20
1 «Ɩbɛ́ɛ wenbí bɛ́ngɛɛzɩnáa nɛ́: Ɖaána‑dʊ́ʊ naárʊ waalɩɩná tɛ́ɛrɛ́‑tɛ́ɛrɛ́ sɩ ɩcáa tɩmɛ‑lanɖáa balá yɩ tɩmɛ́rɛ ɩdɛ́ɛ viínyi fɔɔ́‑daá.
2 Ɩ́na tɩmɛ‑lanɖáa baaŋmátɩ bɩsáa sɩsɩ wɩ́rɛ ɩmʊ́ wɛ́nvɛrɩ́ɩ báa weení wɩ́rɛ tɩmɛ́rɛ liideé. Ngɛ weeyéle bɛɖɛ́ɛ tɩmɛ́rɛ lám viínyi fɔɔ́‑daá.
3 Tɛ́ɛ́rɛ kéréfu kéénííre waadálɩ́ɩ nɛ́, ngɛ waana nɛbɛ́rɛ ɖʊɖɔ bazɩ́ŋɛ́ɛ wɔnɔɔ́‑daá badánlaḿ neɖére,
4 ngɛ wɔɔdɔ́ wɛ sɩsɩ: Mɩ́nyɔ́ɔ́ ɖʊɖɔ ibó mɛ́dɛ́ɛ viínyi fɔɔ́‑daá ɩkála tɩmɛ́rɛ. Mɛ́nvɛrɩ́ɩ mɩ́ɩ wenbí bɩ́nbɔɔzɩ́ nɛ́.
5 Ngɛ bɛlɛ́ bɛɛɖɛ́ɛ. Ɩdaawʊ́ na kéréfu natúdóozo ɖaanɩ́ŋa waadálɩ́ɩ nɛ́, ngɛ waadáláḿ bɩlɛ́ nɔ́ɔ́.
6 Ɖaanɩ́ŋa‑rɔ kéréfu natʊ́nʊ́wá gɛ waadálɩ́ɩ. Ngɛ wɔɔdɔ́mɔɔná tɩmɛ‑lanɖáa nɛbɛ́rɛ kadɔ́ɔ‑daá. Ngɛ wɔɔbɔ́ɔ́zɩ wɛ sɩsɩ: wé rɔ gɛ ɖoo tɛ́ɛ́rɛ́ mɩ́zɩ́ŋɛ́ɛ ńna bɩka mɩ́dánlaḿ neɖére?
7 Ngɛ bɛlɛ́ boobúsi yɩ sɩsɩ: "Naárʊ tɔkpɔ́ɔ ɖáa sɩsɩ ɖíbo ɖɩlá yɩ tɩmɛ́rɛ." Ngɛ wɔɔdɔ́ wɛ sɩsɩ: "Mɩ́nyɔ́ɔ́ ɖʊɖɔ ibó mɛ́dɛ́ɛ viínyi fɔɔ́‑daá."
8 Ɖaanɩ́ŋa waalá nɛ́, ngɛ fɔɔ́‑dʊ́ʊ waayáa ɩdɛ́ɛ tɩmɛ́ bɛɛŋɩrʊ́ ɩtɔ́ yɩ sɩsɩ: "Yaa tɩmɛ́ lanɖáa bɩka njéle báa weení ɩdɛ́ɛ wɩ́rɛ tɩmɛ́rɛ liideé. Baazɩná wenbá biigbiiriná wɛ nɛ́ bɩka ndɛɛzɩná wenbá baaɖáa nɛ́."
9 Wenbá baabáázɩ tɩmɛ́rɛ ɖaanɩ́ŋa kéréfu natʊ́nʊ́wá nɛ́ bɔɔgɔ́nɩ. Ngɛ baamʊ wɩ́rɛ tɩmɛ́rɛ liideé.
10 Bɩɩdála wenbá baaɖáa nɛ́, bɔjɔɔ́ɔ sɩsɩ bánmʊ́ʊ bɩcɛzɩ́ baaganáa, amá bɛḿ ɖʊɖɔ baamʊ wɩ́rɛ tɩmɛ́rɛ liideé gɛ.
11 Baamʊ yɛ nɛ́, bánŋmɩɩdɩnáa ɖaána‑dʊ́ʊ sɩsɩ:
12 "Bana ɖɔ́ beegbííri bɔkɔ́nɩ nɛ́, áwa kʊ́ɖʊḿ gɛ baalá tɩmɛ́rɛ, ngɛ nyɛ́nvɛrɩ́ɩ ɖɔ́ɔ́ wenbá ɖáálá tɩmɛ́rɛ na fifíni wɩ́rɛ rɩ́ŋa nɛ́ ɖána wɛ ɖéyí‑ɖéyí?"
