22
పెండ్లివిందు
1 యేసు మరి కతవజ వరిఙ్ వెహ్తాన్‌
2 “దేవుణు కిని ఏలుబడిః ఇహిఙ వన్ని మరిసి పెండ్లిదిఙ్‌ విందు తయార్‌ కితిమని ఒరెన్‌ రాజుఙ్‌ పోలిత మనాద్.
3 పెండ్లి విందుదిఙ్‌ రదు ఇజి ముఙాల వెహ్తి మహివరిఙ్‌ కూక్సి తగాట్‌ ఇజి వాండ్రు వన్ని పణిమన్సిరిఙ్‌ వరి డగ్రు పోక్తాన్. గాని వాదెఙ్‌ ఒప్‌ఏతార్.
4 నస్తివలె వాండ్రు మరి సెగొండార్‌ పణిమన్సిరిఙ్‌బా పోక్తాండ్రె, “పెండ్లి విందుదిఙ్‌ రదు”, ఇజి ముఙాల వెహ్తిమహివరిఙ్, “నాను కోడ్డిఙ్, బలస్తి పడెఙ్‌ ఒహ్‌పిసి విజు తయార్‌ కిత మన. పెండ్లి విందుదిఙ్‌ మీరు రదు ఇజి వరిఙ్ వెహ్తు”, ఇజి వరిఙ్ వెహ్తాన్‌.
5 వారు పణిమన్సిర్‌ వెహ్తి మాటదిఙ్‌ కండెక్‌బా లస్యం కిఏండ, ఒరెన్‌ వన్ని మడిఃఙ సొహాన్‌ మరి ఒరెన్‌ వన్ని బేరమ్‌దిఙ్‌ సొహాన్‌.
6 మహికార్‌ వన్ని పణిమన్సిరిఙ్‌ అస్తారె మర్యాద లాగ్జి సప్తార్.
7 అయ రాజు నండొ కోపం ఆతాండ్రె వన్ని సయ్‌నమ్‌దిఙ్‌ పోక్సి వన్ని పణిమన్సిరిఙ్‌ సప్తివరిఙ్‌ కతిస్తాండ్రె, వరి పట్నమ్‌దిఙ్‌ సిసుదాన్‌ ముటిస్తాన్.
8 వెనుక వాండ్రు పెండ్లి విందు తయార్‌ అత మనాద్, వన్ని పణి మన్సిరిఙ్, “గాని ముఙాల పెండ్లి విందుదిఙ్‌ కూకెఆతి మహికార్‌ విందుదిఙ్‌ వాదెఙ్‌ తగ్నికార్‌ ఆఏర్.
9 మీరు రస్త సహ్‌కాఙ్‌ సొన్సి మిఙి తోరినివరిఙ్‌ విజేరిఙ్” విందుదిఙ్‌ రదు’ ఇజి కూక్తు”, ఇజి వెహ్తాన్‌.
10 అయ పణిమన్సిర్‌ రస్త సహ్‌కాఙ్‌ సొహరె వరిఙ్ తోరితి నెగ్గివరిఙ్, సెఇవరిఙ్‌ కుడుఃప్సి, వరిఙ్ తత్తెఙ్‌ అట్నివరిఙ్‌ విజేరిఙ్ తత్తార్. పెండ్లి విందు సమ్‌డ నిండ్రితాద్.
11 నస్తివలె పెండ్లి విందుదిఙ్‌ వాతివరిఙ్‌ సుడ్ఃదెఙ్‌ రాజు వాతాన్. పెండ్లిసొక్క తొడుగిఏండ పెండ్లి విందుదిఙ్‌ అబ్బె బస్తిమని ఒరెన్‌ వన్నిఙ్ సుడ్ఃతాన్.
12 రాజు వన్నిఙ్, “ఓ, కూలాయెన్, పెండ్లిసొక్క తొడుగిఏండ నీను ఎలాగ లొఇ వాతి?”, ఇజివెన్‌బాతాన్. వాండ్రు వర్గిఏండ అలేత మహాన్‌.
13 నస్తివలె రాజు, “వినిఙ్‌ కిక్కుకాల్కు తొహ్సి వెల్లి దూరమ మన్ని సీకటి బాడిఃదు విసీర్‌దు. అబ్బె వాండ్రు ఎలాకాలం అడఃబాజి, పల్కు కొహ్‌క్నిక మంజినాన్‌”, ఇజి వన్ని పణి మన్సిరిఙ్ వెహ్తాన్‌.
14 “కూకె ఆతికార్‌ నండొండార్‌ గాని, ఎర్లె ఆతికార్‌ కొకొండారె.”
