3
1 మిఙి సుడ్ఃదెఙ్‌ ఇజి మఙి మని ఆస బరిస్తెఙ్‌ అట్‌ఏండాతిఙ్, మాపు ఏదెన్సు ఇని పట్నమ్‌దు మంజినిక నెగ్గిక ఇజి ఒడిఃబిజినె,
2 యేసుక్రీస్తు ముస్కు మీరు ఇడ్తి నమకమ్‌దు కద్లిఎండ మిఙి దయ్‌రం వెహ్సి, సత్తు మని వరి లెకెండ్ ముఙాల నడిఃపిస్తెఙ్‌ ఇజి యేసుక్రీస్తు వందిఙ్ సువార్త సాటిస్తెఙ్‌ మా వెట కూడ్జి దేవుణు పణి కినికానాతి మా తంబెరి ఆతి తిమోతిఙ్, మీ డగ్రు పోక్తాప్.
3 అందెఙె మీ లొఇ ఎయెన్‌బా యా కస్టమ్‌కాఙ్‌ సుడ్ఃజి వెనుక సొన్‌ఎండ, యేసుక్రీస్తు ముస్కు మని నమకమ్‌దు గటిఙ నిల్సి మండ్రెఙ్ వలె. ఎందనిఙ్‌ఇహిఙ మాటు యాకెఙ్‌ ఓరిస్తెఙ్‌ వలె ఇజి మీరు నెసినిదెర్.
4 నిజమె, మాపు మీ వెట మహివలెనె మఙి హిమ్సెఙ్‌ వానె ఇజి మిఙి వెహ్సి మహప్. యాకెఙ్‌ మాపు వెహితి లెకెండ్‌నె జర్గితె ఇజి మీరు నెసినిదెర్.
5 ఎలాగబా సయ్తాను సెఇ పణిఙ్‌ కిదెఙ్‌ ఇజి మీ మన్సుదు ఆస పుటిసి, మీ నడిఃమి మాపు కితి పణిఙ్‌ విజు ఉండ్రి వేల పణిదిఙ్‌ రెఏండ కిత్తాను ఇజి నాను తియెలాత. అందెఙె దన్ని వందిఙ్ ఎత్తు కిజి, యాక ఓరిస్తెఙ్‌ అట్‌ఏండ మీ నమకం వందిఙ్ నెస్తెఙ్‌ ఇజి నాను తిమోతిఙ్ పోక్త.
తిమోతి తతి నెగ్గి కబ్రు
6 గాని తిమోతి మీ బాణిఙ్‌ ఏలె మా డగ్రు వాతాన్. మిఙి దేవుణు ముస్కు మని నమకం వందిఙ్, మీ ప్రేమ వందిఙ్ నెగ్గి కబ్రు తతాన్. మాపు మిఙి సుడ్ఃదెఙ్‌ ఆస ఆజిని లెకెండ్, మీరుబా మఙి సుడ్ఃదెఙ్‌ ఆస ఆజినిదెర్‌ ఇజి వాండ్రు వెహ్తాన్‌. మరి మా వందిఙ్ ఎస్తివలెబా సర్దాదాన్‌ ఎత్తు కిజినిదెర్‌గె.
7 అందెఙె తంబెరిఙాండె, మాపు మఙి వాతి దుకమ్‌దాన్‌ మహివలె, మఙి హిమ్సెఙ్‌ వాతివలె మీ నమకం వందిఙ్ విహపె ఉసార్‌ కిబె ఆతాప్.
8 మీరు ప్రబు ముస్కు మని నమకమ్‌దు గటిఙ నిల్సి మంజినిదెర్, అందెఙె దేవుణు ముస్కు మిఙి మని నమకం మా బత్కు లెకెండ్‌నె మఙి విలువాతిక ఆజినాద్.
9 దేవుణు ముందాల మీ వందిఙ్ మన్ని విజు సర్ద వందిఙ్ దేవుణుదిఙ్‌ వందనమ్‌కు ఎసొ వెహ్తిఙ సరి ఆనాద్‌? ఎస్సొ మాపు వెహ్తిఙ్‌బా అక్క తక్కునె మంజినె.
10 మాపు మిఙి మరి ఉండ్రి సుటు సుడ్ఃజి దేవుణు ముస్కు మని మీ నమకమ్‌దు మిఙి తకు మనిక పూర్తి కిదెఙ్‌ ఇజి ఉండ్రి సుటు అవ్‌కాసం దొహ్‌క్తికెఙ్‌ ఇజి రెయు పొకల్‌ దేవుణు వెట పార్దనమ్‌దు నండొ బతిమాలిజినాప్.
11 మా బుబ్బాతి దేవుణుని మా ప్రబువాతి యేసు మీ డగ్రు వాదెఙ్, మఙి ఇని అడ్డు సిల్లెండ సరి తొరిసిన్.
12 మాపు మిఙి ప్రేరెమిసిని లెకెండ్ మీరు ఒరెన్‌ మరి ఒరెన్‌ వెట ప్రేమిస్తెఙ్, మరి మీ లొఇ మని ప్రేమ నండొ అజి పొగిజిని లెకెండ్ ప్రబు మిఙి సాయం కిపిన్.
13 మా ప్రబువాతి యేసు వన్ని నీతి నిజాయితి మని వరి వెట వాని వలె, మా బుబ్బాతి దేవుణు ఎద్రు మీరు ఇని కరయి సిల్లెండ, నీతి నిజాయి‌తిదాన్‌ మండ్రెఙ్, మీ మన్సుదు దేవుణు మిఙి సత్తు సిపిన్.