2
Иона пойәк
1 Турәм Куща ун веса Иона йŏхи ԓавемәты партсәԓы; Иона щи вес хŏн ԓыпийән хуԓәм хӑтәԓ пӑ хуԓәм ат ус.
2 Иона Турәм Куща ԓўв Турмәԓ пеԓа вес хŏн ԓыпи эԓты пойәкщәс.
3 Пӑ йастәс:
«Шука ма питмем урәӈән Турам Куща пеԓа пойәкщәсәм,
пӑ Ԓўв мӑнэм хуԓсәԓы;
ма иԓта турәм эԓты уваԓсәм,
пӑ Нӑӈ ма тўр сыйэм хуԓсэн.
4 Нӑӈ мӑнэм мӑԓ йиӈка, щарәс сӑма, шуйԓәптәсэн,
ма йикән лӑп ўсайәм,
иса Нӑӈ йикԓан, Нӑӈ хўпԓан
ма нўмпемән йӑӈхиԓысәт.
5 Ма йастәсәм:
Нӑӈ мӑнэм куш сэм сайа йэԓ воштәсэн,
ма ищи пӑ Нӑӈ йэмәӈ хотэн шийаԓәԓэм.
6 Ԓыԓэм сŏхәнты унты ма йиӈкәтән ӑпәԓтсайәм,
пӑтыԓы тӑхайа ма щи тухәрсайәм;
щарәс лывәщән ŏхем лӑп йŏвәртса.
7 Кев вŏш унты ма иԓ шуйԓәсәм,
мўв ԓўв йэртэпԓаԓән мӑнэм веккеша лӑп петсәԓы;
Нӑӈ пӑ, Турәм Куща, ма Турмем,
ма ԓыԓэм иԓта турәм эԓты нŏх туԓэн.
8 Хун ма ԓыԓэм сŏхәнты питәс,
ма Турәм Куща эԓты нумәԓмәсәм,
пӑ ма пойкем Нӑӈ хуԓсэн,
Нӑӈ йэмәӈ хотэна пойкем йŏхтәс.
9 Хŏй йурԓы пӑ нэмәԓтыйа ӑт рӑхты ŏтԓаԓ пеԓа пойәкщәԓәт,
Йӑм Сӑмәӈ Ŏтэԓ хӑйԓәт.
10 Ма пӑ ишкаԋщәп арән Нӑӈен йирән туԓәм;
мўй йастыԓысәм, верԓэм:
Турәм Куща хŏща нŏх пайтәсты щир уԓ!»
11 Турәм Куща ун веса партәс, пӑ ԓўв сорәм мўва Иона ким охтаԓсәԓы.