కయిసరిఙ్‌ పను సీని వందిఙ్‌
15 నస్తివలె పరిసయ్‌రు వెల్లి సొన్సి వాండ్రువర్గిని మాటదాన్‌ యేసుఙ్‌ తప్ప అస్తెఙ్‌ ఇజి కుట్ర ఆజి మహార్.
16 వారు వరి సిసూరిఙ్‌, హేరోదియరు జటుదివరివెట యేసు డగ్రు పోక్తార్. వారు సొన్సి, “బోద కినికి, నీను, మన్సు కద్లిఏండ దేవుణు సరివందిఙ్‌ నిజమ్‌దాన్‌ బోదిసిని నెగ్గికి ఇజి మాపు నెస్నాప్. నీను లోకురి ఎలాగ మర్తికార్‌ ఇజి మొకొం సుడ్ఃజి వరిఙ్ సర్ద కిబిస్తెఙ్‌ ఇజి వర్గినికి ఆఇ.
17 అహిఙ కయ్‌సరుఙ్‌ పను సీనిక నాయమా? నీను ఇనిక ఒడ్ఃబిజిని? మఙి వెహ్‌అ”, ఇజి వన్నిఙ్ వెహ్తార్‌.
18 యేసు వరి సెఇ బుద్దిదిఙ్‌ నెస్తాండ్రె, “వేసం కినికిదేరా! ఎందనిఙ్‌ నాను వహ్ని మాటదాన్‌ నఙి అస్తెఙ్‌ సుడ్ఃజినిదెర్‌?
19 పన్ను సీని ఉండ్రి కాసు నఙి తోరిస్తు”, వారు ఉండ్రి దినారం వన్ని డగ్రు తతార్.
20 “దిని ముస్కు మని బొమ్మ ఎయెర్‌ది? రాస్తిమని రాంత ఎయెర్‌ది?”, ఇజి వాండ్రు వరిఙ్, వెన్‌బాతాన్.
21 వారు, “కయిసురుది”, ఇజి వెహ్తార్‌. నస్తివలె వాండ్రు, “కయిసరుది కయ్‌సరుఙ్‌ సీదు, దేవుణుది దేవుణుదిఙ్‌సీదు”, ఇజి వరిఙ్ వెహ్తాన్‌.
22 యా మాట వెంజి బమ్మ ఆతారె వారు వన్నిఙ్ డిఃస్త సొహార్‌.
23 సాతికార్‌ మర్‌జి నిఙ్‌నిక సిల్లెద్‌ ఇజి సదుకయ్‌రు వెహ్సినార్‌. వారు అయా రోజుదునె వన్నిడగ్రు వాజి ఈహు వెన్‌బాతార్.
24 “బోదకినికి, ఒరెన్‌ కొడొఃర్‌ సిల్లెండ సాతిఙ వన్ని తంబెరి సాతివన్ని ఆల్సిఙ్‌ పెండ్లి ఆజి సాతివన్ని వందిఙ్‌ కొడొఃర్‌ పుటిస్తెఙ్‌ వలె ఇజి మోసె రాస్తి సితి రూలుదు మనాద్.
25 మా నడిఃమి ఏడు గురు తంబేర్‌ఙు మహార్. పెరికాన్‌పెండ్లి ఆతాండ్రె సాతాన్. వన్నిఙ్ కొడొఃర్‌ సిల్లెర్‌ కక వన్ని తంబెరి సాతివన్ని ఆల్సిఙ్‌ఇడెః ఆతాన్.
26 నడిఃపి వాండ్రుని కొగ్రి నడిఃపి, అయా లెకెండ్‌నె వీస్‌కొడొఃదాక విజేరె దనిఙ్‌పెండ్లి ఆజి సాతార్.
27 కడెఃవేరిదు అయా బోదెల్‌బా సాతాద్.
28 అహిఙ సాతి వరిబాణిఙ్‌ మర్‌జి నిఙ్‌ని వెలె యా ఏడుగురు లొఇ ఎయెరిఙ్‌ అది ఆల్సి ఆనాద్‌లె? ఇనిక ఇహిఙ బత్కిజిమహివలె అది ఏడుగురుదిఙ్‌బా ఆల్సి ఆత మహాద్‌ గదె?”, ఇజి వెన్‌బాతార్.
29 యేసు వరిఙ్, “దేవుణు మాట ఇజి, మీరు నెస్‌ఇదెర్‌ దేవుణు సత్తు ఎస్సొ ఇజి మీరు నెస్‌ఇదెర్‌ అందెఙె అర్దం కిఏండ మీరు నండొ తప్పమాటెఙ్‌ వెహ్సినిదెర్.
