3
Uɗara̱kpa u ndishi n shinga
(Aɗkp 7:11-21)
1 Magono ma Zuba ma lyai kapala n kadyanshi, <<Aꞌayin a ɗa baci vuma wa tuko kune ku uɗara̱kpa u ndishi n shinga a asuvu a ushiga u anaka u ne, u tuko Magono ma Zuba kagono ko tani kanuku ka ka lyopoi wa.
2 U ka̱na̱ ta̱ u taɗangu kukere ku ne a kaci ka manama ma uɗara̱kpa mi, u kiɗa ma a utsutsu u Katani ka Ugawunsa. Aku alobo a Haruna aɗara̱kpi a vishana̱sa mpasa mi a apashi a asuɗara̱kpa vi gba̱.
3 Asuvu uɗara̱kpa u ndishi n shinga vi, ili iꞌya wa yanka kune ku ilikulya ubana a asu u Magono ma Zuba iꞌya na: manivi ma ma palai ucanga u katsuma̱ n ma ma̱ri a zuba u ucanga u katsuma̱ vi gba̱.
4 U takpa dem nluba n re n manivi ma ma paɗara le n kapashi ka ka lai tsulobo a asu u akaɗa, u ɗa a ka takpa kaɓolo na̱ nluba n re n nala mi.
5 Aku alobo a Haruna aɗara̱kpi a runukpa iꞌya a zuba u asuɗara̱kpa, kaɓolo n uɗara̱kpa u urunukpa u ɗa wa̱ri a nɗanga ma akina; kune ku ilikulya ku magula̱ni ma shinga ka a yain n akina ubana a asu u Magono ma Zuba ka la vi.
6 <<U ka̱na̱ baci kune ku uɗara̱kpa u ndishi n shinga vi ubana a asu u Magono ma Zuba asuvu a ushiga u nlala u ɗa baci, she u tuko kagono ko tani kanuku ka ka lyopoi wa.
7 Maku ma macon ma baci u tukoi adama a uɗara̱kpa vi, she u tuko ma a kapala ka Magono ma Zuba.
8 U ka̱na̱ ta u taɗangu kukere ku ne a kaci ka manama ma uɗara̱kpa mi, u kiɗa ma a utsutsu u Katani ka Ugawunsa. Aku alobo a Haruna a vishana̱sa mpasa mi a apashi a asuɗara̱kpa vi gba̱.
9 Asuvu uɗara̱kpa u ndishi n shinga, ili iꞌya i ka̱na̱i u tuko adama a kune ku ilikulya ubana a asu u Magono ma Zuba iꞌya na: uwunja vi gba̱ n manivi ma ne a kiɗa u ɗa a asu u ɗa a gawunsai n katele ka kucina̱ n manivi ma ma palai ucanga u katsuma̱ n ma ma̱ri a zuba u ucanga u katsuma̱ vi gba̱.
10 Na̱ nluba n re n manivi ma ma paɗara le n kapashi ka ka lai tsulobo a asu u akaɗa, u ɗa a ka takpa kaɓolo na̱ nluba n re n nala mi.
11 Kaɗara̱kpi ki ka runukpa iꞌya a zuba u asuɗara̱kpa; kune ku ilikulya ubana a asu u Magono ma Zuba ka la vi.
12 <<Vuma vi u tuko baci maryaɗiga adama a uɗara̱kpa, she u tuko ma a kapala ka Magono ma Zuba.
13 U ka̱na̱ ta u taɗangu kukere ku ne a kaci ka manama ma uɗara̱kpa mi, u kiɗa ma a utsutsu u Katani ka Ugawunsa. Aku alobo a Haruna a vishana̱sa mpasa mi a apashi a asuɗara̱kpa vi gba̱.
14 Asuvu uɗara̱kpa vi, ili iꞌya u ka̱na̱i u tuko adama kune ku ilikulya ubana a asu u Magono ma Zuba iꞌya na: manivi ma ma palai ucanga u katsuma̱ n ma ma̱ri a zuba ucanga u katsuma̱ vi gba̱.
15 Na̱ nluba n re n manivi ma ma paɗara le n kapashi ka ka lai tsulobo a asu u akaɗa, u ɗa a ka takpa kaɓolo na̱ nluba n re n nala mi.
16 Kaɗara̱kpi ki ka runukpa iꞌya a zuba u asuɗara̱kpa; kune ku ilikulya ku magula̱ni ma shinga ka a yain n akina ubana a asu u Magono ma Zuba ka la vi. Gba̱ manivi mi ma Magono ma Zuba ma.
17 U ka̱na̱ ta̱ ya lya manivi ma nnama ko mpasa wa. Mele ma na mi ma yan ta̱ pini a uyan u ɗe ushani ubana, a asu u ɗa baci dem ya dusuku.>>