28
1 Beeɖi Sabáátɩ kifé láhaɖɩ tɛ́ɛrɛ́‑tɛ́ɛrɛ́ nɛ́, Marɩyáma Magɩdaláa alʊ́ na Marɩyáma lííní boobó sɩ bɛbɛ́ɛ́m bɔɔlááwʊ.
2 Ńna‑ńna gɛ adɛ waabá biséle. Ɖádʊ́ʊ‑dɛ́ɛ malááyɩ́ka waalɩ́ɩ ɩsɔ́ɔ́dáá ití ibiláázɩ bʊ́ʊ́rɛ ití ɩcɔ́ɔ ɖɩrɔ.
3 Wénɖée nyazɩ wɩlɔɔ́ bɩka ɩgbɩná izóóna nɛ́ aabá avʊlʊmáa párɩ́‑párɩ́ nyazɩ ɖɔ́m‑bɔ́.
4 Ngɛ bɩɩɖʊ fereɖáa nɩndáárɛ, bénzelíi bɩka babɩ́sɩ nyazɩ ɩsɩɖáa.
5 Amá malááyɩ́ka wɔɔdɔ́ aláa sɩsɩ: «Mɩ́nyɔ́ɔ́ ɩ́kanɩ́ɩ nɩndáárɛ. Mányɩ sɩsɩ Yeésu baagá yɩ ɖɛ́nɩ abɛlɩ́ akɔ́ɔ‑rɔ nɛ́ gɛ mɩ́njáádɩ.
6 Ɩvɛ́yɩ́ cé káma weevé ɩlɩ́ɩ ɩsɩɖáa‑daá ńŋɩnáa waavʊ́ndɔ́ḿ nɛ́; Ɩgɔ́nɩ ɩbɛ́ɛ lénlé baavʊ́nvɩ́ɩ́zɩ yɩ nɛ́.
7 Ibó ɖasam ifééri ɩwanbaaráa sɩsɩ: Weevé ɩlɩ́ɩ ɩsɩɖáa‑daá. Wɛ́ndɛ́ɛ mɩ́ɩ́ nɩ́bááwʊ ɩɖɛ́ɛ Galilée. Ńna gɛ mɩ́ngɔmɔɔnáa yɩ. Wentí sɩ mevééri mɩ́ɩ nɛ́ nbɩlɛ́.»
8 Na nɩndáárɛ na wenbi‑niíni kʊ́bɔńɖɛ gɛ boodoóziná balɩ́ɩ bɔɔlááwʊ‑jɔ́ bese bobó bekévééri Yeésu‑dɛ́ɛ wanbaaráa laabáárʊ kɩḿ.
9 Ńna‑ńna gɛ Yeésu wɔɔgɔ́nɩ ɩkɛ́tɩ wɛ ɩtɔ́ wɛ sɩsɩ: «Mɛ́ɛ́zɛ́ɛ mɩ́ɩ!» Ngɛ boogóduu ɩjɔ́ bosóm ɩnʊ́vɔ́‑daá bokúu yɩ tɛ́ɛ́dɩ.
10 Ngɛ Yeésu wɔɔdɔ́ wɛ sɩsɩ: «Ɩ́kanɩ́ɩ nɩndáárɛ. Ibó ifééri mogoobíya sɩsɩ bɛ́ɖɛ́ɛ Galilée. Ńna gɛ bánganáa ma.»
11 Aláa bɛḿ bɔwɛ nɩ́bááwʊ‑daá nɛ́, ngɛ fereɖáa‑daá nɛbɛ́rɛ woobó tɛ́ɛ́dɩ‑daá bafa kʊ́bɔnáa wenbí rɩ́ŋa bɩɩlá nɛ́‑dɛ́ɛ laabáárʊ.
12 Bɛlɛ́ boodúúzi ɖamá bána balá sááwʊ́ra nɛ́, ngɛ baava sɔ́ɔ́jawá fereɖáa bɛḿ liide‑bɔnɛ́,
13 befééri wɛ sɩsɩ: «Wentí sɩ ɩŋmátɩ nɛ́ nɖɔ́: Ɩdɛ́ɛ wanbaaráa wɔɔgɔ́nɩ nuvoowú baŋmɩ́ɩ́lɩ yɩ sáátɩ wenkí ɖónɖóm nɛ́.
14 A ngʊ́ tɔ́m waadála laadɔ́ɔ‑dɛ́ɛ nɩ́baadɛɛrʊ́, ɖɔ́ɔ́ sɩ ɖɩlɩzɩ́na yɩ bugutoluú na mɩ́nyɔ́ɔ́ mídónÿuú nɔwɔ́ya nakɩ́rɩ.»
15 Ngɛ bɛlɛ́ baamʊ liideé balá ńŋɩnáa baaŋmátɩ wɛ nɛ́. Bɛdɛ́ɛ ŋmatɩrɛ ɖɩḿ ɖɩrɔ, hálɩ na sinje bánŋmatɩ́ tɔ́m tɩḿ yahúúɖúwá lɔwʊ́táa.
16 Bɩɩga wanbaaráa fuú na naárʊ nɛ́, bɛɛɖɛ́ɛ Galilée bʊ́ʊ wenkí Yeésu waavʊ́nvééri wɛ sɩsɩ bóbó nɛ́‑kɩrɔ.
17 Baana yɩ nɛ́, ngɛ boozóm ɩnʊvɔ́‑daá bokúu yɩ tɛ́ɛ́dɩ, amá badaá nɛbɛ́rɛ waalá síka.
18 Ngɛ Yeésu woogóduu bɔjɔ́ ɩtɔ́ wɛ sɩsɩ: «Baava ma yíko rɩ́ŋa ɩsɔ́ɔ‑daá na adɛ laadɔ́ɔ‑rɔ.
19 Bɩlɛ́ nɛ́, ibó ɩbɩsɩná yíri‑báa wenkí‑dɛ́ɛ ɩráa mɛ́dɛ́ɛ wanbaaráa, ilíri wɛ lɩ́m‑daá ɩsɔ wɛ túúbá lɩ́m na Caáwʊ na Biyaalʊ́ na Kezeŋá ɖacɩrɩ‑nga‑dɛ́ɛ yɩ́ɖɛ‑daá,
20 ɩwɩ́lɩ wɛ bofu balá wenbí rɩ́ŋa máázɩ́ɩ́zɩ mɩ́ɩ nɛ́. Bɩɩga nɛ́, mɔ́wɛ mɩ́jɔ́ gɛ báa wɩ́rɛ wenɖé hálɩ ɖúúlínya kʊrʊ́ʊ.