13 Amá ɖaána‑dʊ́ʊ woobúsi badaá kʊ́ɖʊḿ sɩsɩ: "Mɔɖɔndɩ módómúúli nya! Ɖáávʊ́nŋmátɩ bɩsáa sɩsɩ wɩ́rɛ tɩmɛ́rɛ liideé gɛ mɛ́nvɛrɩ́ɩ nya!
14 Mʊ nyɛ́dɛ́ɛ wɩ́rɛ tɩmɛ́rɛ liideé bɩka nɖɛ́ɛ. Mɛ́nvɛrɩ́ɩ nyána tɩmɛ‑lanɖʊ́ méégbííri mɔngbɔ́ɔ yɩ nɛ́ ɖéyí‑ɖéyí.
15 Bɩdafa ma nɩ́bááwʊ sɩsɩ málaná mɛ́dɛ́ɛ ɖɔ́ɔ́lɛ wenbí mɔ́zɔɔlɛ́ɛ nɛ́? Yáá máálá waaganáa kazɔ́ɔ nɛ́ gɛ nyánlɩɩ́ sʊ́ʊ́zɩ?"
16 Bɩlɛ́ gɛ wenbá beegbííri nɛ́ bɔ́ngɔnɩ́ bɛtɛ nɩ́bááwʊ bɩka wenbá bɛɛdɛ nɩ́bááwʊ nɛ́ bekpííri.»
17 Yeésu wángbáa Yerusalɛ́m nɛ́, ngɛ waalɩzɩ́ fuú na nɔwɔ́lɛ fɔɔlʊʊ́ ɩ́na wɛ bánnʊŋɛ́ bɩka wénveerím wɛ sɩsɩ:
18 «Iwélesi ma kazɔ́ɔ, ɖángbáa Yerusalɛ́m. Bángbáa becéle sarásɩ lanɖáa kʊ́bɔnáa na na bakʊ ɩdɔ́m bɔtɔ́ sɩsɩ bákʊ́ yɩ
19 na bɔkpɔ́ɔ yɩ becéle wenbá baasɩ Ɩsɔ́ɔ nɛ́ sɩsɩ bámʊ́ŋ yɩ, bamá yɩ, baká yɩ dɛ́nɩ abɛlɩ́‑akɔ́ɔ‑rɔ, amá wɛ́ náádóozo wɩ́rɛ ifé ɩlɩ́ɩ ɩsɩɖáa‑daá.»
20 Ńna gɛ Zebedée biyaalɩnáa ɩgɔɔ woogódúu Yeésu‑jɔ́ ɩ́na ibíya. Ngɛ woozóm waazá‑daá sɩ ɩbɔ́ɔ́zɩ yɩ nabʊ́rʊ.
21 Ngɛ Yeésu wɔɔbɔ́ɔ́zɩ yɩ sɩsɩ: «Wé gɛ nyɔ́zɔ́ɔlɛ́ɛ?» Ngɛ woobúsi yɩ sɩsɩ: «Mɔ́zɔɔlɛ́ɛ sɩsɩ nyɛ́dɛ́ɛ kowúrɔ́ɔ‑daá, nÿéle mébiyaalɩnáa nɔwɔ́lɛ bana badaá kʊ́ɖʊḿ ɩcɔ́ɔ nyánʊ́ʊ́nɩ kíɖííwú‑rɔ, waaganáa nyánʊ́ʊ́nɩ nɩbɩɩwʊ́‑rɔ.»
22 Yeésu woobúsi sɩsɩ: «Mɩ́ɩ́sɩ wenbí mɩ́nbɔɔzɩ́ nɛ́. Mɩ́nbɩɩzɩ́ ɩnyɔ́ɔ wahála kagbɔ́ɔ wenká sɩ mɔnyɔ́ɔ kɛ nɛ́?» Ngɛ boobúsi yɩ sɩsɩ: «Ɩɩ́n ɖánbɩɩzɩ́.»
