési wambésémaŋ.
2 Yawe ni néŋsosolima batucgé némma nuac ewa qerina ʒéma nuac ewa siŋna mesolaŋi néŋna.
3 Guac goi héihéiganéŋ nuac wésénaiguc hezac ni guac haka héla imuac méndacma keŋha wammaŋ.
4 Ic gorosoŋa iniguc ménda tacyac waŋanʒua. Waŋu ic diwi qiwiliŋa iniguc momacnec keŋha ménda wammaŋ.
5 Ni kaiʒiliweŋ ic ionac aʒoaʒoro imuac méʒétiti wamma ic biria iniguc momacnec tacyac ménda wammaŋ.
6 Yawe ni képésicna qahac, imuac mérana ʒuacma guac ʒaki téréyaiguc kereŋ haré wammaŋ.
7 Ewa hia ac ʒéhicŋima guac haka welic welicgia imi ʒéau énécmimaŋ.
8 Yawe ni guac tacyacwac ama ʒéma ocmuŋ téréya guac edamugaguc imuac qerinanéŋ wammianʒua.
9 Nuac kekec uŋana imi képésic ic iniguc, waŋu nuac kekecna imi sac naec ic iniguc momacnec ménda metocgéna.
10 Ionac méraginaiguc imi iwawai ʒéragucnéŋ heyu méra héiginaiguc imi ikociguc boŋhéré wawaŋawac iwawainéŋ sécgéma hezac.
11 Néŋ nenaoc solaŋanec hakana wamma kecmaŋ imuac ni boŋ héréna menémma ewa hia niŋnénna.
12 Ni hénana baec kondoŋaiguc tima nanʒua. Hénaoriŋ ionac sucginaiguc Yawe ʒéhiaru mimaŋ.