7
Стефан по̆тәр
1 Щиӈәԋща Турма йир верты ŏх ики Стефан иԋщәссәԓы: «Тӑми щиты а мўй?»
2 Туп ԓўв йастәс: «Хӑнам йох пӑ ащет! Хуԓәнтыйаты. Йэмәӈ нŏви Турәм мўӈ Авраам ащев хŏща Месопотамия мўвән этәс, Харран воша касәԓмаԓ йэԓпийән,
3 пӑ ԓўвеԓа йастәс: 'Нӑӈ мўвен эԓты пӑ нӑӈ рутэн эԓты пӑ нӑӈ ащен хот эԓты эта пӑ мӑты мўв нӑӈена аԉԓәм, щи мўва мӑна'.
4 Щиӈәԋща ԓўв Халдей мўв эԓты этәс пӑ Харран вошән уԓты хӑр ԓэщатәс; щиԓта пӑ, ԓўв ащеԓ пӑрмаԓ йўпийән, Турәм ԓўвеԓ тӑм мўва касԓәптәсԓы, хŏта ин нын уԓԓәты.
5 Пӑ ԓўвеԓа и кўр лоп арат йўкан тӑм мўвән ӑт мӑс. Туп Турәм ԓўвеԓа пӑ ԓўв ԋавремԓаԓа тӑм мўв тӑйты урәӈән мӑты йастәсԓы, щи пŏрайән хŏԓна Авраам и ԋавремийэ ӑт тӑйәс.
6 Щӑԓта Турәм ԓўвеԓ йастәс, ԓўв ԋавремԓаԓ па мўвән касԓәм хŏйатәта питԓәт пӑ па мўв хŏйатәта тынԓы-пелԓы рупата ԋўрты питԓәт, щӑԓта йэрмәԓтты уԓәпсайән ԋӑԓсот кем тӑԓ уԓты питԓәт.
7 'Туп Ма', - Турәм йастәс, - 'щи мир хŏща сўт верԓәм, хŏй хŏща ԓыв тынԓы-пелԓы рупата ԋўрԓәт; пӑ щи йўпийән ԓыв щиԓта этԓәт пӑ тӑм уԓты тӑхайән Мӑнэма йир туты питԓәт'.
8 Пӑ Турәм Авраама эвәтты щир йастантәпса мӑс. Авраам Исаак сэма пайтәс пӑ ԋийәԓмет хӑтәԓән эвәтты верән версәԓы; Исаак Иаков сэма пайтәс, Иаков пӑ – кӑтхŏщйаӈ опращ икет.
9 Ун ԓӑтәӈ опращ икет, сӑмԓаԓ щариты пӑтыйән, Иосиф Египта тынысэԓ; туп Турәм ԓўв пиԓәԓән ус,
10 пӑ ԓўвеԓ иса кӑмән хŏрпи шук эԓты хŏԓт павәтсәԓы, пӑ ŏш–щащ пӑ фараон, Египет хон йӑм сӑм ԓўвеԓа мойԓәсԓы, щи хонән ԓўв Египет хŏща пӑ ԓўв хон хотәԓ хŏща иса кущайа пŏтса.
11 Щӑԓта ԓэԓԓы пŏра пӑ ун шук Египет пӑ Ханаан мўвӈән ԓŏвата иса йŏхтәс, пӑ мўӈ ащиԓув ԓэтŏт ӑт уйтыԓысәт.
12 Иаков пӑ, Египетән ԋаԋ ԓат сэм уԓты хуԓмаԓ кемән, мўӈ ащиԓув оԓәӈмет пўш щи китсәԓы.
13 Хун кимет пўш [ԓыв тŏхи йŏхәтсәт], Иосиф ԓўв йайԓаԓа аԉәсәс, пӑ Иосиф рут фараон хонән уйәтты питса.
14 Щи йўпийән Иосиф ԓўв Иаков ащеԓ пӑ хŏԓ ԓўв рутԓаԓ вохты партсәԓы, ԋийәԓйаӈ пеԓа вет арат хŏйат ус.
