7
యూదపెదెలుఙా రూలుఙ్‌ దేవుణు రూలుదిఙ్‌తేడః వాతాద్
1-2 యెరూసలేమ్‌దాన్‌ వాతి పరిసయ్‌రుని, యూదురి రూలు నెస్పిసినికార్ సెంగొండార్ యేసుబాన్‌ కూడ్ఃజి వాతార్. యేసు సిసూర్ యూదురుఙ రూలుదు వెహ్తిలెకెండ్‌ కిక్కు నొర్‌బఏండ బోజనం ఉణిజి మహిక వారు అబ్బె సుడ్ఃతార్. అక్క పరిసయ్‌రు సుడిఃతిఙ తప్ప.
3 పరిసయ్‌రు, యూదురు, విజేరె, పూర్‌బమ్‌దికార్‌ వెహ్తిరూలు వజ కిక్కు నొర్‌బాతి వెన్‌కనె ఊణార్.
4 వారు సత్తదాన్‌ వాతిఙ, రూలువజ ఏరు లొంజె ఆఏండ ఇనికబా ఉణ్‌ఏర్. ఇక్కాదె ఆఏండ గిన్నెఙ్‌ కుండెఙ్‌ మరి కంసు బిందెఙ్‌ ఎలాగ మిడిఃస్తెఙ్‌ ఇజి నండొ రూలుఙ్‌ వరిఙ్ మన్నె. ఆ రూలుఙ్‌వజ వారు కిజినార్.
5 అందెఙె పరిసయ్‌రుని, యూదుర్‌ రూలుఙ్‌ నెస్పిసినికార్, “ఎందానిఙ్‌ నీ సిసూర్ పూర్‌బమ్‌దికార్‌ వెహ్తి రూలువజ నడిఃఏండాజినార్ ఎందానిఙ్‌ వారు కిక్కు నొర్‌బఏండ బోజనం కిజినార్”, ఇజి యేసుఙ్‌ వెన్‌బాతార్.
6-7 యేసు వరిఙ్, “వేసం కినికారాతి మీ వందిఙ్‌ యెసయ ప్రవక్త ఎహ్తిక నిజమె. యా లోకుర్‌ నఙి వెయుదాన్‌ గవ్‌రం సీజినార్‌ గాని వరి మన్సు నాబాణిఙ్‌ దూరం మనాద్. వారు నఙి పొగ్‌డిఃజి మాడిఃసినార్‌ గాని అక్క పణిదిఙ్‌ రెఏద్‌. ఎందానిఙ్‌ ఇహిఙ వారు లోకుర్‌ వెహ్తి రూలు దేవుణు మాట ఇజి లోకాఙ్‌ నెస్పిసినార్.
8 దేవుణు వెహ్తి రూలు డిఃసిసీజి, మీరు పూర్‌బమ్‌దికార్‌ వెహ్తి రూలువజ నడిఃజినిదెర్”, ఇజి వెహ్తాన్‌.
9 యేసు వరిఙ్ మరి వెహ్తాన్‌, “పూర్‌బమ్‌దికార్‌ వెహ్తివజ నడిఃదెఙ్, ఇజి దేవుణు ఆడ్రెఙ్‌ పడఃకాదు నెక్తెఙ్‌ మిఙి బాగ తెలినాద్.
10 ఎలాగ ఇహిఙ మీ యాయ బుబ్బరిఙ్‌ గవ్‌రం సీజి బాగ సుడ్‌దెఙ్ ఇజి యాయెఙ్‌ గాని బుబ్బెఙ్‌ గాని దూసిస్తిఙ వన్నిఙ్‌ సప్తెఙ్ ఇజి దేవుణు మోసెఙ్‌ సిత్తి రూలు మనాద్.