30 ఎందనిఙ్‌ ఇహిఙ, సాతి విరబాణిఙ్‌ మర్‌జి నిఙ్‌ని వెలె ఎయెర్‌బా పెండ్లి ఆఏర్, పెండ్లిదిఙ్‌ సిఏర్. వారు పరలోకామ్‌ది దేవుణుదూతెఙ్‌ లెకెండ్‌ మంజినార్.
31-32 సాతికార్‌ మర్‌జి నిఙ్‌ని వందిఙ్‌ దేవుణు మిఙి వెహ్తి మనిక మీరు ఎసెఙ్‌బా సద్విఇతిదెరా? నాను అబ్రాహము దేవుణు, ఇస్సాకు దేవుణు, యాకోబురి దేవుణు ఇజి వాండ్రు సాతి వరి దేవుణు ఆఏన్, బత్కిజిని వరి దేవుణునె”, ఇజి వెహ్తాన్‌.
33 అయ మాట విహరె వన్ని బోద వందిఙ్‌ లోకుర్‌ బమ్మ ఆతార్.
పెరి ఆడ్ర
34 యేసు సదుకయ్‌రు వెయ్‌కు మూక్తాన్‌ ఇజి విహరె పరిసయ్‌రు కూడ్ఃజి వాతార్.
35-36 వరి లొఇ ఒరెన్‌ దేవుణు రూలుఙ్‌ నెగెండ్‌ నెస్తికాన్, “ఓ బోదకినికి దేవుణు సితి ఆడ్రెఙ లొఇ పెరి ఆడ్ర ఇనిక?”, ఇజి వన్నిఙ్ పరీక్స కిదెఙ్‌ వెన్‌బాతాన్.
37 యేసు వన్నిఙ్, “నీ పూర్తి మన్సుదాన్, నీ పూర్తి ఆత్మదాన్, నీ పూర్తి పాణమ్‌దాన్‌ నీ ప్రబు ఆతి దేవుణుదిఙ్‌ ప్రేమిస్తెఙ్.
38 యాకాదె గొప్ప ముక్కెలమతికని, మరి మొదోహి ఆడ్ర.
39 రుండి ఆడ్ర ఇనిక ఇహిఙ, “నీను నిఙి ప్రేమిస్ని లెకెండ్‌ మహి వరిఙ్‌బా ప్రేమిస్‌అ.
40 దేవుణు సితి రూలుఙ్‌ని ప్రవక్తరు వర్గితి మాటెఙ పునాది ఆతిక యా రుండి ఆడ్రెఙ్”, ఇజి వరిఙ్ వెహ్తాన్‌.
41-42 పరిసయెరు కూడిఃతి మనివెలె యేసు వరిఙ్ సుడ్ఃజి, క్రీస్తు వందిఙ్‌ మీరు ఇనిక ఒడ్ఃబిజినిదెర్‌? వాండ్రు ఎయెర్‌ది కుటుమ్‌దికాన్‌ ఆనాన్‌? ఇజి వెన్‌బాతాన్. “వాండ్రు దావీదు రాజు తెగ్గదికాండ్రె”, ఇజి వారు వెహ్తార్‌.
43-44 అయాలెకెండ్‌ మహిఙ మీరు నిజం వెహ్సినిదెర్. “నాను నీ పగాతి వరిఙ్ నీ పాదమ్‌క అడిఃగి ఇడ్నిదాక నీను నా ఉణెర్‌ పడఃకాదు బసి మన్‌అ. ఇజి ప్రబు నా ప్రబు వెట వెహ్తాన్‌. యా లెకెండ్‌ దేవుణు ఆత్మదాన్ దావీదు వర్గితివలె వన్నిఙ్ ఎలాగ ప్రబు ఇజి కూక్సినాన్‌?
45 దావీదు వన్నిఙ్ ప్రబు ఇజి కూక్తిఙ్, వాండ్రు ఎలాగ వన్ని మరిసి ఆనాన్‌?”, ఇజి వాండ్రు వరిఙ్ వెన్‌బాతాన్.
46 ఎయెర్‌బా మర్‌జి ఉండ్రి మాటబా వెహ్తెఙ్‌ అట్‌ఏతార్. అయా రోజుదాన్‌ వన్నిఙ్ ఇనికబా వెన్‌బాదెఙ్‌ ఎయెరిఙ్‌బా దయ్‌రం సాల్‌ఏతాద్.