15 Иаков Египта ўншәс, пӑ щита пӑрәс пӑ мўӈ ащиԓув па;
16 Пӑ Сихем воша тўвман пӑ хŏшапәӈ кев ԓыпийа пŏнман усайәт, щи тӑха Авраам щелŏхән Сихемән уԓты Еммор пŏхәт эԓты ԓутсәԓы.
17 Щи мŏртән, хун аԉәм вер тӑԓаӈа йиты пŏра ванамәты питәс, мўй эԓты Турәм Авраама так йасәӈ мийԓыйәс, мирәԓ Египетән энмәԓтыйәс пӑ арамийәс,
18 щи унты, хун па хон питәс, хŏй Иосиф ӑт уйәтсәԓы.
19 Ԓўв, мўӈ рутэв йэщаԓт ŏщмарԓыман, мўӈ ащиԓув йэрмәԓтысԓы, ԓывиԓаԓа ай ԋавремԓаԓ йовәԓты партсәԓы, ԓыԓӈа ӑт ат хӑщсәт.
20 Тӑм пŏрайән Моисей сэма питәс, Турәм йэԓпийән хŏрасәӈ ус. Хуԓәм тыԓәщ ԓўв ащеԓ хотән эсәмән ԓапәтман ус.
21 Хун вŏщкәса, фараон эвийән ўса пӑ ԓўв хŏщайәԓ, ԓўв пŏхәԓ иты, энмәԓтсәԓы.
22 Пӑ Моисей аратәԓ иса Египет ŏша–щаща утәԓтәма ус, йасәӈԓаԓән пӑ верԓаԓән йўрәӈ ус.
23 Хун пӑ ԓўв ԋӑԓйаӈ тӑԓа йис, ԓўв хӑнам йохԓаԓ, Израиль пŏхәт, хŏща йӑхты нŏмәсән йŏхәтса.
24 Пӑ, ԓыв эԓтыԓаԓ ит, атмащ йэшаԓәты кащаԓәмаԓ кемән, эԓт питсәԓы. Пӑ кетмәм ŏт урәӈән Египет ху пӑратсәԓы.
25 Моисей нумәсәс, ԓўв хӑнам йохԓаԓ ŏша пайәтԓәԓаԓ, ԓўв йошәԓ сӑхат ԓывиԓаԓа Турәм нŏх пайтәсты щир мӑԓ; тўп ԓыв ŏша ӑт пайәтсэԓ.
26 Кимет хӑтәԓ, хун ԓыв эԓтыԓаԓ кӑтән кўтәрмәстән, ԓўв йŏхтәс пӑ ԓынан йӑм щира уԓты пеԓа хўщиԓысԓы, пŏтәртман: «Нын – хӑнам йохӈән; мўйа кўтԓәнән йэшащԓәтән?»
27 Туп рутәԓ йэшаԓәты ŏт ԓўвеԓ йэԓ пŏткәсԓы, йастәман: 'Хŏйән нӑӈ мўӈ нўмпева кущайа пӑ сўт икийа пŏтсайән?
28 Нӑӈ мосәӈ мӑнэм па веԓты ԓӑӈхаԓән, хŏты мŏԓхатәԓ Египет ху веԓсэн?'
29 Тӑм йасӈәт эԓты Моисей хŏнтас пӑ Мадиам мўв хŏща йŏхтәм хŏйата йис, щита ԓўв эԓтэԓ кӑт пŏх сэма питәс.
30 Ԋӑԓйаӈ тӑԓәԓ тэкнәм йўпийән Синай кев таԓ хишәӈ мўвән тўтән ԓэты пеԓантыты варәс похәл кўтән Моисей йэщаԓт Турәм Куща ангел этәс.
31 Моисей, щит шийаԓәмаԓ кемән, щи ныты ŏт эԓты пакнысыйәс; хун йӑма вантыты урәӈән, вана шушәс, ԓўв Турәм Куща тўр сый хуԓмәс:
32 'Ма нӑӈ ащиԓан Турәм, Авраам Турәм пӑ Исаак Турәм пӑ Иаков Турәм'. Моисей, хŏрщәм эԓты тӑрыман, йэщаԓт ватты ӑт веритәс.