11-12 గాని ఒరెన్‌ వన్ని అయ్‌సి అపొసిరిఙ్, నాను మిఙి ఇనికబా ఉండ్రి సాయమ్‌లెకెండ్‌ కిన ఇజి ఇడ్తిమన్నిక కొర్‌బాన్‌ ఇజి వెహ్తిఙ నాండిఙ్‌ అసి వాండ్రు అయ్‌సి అప్పొసిరిఙ్‌ ఇనికబా సాయం కిదెఙ్‌ అవ్‌సరం సిల్లెద్‌ ఇజి మీరు నెస్‌పిసినిదెర్. (కొర్‌బాన్‌ ఇహిఙ దేవుణుదిఙ్‌ సీన ఇజి ఒట్టు కినిక ఇజి అర్దం)
13 ఈహు మీ పూర్‌బమ్‌దికార్‌ వెహ్తివజ నడిఃజి మీరు దేవుణు వెహ్తి రూలుదిఙ విలువ సిల్లెండ కిజినిదెర్. నిన్ని సఙతిఙ్‌ నండొ మిరు కిజినిదెర్”.
14 యేసు లోకాఙ్‌ మరి వన్నిడగ్రు కూక్తాండ్రె “నాను వెహ్సినిక మీరు విజిదెరె జాగర్తవెంజి నెగెండ్ అర్దం కిదు.
15-16 వెయుదాన్‌ లొఇ సొనికెఙ్‌ ఇనికబా లోకాఙ్‌ మయ్ల కిదెఙ్‌ అట్‌ఏద్. గాని మన్సు లొఇహాన్‌ వెల్లి వానికదె లోకాఙ్‌ సెఏణ్‌ కిజినాద్”.
17 యేసు లోకాఙ్‌ డిఃసి ఇండ్రొ వాతివెనుక వన్ని సిసూర్, కతవజ వెహ్తి దన్నిఙ్‌ అర్దం వెన్‌బాతార్.
18-19 యేసు వరిఙ్ ఈహు వెహ్తాన్‌ “మీరుబా ఆఇవరిలెకెండ్‌ అర్దం కిదెఙ్‌ ఆట్‌ఇదెరా? వెల్లిహన్‌ పొటలొఇ సొని ఇని బోజనమ్‌బా లోకాఙ్‌ మయ్ల కిఏద్. ఎందనిఙ్‌ ఇహిఙ అక్క మన్సుదు సొన్‌ఏండ వన్ని పొటాదునె సొన్సినాద్. అక్క పొటదాన్‌ బయ్‌లు బస్నివలె వెల్లి సొన్సినాద్. ఇజి మీరు నెస్‌నిదెర్”. (ఇబ్బె సుడ్ఃతి ఇని బోజెనమ్‌బా ఉండెఙ్‌ ఆనాద్‌ ఇజి యేసు సెలవ సిత్తాన్)
20 మరి యేసు వెహ్తాన్‌, ఒరెన్‌ వన్ని మన్సులొఇహాన్‌ వెల్లి వానికదె వన్నిఙ్‌ మయ్ల కిజినాద్.
21-22 మన్సులొఇహాన్‌ వానిక ఇనికెఙ్‌ ఇహిఙ, సెఇ ఆలోసనమ్‌కు, కెలార్‌బూలానిక, లోకాఙ్‌ సప్నికెఙ్, రంకు బూలానిక, ఆఇవరిఙ్‌ మన్నికెఙ్‌ దొహ్‌క్తెఙ్‌ ఇజి ఆస, సెఇ పణి కినిక, మొసెం కినిక, మన్సుదు అనసె ఆజి మండ్రెఙ్‌ అట్‌ఇక, గోస దూసిసినిక, నానె పెరికాన్‌ ఇజి గర్ర ఆనిక, అర్దం కిఇ మన్సు మన్నిక.
23 యాక్కెఙ్‌ విజు లోకుర్‌ మన్సులొఇహాన్‌ వెల్లి వాజి ఒరెన్‌ వన్నిఙ్‌ మయ్ల కినె.
ఉండ్రి కనానియది అయ్‌లి కొడొః యేసు ముస్కు ఇడ్తి నమకం
24 యేసు అబెణిఙ్‌ నండొ దూరం సొన్సి ఉండ్రి గొరొన్‌ ఎక్సి డిఃగితాండ్రె తూరు సీదోను ఇని పట్నమ్‌కాఙ్‌ డగ్రు మన్ని ముటెఙ సొహాన్‌. బానెఉండ్రి ఇండ్రొ సొన్సి ఎయెఙ్‌బా తెలిఏండ మంజిన ఇజి మన్సుదు ఒడ్ఃబితాన్. గాని వాండ్రు అట్‌ఏతాన్.
