KIDA ISAYE DAWU KƎNGAYAMBANJUYEN
13
Isaye si fuwurawanjuye tuldu
1 Kawu sala Laya Njǝkkayirambedǝro, Isa sanju dunia adǝa kolǝme na Bawanjuyero leduye cǝdǝnaro nojǝna duwon, jamanju dunia adǝyea cǝraana nangaro, tayiro kǝrawonju cotto fǝleyeyeno.
2 Yiwulis calan nia Isaa sǝrǝttuwuye curo karwu Yahusa Iskariyot tada Simannero cakkǝna. Bǝri lesayelan,
3 Isa Bawadǝ awo sammaa mukkonjuro cakkǝna ye, na Alayen kadio na Alayero waldi yero nojǝna duwon,
4 daji cije kajǝmunju gǝnaje batta laa ngoje canjanjuro kikkero.
5 Ngawo adǝyen ingi tasaro fijiye si fuwurawanjuyedǝa tuldu badije batta canjanjuro cikkerǝnadǝn cinji ngai duwon,
6 na Siman Biturussero kadinniya, Biturusse tiro: «Kǝma, nima wa sini tullǝmi?» yeno.
7 Isaye tiro: «Awo dikkidǝa kǝrma asunǝmbawo, amma fuwun asunǝmi,» yeno.
8 Biturusse tiro: «A’a, tǝmmaro sini tullǝmbawo!» yenniya, Isaye: «Tullǝkkǝnia, nanilan nuwanǝm bawo,» yeno.
9 Siman Biturusse: «Kǝma, sini runju gǝni, mukkoni-a kǝlani-a yea tulle!» yeno.
10 Isaye tiro: «Kam kasaldǝnadǝ, sinju tulda gǝnia, kadawu tilan bawo. Nayi tayir, amma nayi samma gǝni,» yeno.
11 Isa sǝrǝttuwumanjudǝa nojǝna, adǝma nangaro tiye: «Nayi samma gǝni tayir wo,» yeno.
12 Sinja tulje kerǝnniya, Isa kajǝmunju ngoje luje walde napce tayiro: «Awo njadǝkkǝnadǝa asunuwwa wa?
13 Wua sayinna-a Kǝma-alan bowosuwi, jirendoa, wuma ti wo nangaro.
14 Daji wu Kǝmando ye, sayinnando ye duwon sindo tullǝkkǝnadǝ, si amandoye tulda nayi yero wajimnjaana.
15 Nayiro misal ngedǝkko, nayi ye jiɍi njaddǝkkǝnadǝ gai amandoro yiddowo!
16 Jiremaro nayiro wulnjagakki, wolodi banju ngimbaa kojiwawo, koro kadunoma ye kam duwon tia cunodǝnadǝa kojiwawo.
17 Awo ania nonuwwadǝ, bargando, tayia diwia.
18 Kǝla nayi sammayen gǝni mananǝkki, am kǝrenǝkkǝnadǝa nokkǝna. Amma dole sai awo kitawulan ruwuwadadǝ wakkajiya: “Kam wu-a rokko masǝna diyedǝ kǝladoniro waljǝna.”
19 Kǝrma kawu wakkajiro nayiro wulnjagakki, sa wakkajiya, wuma ti woro kasaddoworo.
20 Jiremaro nayiro wulnjagakki, wundu duwon kam nodǝkkǝnadǝa cǝmowonadǝ wumaa sǝmowo. Koro wundu duwon wua sǝmowonadǝ ti wua sunodǝnamaa cǝmowo,» yeno.
Masǝna *sala Laya Njǝkkayirambe
(Mat 26.17-25; Mar 14.12-21; Luk 22.7-13)
21 Awo ania wulje kerǝnniya, Isa hangalnju jauro cije: «Jiremaro nayiro wulnjagakki, kamndo laa wua mukko kǝladowaniyero sǝrǝnsiyi,» yeno.
22 Fuwurawadǝ kattenjan ninidane kǝla wunduyen manajimaro nojanni.
23 Falnja ti duwon Isa jauro cǝraanadǝ gǝre Isayen giriskada mbeji.
24 Daji Siman Biturus kǝla wunduyen manajiro tia cuwororo bǝlaana kam giriskadadǝro kiddo.
25 Daji Isaa karǝnje tiro: «Kǝma, wundu?» cǝne kiworo.
26 Isaye: «Kam duwon tiro burodi adǝa yigapkǝkke yikkimadǝ, tima!» yeno. Burodidǝa kigapkenniya, Yahusa tada Siman Iskariyottero kaino.
