146
Anutunéŋ méra miyu mepésimiyec.
1 Haleluya, kekec uŋana Yawe mepésina.
2 Ni kecma emma kecmaŋ séc Yawe mepésimaŋ. Kecma emma kecmaŋ séc Anutuna legic héimimaŋ.
3 Ini ic eŋeŋa ionaru ménda laheŋgému. Baec ic ieneŋ méra énécmimuac kuc ménda he énécmizac.
4 Ieneŋ imi uŋagina wai énécmiyu baeciguc liliŋgéma kemmu. Keŋgic kaiwe imuaru mia ionac niŋareŋ areŋgia imi mocʒoŋ qahac wandacmac.
5 Yakoboac Anutunéŋ méra mimac imi ségi ségiyaguc. Waŋu Yawe Anutuyawac niŋkumuma kecanʒac imi ʒézé ségi ségiyaguc.
6 Yawe imi baec kurumeŋ ʒéma iwawai imuaru sécgéma hezac imi mocʒoŋ ʒéyu hicŋidacgic. Waŋu hémbénaŋa qeri héla késa kecanʒac.
7 Inéŋ hédacgé énécmimiawac kecanʒu imi héna acac séc ʒédiŋi énécmima yaka niŋ humuanʒu séc nene yaka gumu énécmianʒac.
Waŋu Yawenéŋ ɋaté énécmimia imi hulac énécmianʒac.
8 Yawenéŋ kic hilic onac kic hihi meénécmianʒac. Yawe imi mema titi waŋ énécmimia imi meyac énécmianʒac. Waŋu Yawe imi ic solaŋa goi héihéi waŋ énécmianʒac.
9 Yawe imi ic kiaŋa héŋgaleŋ waŋ énécmianʒac. Waŋu qawéc gupaŋ énépésima naŋgé énécmianʒac. Waŋu kaiʒiliweŋ ic ionac hénagina imi mebiri énécmianʒac.
10 Zion ama areŋa yanda, Yawe guac Anutunéŋ hicŋisai lépaya lépaya hémbénaŋa héŋgaleŋ waŋgémmac. Haleluya!
Anutunéŋ Yerusalem héŋgaleŋ wammianʒac, mepésimini.