25-26 యూదురు ఆఇ జాతిదు పుట్తి సురోపెకొనియదికాద్‌ ఉండ్రి అయ్‌లి కొడొః యేసు అబ్బె మనాన్‌ ఇజి వెంజి వెటనె అబ్బె వాతాదె యేసు పాదమ్‌కాఙ్‌ అర్తాదె మాడిఃస్తాద్. దన్ని గాల్సిఙ్‌ దెయం అస్త మహాద్‌. “నా గాలుఙ్‌ అస్తిమన్ని దెయమ్‌దిఙ్‌ ఉల్‌ప్‌అ”, ఇజి యేసుఙ్‌ బతిమాలితాద్.
27 దన్నిఙ్‌ యేసు, “ముఙాల్‌ కొడొఃరిఙ్‌ పొట పంజు బోజనం తీపిస్తెఙ్‌. కొడొఃర్‌ తిండ్రెఙ్‌ మన్ని రొట్టెఙ్‌ లాగ్‌జి నుకుడిఃఙ్ సీనిక తగ్ఏద్‌”, ఇజి వెహ్తాన్‌.
28 అది, “ప్రబు, నీను వెహ్తిక నిజమె. గాని నుకుడిఃఙ్‌బా కొడొఃర్‌ ఉణిజి బల్ల అడిఃగి అర్‌ప్తిక ఉణిజినె గదె ఇజి వెహ్తాద్‌.
29 యేసు, నీను బాగ వెహ్తి. నీను ఇండ్రొ సొన్‌అ. ఆ దెయం నీ గాలుఙ్‌ డిఃస్త సొహద్ ఇహాన్‌.
30 అది ఇండ్రొ సొన్సి సుడ్ఃతిఙ్‌ గాల్సి మన్సం ముస్కు గూర్త మహాద్‌. దెయెం దనిఙ్‌ డిఃస్త సొహద్.
యేసు బొయ్‌ర నతి ఆతివన్నిఙ్‌ నెగెండ్ కిజినాన్‌
31 యేసు తూరు ప్రాంతం డిఃసి, సీదోను, దెకపొలి ప్రాంతమ్‌దాన్‌ గలీలయ సమ్‌దరం డగ్రు వాతాన్.
32 నస్తివలె బొయ్‌ర నతియాతి ఒరెన్‌వన్నిఙ్‌ సెగొండార్‌ యేసుబాన్‌ తత్తార్. “విన్ని ముస్కు కియు ఇడ్ఃజి నెగెండ్ కిఅ”, ఇజి బతిమాల్‌జి వెహ్తార్‌.
33 యేసు లోకుర్‌బాణిఙ్‌ వన్నిఙ్‌ అఙ ఒసి, డెఃస్కెఙ్‌ వన్ని గిబ్బిదు ఇడ్తాన్. వన్ని సొంత డెఃస్కాదు పూస్తాండ్రె గుల్ల వన్నిఙ్‌ నాలికాదు ముట్తాన్.
34 ముట్తాండ్రె ఆగసం దరోట్‌ దేవుణుదిఙ్‌ సుడ్ఃజి ఉసుర్‌ గొటాండ్రె బాదఆజి ఎపాత ఇజి వెహ్తాన్‌. దని అర్దం ఇనిక ఇహిఙ రే ఆదెఙ్ ఇజి.
35 వెటనె వన్నిగిబ్బిఙ్‌ వెండ్రెఙ్, వన్ని నాలిక వర్గిదెఙ్‌ వాతాద్. వాండ్రు బాగ వర్గిదెఙ్‌ మొదొల్‌స్తాన్.
36 “ఎయెవెట వెహ్మట్‌”, ఇజి యేసువరిఙ్‌ కసితం వెహ్తాన్‌. నా వందిఙ్‌ వెహ్మట్‌ ఇజి నండొ వెహ్తిఙ్‌బా అలెఏండ వారు యేసువందిఙ్‌ మరి నండొ వెహ్తార్‌.
37 యేసు విజు బాగ కిత్తాన్. బొయ్‌రవన్నిఙ్‌బా వెనివజ, గుల్లవన్నిఙ్‌బా వర్గినివజ కిజినాన్‌ ఇజి వారు వెహ్తరె బమ్మ ఆతార్.