33 Щӑԓта Турәм Куща ԓўвеԓа йастәс: 'Нӑӈ кўрԓан эԓты ԓумтәмен хŏԓт эӈхи, щи тӑха, хŏта нӑӈ ԓойԓән - щит йэмәӈ мўв.
34 Ма Египетән Ма мирэм шукатты вер ватԓәм, пӑ ԓўв эӈәԓты сыйәԓ хуԓԓәм, пӑ ԓўвеԓ хŏԓт пайәтты иԓ эсԓәщсәм: Щиӈәԋща, мӑна, Ма нӑӈен Египта китԓэм'.
35 Тӑм Моисей, хŏй ԓыв вана ӑт ўсэԓ, йастәман: 'Хŏйән нӑӈ мўӈ нўмпева кущайа пӑ сўт икийа пŏтсайән?' Турәм кущайа пӑ хŏԓт пайәтты ŏта китсәԓы ангеләԓ сӑхат, хŏй ԓўвеԓа пеԓантыты варәс кўтән этԓыйәс.
36 Тӑм Моисей Египет мўвән, пӑ Ўрты щарәсән, пӑ таԓ мўвән вантыԓԓаӈәԓ верәт пӑ йэмәӈ посәт ԋӑԓйаӈ тӑԓ хўват верман, ԓывиԓаԓ Египет эԓты йэԓ тусԓы.
37 Тӑми щи Моисей, хŏй Израиль пŏхәта йастәс: 'Турәм айкеԓ туты хŏйат нынана Турәм Куща нын Турмән нын хӑнам йохԓән кўт эԓты ма итэмән мӑԓ; Ԓўвеԓ хуԓәнтаты'.
38 Тӑми щит, хŏй таԓ мўвән ӑктәщәм Израиль мир хŏща ангел пиԓән пӑ мўӈ ащиԓув пиԓән ус, ангел Синай кев ԓоӈәԓән ԓўв пеԓайәԓ пŏтәртәс, пӑ ԓўв ԓыԓәӈ йасӈәт вана ўсԓы, мўӈева мӑты урәӈән,
39 хŏй пеԓа мўӈ ащиԓув хуԓәтты ŏтәта уԓты ӑт ԓӑӈхасәт, ԓўвеԓ пўӈԓа хирәтсэԓ пӑ ԓўв сӑмԓаԓән Египет пеԓа керԓәсәт,
40 Аарона йастәман: 'Мўӈева ԓуӈхәт вера, хŏйтат мўӈ йэԓпевән ԓуԓән ат мӑтсәт ; Моисей, мўӈев Египет мўв эԓты йэԓ тувәм ŏтэв, ӑт уйәтԓэв, хŏты йис'.
41 Пӑ щи хӑтԓәтән мис хŏр версәт, пӑ щи ԓуӈха йир тусәт, пӑ ԓыв йошԓаԓән верәм вер йэԓпийән каш версәт.
42 Турәм пӑ шӑшән керԓәс пӑ ԓывиԓаԓ турәм хӑр пŏрмасәт пеԓа пойәкщәты хӑйсәԓы, хŏты Турәм айкеԓ туты хŏйатәт нэпекән хӑшман уԓԓа: 'Израиль хот! Нын мўй войәт пӑ йирәт ԋӑԓйаӈ тӑԓ сыс таԓ мўв хŏща Мӑнэма тутԓысты?
43 Нын Молох ԓух хӑшап пӑ Ремфан нэмпи хус ԓуӈхән, нын верәм хŏрԓән, пӑтән ўсԓән, ԓывиԓаԓа пойәкщәты урәӈән: пӑ Ма нынан Вавилон эԓты йэԓшәк касԓәптәԓԓам'.