23 Ngɛ Yeésu wɔɔdɔ́ wɛ sɩsɩ: Mɩ́nnyɔɔ́ máwahála kagbɔ́ɔ, amá a bɩɩga weení ɩcɔ́ɔ mánʊ́ʊ́nɩ kíɖíiwú yáá nɩbɩɩwʊ́‑rɔ nɛ́, bɩdɛkɛ́ɛ mɔ́ɔ́ mánváa kʊ bɩlɛ́ bɩdɛ́ɛ adá. Wenbá majaa waagbɩ́ɩ́rɩ yɛ ɩsɩ́ɩ nɛ́ gɛ sɩ bafa yɛ.»
24 Wanbaaráa fuú baaganáa waanɩ́ɩ wentí nɔwɔ́lɛ bana bɔ́nbɔɔzɩ́ nɛ́, ngɛ bɛɛyɛɛná wɛ baaná.
25 Amá Yeésu waayáa wɛ ɩtɔ́ wɛ sɩsɩ: «Mɩ́nyɩ bɩlɛ́ sɩsɩ yíriwa‑dɛ́ɛ wúrowá wánnaazɩ́ bɛdɛ́ɛ́dɩ‑daá ɩráa gɛ na bɛdɛ́ɛ yíko bɩka kʊ́bɔnáa bɛlɛ́ bánwɩlɩ́ɩ wɛ boɖóni.
26 Amá mɩ́nyɔ́ɔ́ nɛ́, bɩdɔbɔ́ɔ́zɩ bɩlɛ́ mɩ́lɔ́wʊ́táá. Hálɩ a bɩgɛ́ɛ sɩsɩ mɩ́dáá naárʊ sɔɔlɛ́ɛ ɩbɩ́sɩ kʊ́bɔnɩ́ mɩ́lɔwʊ́táa, ɩ́bɩ́sɩ mɩ́dɛ́ɛ bɔwʊtá‑dʊ́ʊ,
27 bɩka a mɩ́dáá naárʊ sɔɔlɛ́ɛ ɩbɩ́sɩ kaɖaa ńnɩ́, ɩ́bɩ́sɩ mɩ́dɛ́ɛ yoḿ.
28 Bɩlɛ́ gɛ tɔkɔ́nɩ sɩsɩ balá yɩ bɔwʊtá. Amá wɔɔgɔ́nɩ gɛ sɩ ɩlá ɩráa bɔwʊtá bɩka ɩkpɔ́ɔ iweezuú ɩfɛ́rɛná ɩráa zamɔ́ɔ‑dɛ́ɛ kɩmɛ́rɛ na boyuú lɛ́ɛ́dɩ.
29 Baalɩ́ɩ Yerikóo tɛ́ɛ́dɩ‑daá nɛ́, zamɔ́ɔ kʊ́bɔńgɩ woovu Yeésu.
30 Njɛma nɔwɔ́lɛ cɔɔ́ɔ nɩ́bááwʊ‑jɔ́ gɛ baanɩ́ɩ sɩsɩ Yeésu wɛ́nɖɛɛ kʊ nɛ́, ngɛ baabáázɩ agogo sɩsɩ: «Kʊ́bɔnɩ́, , nɩɩ ɖágʊnyɔḿ.»
31 Ngɛ zamɔ́ɔ wɔ́nɖɔwʊ́ʊ wɛ sɩsɩ bósu tɔ́m. Amá bɩdɛ́ɛ sáátɩ gɛ bɛlɛ́ baabá bóngoó bínjaarɩ́ sɩsɩ: Kʊ́bɔnɩ́, , nɩɩ ɖágʊnyɔḿ!»
32 Ńna gɛ Yeésu waazɩ́ŋ ɩyáa wɛ ɩtɔ́ wɛ sɩsɩ: «Wé gɛ mɩ́zɔɔlɛ́ɛ sɩsɩ mála mɩ́ɩ́?»
33 Ngɛ bɔɔdɔ́ yɩ sɩsɩ: «Ɖádʊ́ʊ, ɖɔ́zɔɔlɛ́ɛ ɖáázá ifulú.»
34 Bɩɩlá Yeésu kʊnyɔḿ nɛ́, ngɛ weedekiná baazá. Ńna‑ńna gɛ baabáázɩ náa; ngɛ baagʊrʊ́ bofu yɩ.