27 Njangodǝa kimowonniya, Yiwulis karwunjuro kǝrgawo. Isaye tiro: «Awo dimidǝa duwan de!» yeno.
28 Amma curo am masǝnaro napcanayen falnjama awiro adǝa tiro wulyeyenoro asujǝnni.
29 Yahusa aɍittadǝ mukkonjun nangaro, laanja Isaye tiro lejo kare ngǝmǝriyedǝa cuwo bi awo laa talaawaro co wuljoro tǝmayera.
30 Yahusa njangodǝa kimowonniyama, kiluwo. Sadǝ bune.
______________________________________________________________________
Kalmaram: Sala Laya Njǝkkayirambe
Laya Njǝkkayirambedǝ, tima laya Israyilawu burwojane jaman Nawi Musayen duwajanadǝ wo. Jaman adǝn Israyilawu Masarnin dasaana nankaɍea Fira’aunaro caddi duwon, tayia nankaɍeanjalan tuluworo, Ala Fira’auna-a Masarwu-aro ajawu jau jau gǝnayeyeno. Kawu sa ajawu kurwowu daryeye isidǝro, Alaye Nawi Musaro Masar ngaro wowom gǝnajiye tadawa karuye sammaa ceji yeno. Amma Israyilawuro jawal wowom karmoye adǝro kaduye amarjǝgǝna. Fadoma nguson ngǝlaro bi dal kǝrwu falla layaro cǝda kajiri duwajo bu layadǝye laa ngojo cinna fannjuyero cinjuwo! Dalilnjudǝ bune Kǝmande wowom karmoye Masar ngaro gǝnaduwuro ise bu cingaadadǝa curuiya, koji fadodǝro ngayiwawo. Ngaima barga bu layadǝyen wowom karmoye Masarwua cuwandidǝ Israyilawua lejiwawo. Ala wuljǝnadǝ gai, awo ani samma wakkayera.
Laya Israyilawua karmoro cǝkkaanadǝa Laya Njǝkkayirambelan bowoyera. Ku kundenno sanju cǝdiya, kaduwu Israyilawuye yaudiya cani sala Laya Njǝkkayirambe cadi. Tǝlam nasarayelan sala Laya Njǝkkayirambedǝro Pak cani.
Bargaande Isa Almasiwu sa sala Laya Njǝkkayirambedǝn kano. Kawu sadǝ isidǝro, Isaye fuwurawanjuro ronju co am ngǝwu merujoro kadio yeno. Adǝa wuldunjudǝ, alama barga bu fida laya njǝkkayirambedǝn Ala Israyilawua nankaɍeanjan cuttuluwunadǝ gai, Isa ronju ce am tia kasaccanadǝa nankaɍeanjan kittuluwo. Barga karmonjuyen jama Isaye nankaɍea Yiwulissen kǝlanja camowona ye, koro wowom Alayero kajana ye. Ngǝlaro Laya Njǝkkayirambedǝ naptu Njǝkkayimande Isa Almasiwuye cǝdi nangaro, curo Linjilayen tia kaala Tama Alaye yelan bowojai.
______________________________________________________________________
Wada bǝɍin
31 Yahusa kiluwunniya, Isaye: «Kǝrma duwon Tada Kambedǝ daraja cuwandi, koro Ala ye tiyen daraja cuwandi.
32 Tiyen Ala daraja cuwandia, Ala kǝlanju ye tiro daraja ci, koro sadǝman tiro daraja ci.
33 Tadawani sanana, sa gana laaro curondon dǝgakki. Wua masuwi, koro yaudiyaro wulgǝkkǝnadǝ gai nayi yero kǝrma wulnjagakki, na lekkidǝro ranguwe lenuwwawo.
34 Nayiro wada bǝɍin njadǝkki: Amandoa rawowo! Jiɍi nayia njaraakkǝnadǝ gai, nayi ye amandoa rawowo!
35 Amandoa raawwaa, adǝgainin am samma nayi fuwurawaniro nojai,» yeno.
Isaye Biturus tia angǝrji wuldu
(Mat 26.31-35; Mar 14.27-31; Luk 22.31-38)
36 Siman Biturusse tiro: «Kǝma, ndararo lenǝmi?» cǝne kiworǝnniya, Isaye tiro: «Na lekkidǝro rangǝme kǝrma wua sǝgambawo, amma fuwun sǝgami,» yeno.
37 Biturusse tiro: «Kǝma, awiro kǝrma rangǝkke njǝgakkiwawodǝ? Ni nangaro roni yikki,» yeno.
38 Isaye tiro: «Wu nangaro ronǝm yimi? Jiremaro niro wulnjǝgǝkki, ku kawu gudowom kokkore cakkidǝro, wua yakkuro angǝrsǝmi,» yeno.