44 Вантәм ŏт Йэмәӈ Хӑшап мўӈ ащиԓув хŏща таԓ мўвән ус, хŏты Пŏтәртәм Ŏт Моисейа ԓўвеԓ верты партсәԓы, щи ԓўв вантәм ŏтәԓ хŏрпийа.
45 Щи Йэмәӈ Хӑшап, йоша пайәтмеԓ йўпийән, мўӈ ащиԓув, Иисус Навин ԓыв хŏщайэԓ ŏха уԓман, мирәт тӑйты мўва ԓŏӈәԓсэԓ, Турәм, ԓыв йэԓпеԓән, мўвәӈ хŏйатәт воштәсԓы. Тӑмиты Давид хӑтԓәт унты ус.
46 Тӑми Турәм хŏща йӑм мŏщатәс пӑ пойәкщәс, Иаков Турма уԓты тӑха ԓэщатты урәӈән.
47 Соломон пӑ Ԓўвеԓа хот опсәс.
48 Туп Нўм Ащи ӑнтом йошән опсәм хотәтән уԓ, хŏты Турәм айкеԓ туты хŏйат пŏтәртәԓ:
49 'Турәм хӑр – ма хон омәсты тӑхайэм, пӑ мўв – Ма кўр иԓпем. Мўй хŏрпи хот Мӑнэма верԓәты, Турәм Куща пŏтәртәԓ, мўй хŏрпи тӑхайән Ма щўтщәты верем уԓ?
50 Ӑнта мўй Ма йошем тӑм иса тыйәԓтәс?'
51 Нын - ўрайәӈ ŏтәт! Ӑт эвтәм сӑмпи пӑ ӑт эвтәм пӑԓпи хŏйатәт! Нын иса Йэмәӈ Ԓыԓ йэщаԓт уԓԓәты, хŏты нын ащиԓән, щиты нын па.
52 Турәм айкеԓ туты хŏйатәт эԓты нын ащиԓәнән хŏй ӑт воштәса? Ԓыв Вещкат Ŏт йŏхәтты айкеԓ йэԓпи йастәм ŏтәт веԓсәԓаԓ, Хŏй хŏща хŏйат аԉты пӑ веԓты ŏтәта ин нын верәссәты, –
53 нынана ангеләт сӑхат мийәм Закон вана ўйман йўпийән, нын ӑт шависԓын».
Стефан пӑратты вер
54 Тӑм хуԓәтман, ԓыв ԉикән кавәрмәсайәт пӑ ԓўв пеԓайәԓ пекԓаԓән йухрәԓсәт.
55 Стефан пӑ, Йэмәӈ Ԓыԓән тэкәнман уԓман, турәм хӑр пеԓа ӑӈкәрмәс, Турәм хутԓәты–вŏрԓәты щир пӑ Иисус, Турәм йӑм пеләк сӑхат ԓойтаԓ шийаԓәс,
56 пӑ йастәс: «Тӑм, лоӈхемәм опәԉ пӑ Хŏйат Пŏх, Турәм йӑм пеләк сӑхат ԓойтаԓ ма ватԓәм».
57 Туп ԓыв, сыйәӈ тўрән уваԓтман, пӑԓаԓ лӑп катәԓсәԓаԓ, пӑ и сӑмән ԓўв хŏщайәԓ ӑратсәт,
58 пӑ, вош ким пелка тувман, кевән ԓўвеԓ йовәԓты питсэԓ. Вантәм хŏйатәт пӑ ԓыв ԓумәтты сŏхԓаԓ Савл нэмпи, айкам ху кўрнат шŏма пŏтсәԓаԓ,
59 пӑ Стефан кевән йовәԓсэԓ, ԓўв пойәкщәс пӑ пŏтәртәс: «Турәм Куща Иисус! Ма ԓыԓэм ўйи».
60 Пӑ, шашӈәԓаԓ иԓ морәтман, сыйәӈ тўрән ўваԓтәс: «Турәм Куща! Ԓывиԓаԓа тӑми кӑрека аԓ нуми». Щӑԓта, щит йастәмаԓ кемән, пӑрәс.