9
1 నమ్మిత్తి వరి వందిఙ్ కిజిని యా పణి వందిఙ్ నాను మిఙి రాస్తెఙ్‌ అక్కర్‌ సిల్లెద్‌.
2 సాయం కిదెఙ్‌ మీ మన్సుదు మని ఆస నాను నెసిన. అందెఙె అక్కాయదికార్‌ ఆతి మీరు దేవుణు వందిఙ్ సీదెఙ్ ఇజి నీరుండాన్‌ తయార్‌దాన్‌ మనిదెర్‌ ఇజి మీ వందిఙ్ మాసిదోనియాది వరివెట పొగ్‌డిఃజి వెహ్సి మహప్. మీ మన్సుదు మని ఆసదిఙ్‌ నెస్తారె వరి లొఇ నండొండార్‌ సీదెఙ్ ఇజి ఉసార్‌ ఆజినార్.
3 మాపు మీ వందిఙ్ పొగ్‌డిఃజి వెహ్తికెఙ్‌అర్దం సిల్లికెఙ్‌ ఆదెఙ్‌ ఆఏద్‌ ఇజి ఏలు యా తంబెరిఙ పోక్సిన. నాను వెహ్తి వజ సాయం సీజి పోక్తెఙ్‌ తయార్‌ ఆజి మండ్రు.
4 ఉండ్రి వేలా మాసిదోనియాదికాన్‌ ఒరెన్ మా వెట వాతిఙ, మీరు తయార్‌ అఏండ మనిక సుడ్ఃతిఙ, మీ ముస్కు మఙి మని యా నమకం వందిఙ్ అయావలె మఙి సిగు వానాద్, మీరుబా సిగు ఆనిదెర్.
5 అందెఙె, మీరు సీనాప్‌ ఇజి వెహ్తి మనిక లోబం కిఏండ ముఙాలె తయార్‌ కిజి మండ్రెఙ్ ఇజి యా తంబెరిఙ మూఙాల్‌నె మీ డగ్రు సొండ్రు ఇజి వెహ్సి పోక్తెఙ్‌ ఇజి నాను ఒడిఃబిత. అహిఙ మీరు సీనా ఇజి వెహ్తి మనిక లోబమ్‌దాన్‌ సీని లెకెండ్‌ మన్‌ఏండ పూర్తి మన్సుదాన్‌ సీని సంత లెకెండ్‌ మంజినాద్.
దేవుణుదిఙ్ లోబం కిఏండ సర్దదాన్ సీదెఙ్ ఇజి వెహ్సినాన్‌.
6 తక్కు విత్నికాన్‌ తక్కునె పంట కొయ్నాన్. నండొ విత్నికాన్‌ నండొ పంట కొయ్నాన్. ఇజి గెపతం కిజి మండ్రు.
7 ఒరెన్ ఒరెన్, ఎస్సొ సీన ఇజి వన్ని మన్సుదు నిర్‌ణెం కిత్తిలెకెండ్‌నె సీదెఙ్. అక్క సణఙిఎండ, బలవంతమ్‌దాన్‌ ఆఏండ సీదెఙ్ వలె. ఎందనిఙ్‌ ఇహిఙ సర్దదాన్ సీని వరిఙ్‌ దేవుణు ప్రేమిసినాన్.
8 ఎస్తివలెబా మిఙి కావాలిస్తి దన్నిఙ్‌ ఇంక లావ్‌ మండ్రెఙ్‌ని, మరి విజు నెగ్గి పణిఙ వందిఙ్ లావ్‌ సీదెఙ్ మిఙి మండ్రెఙ్, వన్ని దయాదర్మమ్‌దాన్‌ సీజిని దేవుణు ఇంక మరి ఒద్దె మిఙి సీదెఙ్ అట్నికాన్.
9 దిన్ని వందిఙ్ దేవుణు మాటదు యాలెకెండ్‌ రాస్త మనాద్. “వాండ్రు దోసదాన్‌ కెహ్సి విరివిత్సి ఇనాయమ్‌కు బీదాది వరిఙ్‌ సీజినాన్. వన్ని నీతి నిజాయితి ఎలాకాలం మంజినిక”.
10 విత్ని వన్నిఙ్‌ విత్కుని ఉండెఙ్‌ తిండి సీని దేవుణు సీజినాన్. మిఙి మా వాండ్రు విత్తెఙ్‌ విత్కు సీజి, మీరు విత్నికెఙ్‌ నెగెండ్‌ పిరిప్సి లావ్‌ కిజి, మీరు కిజిని నీతి నిజాయితి పణిఙ్‌బా లావ్‌ కిబిస్నాన్.
11 విజు సఙతిఙ లొఇ మీరు లావ్‌ మన్నికిదెర్‌ కిబె ఆనిదెర్లె. అందెఙె ఎస్తివలెబా మహి వరి వందిఙ్ లావ్‌ సీదెఙ్ మీరు అట్నిదెర్. మీరు మఙి సిజిని దనిదటాఙ్‌ మాపు మహివరిఙ్‌ సీనివలె మా వెట దేవుణుదిఙ్ వందనమ్‌కు వెహె ఆనాద్‌లె.
12 యా పణివెట నమ్మిత్తి వరి అవ్‌సరమ్‌కు తీరిసినికాదె ఆఏండ దేవుణు వందిఙ్ వెహ్సిని వందనమ్‌కు మరి ఒద్దె లావ్‌ ఆజినె.
13 యా పణిఙాణిఙ్‌ మీరు తగ్నికిదెర్‌ ఇజి రుజుప్‌ కిజినిదెర్. అందెఙె మీరు క్రీస్తు సువార్తదిఙ్‌ ఒప్పుకొటి లొఙిత్తి వందిఙ్, మిఙి కల్గితి మన్నికెఙ్‌ వరిఙ్‌ని మహి వరిఙ్‌ విజెరిఙ్‌ లోబం కిఎండ సీదెఙ్ తయార్‌ ఆతి వందిఙ్ వారు విజెరె దేవుణుదిఙ్ పొగ్‌డిఃనార్‌లె.
14 వరిఙ్‌ సాయం కిదెఙ్‌ దేవుణు మీ ముస్కు తోరిస్తి విజు దనిఙ్‌ మిస్తి వన్ని దయా దర్మం వందిఙ్, మీ వందిఙ్ పార్దనం కినివలె, మిఙి సుడ్ఃదెఙ్‌ మన్సుదు ఆసదాన్‌ మంజినార్.
15 వెహ్తెఙ్‌ అట్‌ఇ నన్ని వరం సిత్తి దేవుణుదిఙ్ వందనమ్‌కు!